മയക്കുമരുന്ന് മാഫിയകൾക്കെതിരെ 'ഓപ്പറേഷൻ ഗ്ലോബൽ ഹണ്ട്'; കുറ്റവാളികളെ പിടികൂടാൻ ഇന്ത്യയും ഇന്റർപോളും കൈകോർക്കുന്നു
ശാരിക l ദേശീയം
ന്യൂഡൽഹി: അന്താരാഷ്ട്ര മയക്കുമരുന്ന് മാഫിയകളെയും സംഘടിത കുറ്റകൃത്യ ശൃംഖലകളെയും ലക്ഷ്യമിട്ട് ഇന്ത്യ 'ഓപ്പറേഷൻ ഗ്ലോബൽ ഹണ്ട്' എന്ന ബൃഹദ് ദൗത്യത്തിന് തുടക്കമിട്ടു. കേന്ദ്ര നാർക്കോട്ടിക് കൺട്രോൾ ബ്യൂറോയും ഇന്റർപോളും സംയുക്തമായി നടപ്പിലാക്കുന്ന ഈ മൂന്ന് വർഷത്തെ കർമ്മപദ്ധതിയിലൂടെ നൂറിലധികം പിടികിട്ടാപ്പുള്ളികളെയാണ് ലക്ഷ്യമിടുന്നത്. ദുബായ്, കാനഡ, യൂറോപ്പ് തുടങ്ങിയ സ്ഥലങ്ങളിലിരുന്ന് ഇന്ത്യയിലേക്ക് മയക്കുമരുന്ന് എത്തിക്കുന്ന സിൻഡിക്കേറ്റുകളെ കണ്ടെത്തി റെഡ് നോട്ടീസ് പുറപ്പെടുവിച്ച് നിയമത്തിന് മുന്നിലെത്തിക്കുക എന്നതാണ് ഈ നീക്കത്തിന്റെ പ്രധാന ഉദ്ദേശ്യം.
ഈ ഓപ്പറേഷന്റെ ഭാഗമായി ദാവൂദ് ഇബ്രാഹിമിന്റെ സഹായിയും അയ്യായിരം കോടിയുടെ മയക്കുമരുന്ന് ഇടപാടുകളിലെ പ്രധാനിയുമായ സാലിം ഇസ്മായിൽ ഡോലയെ തുർക്കിയിൽ നിന്ന് ഇന്ത്യയിലെത്തിച്ചത് വലിയ വിജയമായി കണക്കാക്കപ്പെടുന്നു. 2025-ൽ മാത്രം ലക്ഷക്കണക്കിന് കിലോ മയക്കുമരുന്ന് പിടിച്ചെടുക്കുകയും നശിപ്പിക്കുകയും ചെയ്ത ഇന്ത്യ, ഇന്റർപോളിന്റെ സഹായത്തോടെ കുറ്റവാളികളെ തിരിച്ചെത്തിക്കാനുള്ള നടപടികൾ ഊർജിതമാക്കിയിട്ടുണ്ട്. ഭീകരവാദ പ്രവർത്തനങ്ങൾക്കായി മയക്കുമരുന്ന് പണം ഉപയോഗിക്കുന്നവരെ കരിമ്പട്ടികയിൽ ഉൾപ്പെടുത്തിയതായും അന്താരാഷ്ട്ര തലത്തിൽ ഇവർക്ക് ഒളിവിൽ കഴിയാനുള്ള സാഹചര്യങ്ങൾ ഇല്ലാതാക്കുമെന്നും ആഭ്യന്തര മന്ത്രാലയം വ്യക്തമാക്കി.
svdfg
