പോക്കറ്റടി നടി : രൂപ ദത്ത അറസ്റ്റിൽ
കൊൽക്കത്ത: പുസ്തകോത്സവത്തിനിടെ പോക്കറ്റടിച്ച നടി അറസ്റ്റിൽ. ബംഗാളി ടെലിവിഷൻ നടിയായ നടി രൂപ ദത്തയാണ് അറസ്റ്റിലായത്. ശനിയാഴ്ച രാത്രിയാണ് സംഭവം നടന്നത്. കൊൽക്കത്ത ഇന്റർനാഷണൽ ബുക്ക് ഫെയർ 2022 ചടങ്ങിന് ഡ്യൂട്ടിക്കെത്തിയ പൊലീസുകാരാണ് നടിയെ കൈയോടെ പിടികൂടിയത്. ചടങ്ങ് നടന്നിടത്തെ വേസ്റ്റ് ബാസ്ക്കറ്റിൽ ഒരു പഴ്സ് നടി ഉപേക്ഷിക്കുന്നത് കണ്ട പൊലീസുകാർ സംശയം പ്രകടിപ്പിക്കുകയായിരുന്നു. ബാഗ് പരിശോധിച്ചപ്പോൾ നിരവധി പഴ്സുകൾ ഇതിൽ നിന്നും ലഭിച്ചു. നടിയുടെ കൈയിൽ നിന്നും 75000 രൂപയാണ് പൊലീസ് പിടിച്ചെടുത്തതെന്നാണ് റിപ്പോർട്ട്. പണമെടുത്ത ശേഷം പഴ്സ് ഉപേക്ഷിച്ച് പോവാനായിരുന്നു നടിയുടെ ശ്രമം. ബിധൻനഗർ നോർത്ത് പൊലീസാണ് നടിയെ അറസ്റ്റ് ചെയ്തത്. നേരത്തെ സംവിധായകന് അനുരാഗ് കശ്യപിനെതിരെ തെറ്റായി ലൈംഗികാരോപണം ഉന്നയിച്ച് രൂപ ദത്ത വിവാദത്തില്പെട്ടിരുന്നു. അനുരാഗ് കശ്യപ് തനിക്ക് മോശം മെസേജുകള് അയച്ചെന്നാരോപിച്ച് നടി ചാറ്റുകളുടെ സ്ക്രീന് ഷോട്ടുകള് പുറത്തു വിട്ടിരുന്നു. എന്നാല് അനുരാഗ് എന്ന് പേരുള്ള മറ്റൊരാള് അയച്ച മെസേജുകള് ആയിരുന്നു ഇവ.
