വിപ്ലവകരമായ 10 വർഷങ്ങൾ: ഡിജിറ്റൽ ഇടപാടുകളിൽ പുതിയ ചരിത്രമെഴുതി യുപിഐ

ഷീബ വിജയൻ

ന്യൂഡൽഹി: ഇന്ത്യയുടെ സാമ്പത്തിക രംഗത്ത് വിപ്ലവകരമായ മാറ്റങ്ങൾ സൃഷ്ടിച്ച യൂണിഫൈഡ് പേമെന്റ്സ് ഇന്റർഫേസ് (യുപിഐ) വിജയകരമായി 10 വർഷങ്ങൾ പൂർത്തിയാക്കി. 2016 ഓഗസ്റ്റ് 25-ന് റിസർവ് ബാങ്ക് ഓഫ് ഇന്ത്യയുടെ മേൽനോട്ടത്തിൽ നാഷണൽ പേയ്മെന്റ്സ് കോർപറേഷൻ ഓഫ് ഇന്ത്യ (എൻപിസിഐ) തുടക്കമിട്ട യുപിഐ, ഇന്ന് രാജ്യത്തിന്റെ ഡിജിറ്റൽ പേമെന്റ് ആവാസവ്യവസ്ഥയുടെ നട്ടെല്ലും ആഗോള മാതൃകയുമായി മാറിയിരിക്കുകയാണ്.

യുപിഐ 10 വർഷം പൂർത്തിയാക്കുന്ന ഈ ചരിത്ര മുഹൂർത്തത്തിൽ സംവിധാനത്തെയും അതിന്റെ വളർച്ചയെയും പ്രകീർത്തിച്ച് പ്രധാനമന്ത്രി നരേന്ദ്ര മോദി രംഗത്തെത്തി. രാജ്യത്തിന്റെ ഡിജിറ്റൽ പേമെന്റ് യാത്രയിലെ സുപ്രധാന വഴിത്തിരിവാണ് യുപിഐയെന്നും ഇതിന്റെ വിപുലമായ വളർച്ചയിലും വിജയത്തിലും ഓരോ ഇന്ത്യക്കാരനും അഭിമാനിക്കാമെന്നും അദ്ദേഹം എക്സിൽ കുറിച്ചു. കഴിഞ്ഞ ഒരു പതിറ്റാണ്ടുകൊണ്ട് പൗരന്മാരുടെ ദൈനംദിന ജീവിതത്തിന്റെ അവിഭാജ്യ ഘടകമായി മാറിയ യുപിഐയെക്കുറിച്ചുള്ള അനുഭവങ്ങളും ഓർമകളും പങ്കുവെക്കാൻ അദ്ദേഹം പൊതുജനങ്ങളോട് അഭ്യർത്ഥിക്കുകയും ചെയ്തു.

തെരുവ് കച്ചവടക്കാർ മുതൽ വൻകിട മാളുകൾ വരെ ഒരൊറ്റ ക്യൂആർ കോഡിലൂടെ പണമിടപാട് നടത്താൻ പ്രാപ്തമാക്കിയതോടെ രാജ്യത്തെ ഏറ്റവും ജനപ്രിയമായ പണമിടപാട് രീതിയായി യുപിഐ മാറി. ധനമന്ത്രാലയം പുറത്തുവിട്ട കണക്കുകൾ പ്രകാരം കഴിഞ്ഞ ഒരു ദശകത്തിൽ യുപിഐ വഴി നടന്ന വാർഷിക ഇടപാടുകളുടെ എണ്ണം 2016-17 സാമ്പത്തിക വർഷത്തിലെ 1.78 കോടിയിൽ നിന്ന് 2025-26 സാമ്പത്തിക വർഷത്തിൽ 24,162 കോടിയിലധികമായി ഉയർന്നു. ഇക്കാലയളവിൽ ആകെ ഇടപാടുകളുടെ മൂല്യം 0.07 ലക്ഷം കോടി രൂപയിൽ നിന്ന് ഏകദേശം 314 ലക്ഷം കോടി രൂപയായാണ് കുത്തനെ ഉയർന്നത്. തുടക്കത്തിൽ 44 ബാങ്കുകൾ മാത്രമുണ്ടായിരുന്ന സംവിധാനത്തിൽ ഇന്ന് 703 ബാങ്കുകൾ സജീവമാണ്.

2026 വർഷം യുപിഐയുടെ വളർച്ചാ പാതയിൽ നിർണായകമായ നാഴികക്കല്ലാണ് അടയാളപ്പെടുത്തിയത്. ഈ വർഷം മേയ് മാസത്തിൽ പ്രതിമാസ ഇടപാടുകളുടെ എണ്ണം ആദ്യമായി 2,300 കോടി കടന്ന് 2,320 കോടിയിൽ എത്തിച്ചേർന്നു. തുടർന്ന് ജൂലൈയിൽ രേഖപ്പെടുത്തിയ 2,366 കോടി ഇടപാടുകളാണ് യുപിഐയുടെ ചരിത്രത്തിലെ ഏറ്റവും ഉയർന്ന പ്രതിമാസ നിരക്ക്. നിലവിൽ പ്രതിദിനം 66 കോടിയിലധികം ഇടപാടുകളാണ് യുപിഐ ശൃംഖല വഴി നടക്കുന്നത്.

ആഗോളതലത്തിലും ഇന്ത്യയുടെ യുപിഐ വൻ മുന്നേറ്റമാണ് നടത്തുന്നത്. അന്താരാഷ്ട്ര നാണയ നിധിയുടെ (IMF) കണക്കുകൾ പ്രകാരം 2025-ൽ ലോകത്ത് നടന്ന റിയൽ-ടൈം ഡിജിറ്റൽ ഇടപാടുകളിൽ 49 ശതമാനവും യുപിഐ വഴിയായിരുന്നു. രാജ്യത്തിനുള്ളിലെ പേയ്മെന്റ് ഇന്നൊവേഷനായി തുടങ്ങി ഇന്ന് ഭൂട്ടാൻ, കംബോഡിയ, ഫ്രാൻസ്, ഗ്രീസ്, മൗറീഷ്യസ്, മാലദ്വീപ്, നേപ്പാൾ, ഖത്തർ, സിംഗപ്പൂർ, ശ്രീലങ്ക, യുഎഇ എന്നീ 11 രാജ്യങ്ങളിലേക്ക് സേവനം വ്യാപിപ്പിച്ചുകൊണ്ട് ആഗോള ഡിജിറ്റൽ രംഗത്ത് ഇന്ത്യയുടെ കരുത്ത് തെളിയിക്കുകയാണ് യുപിഐ.