ദേശീയ ഗീതം ഇനി ആറ് ഖണ്ഡികകളും ആലപിക്കണം; പുതിയ മാനദണ്ഡങ്ങൾ പുറത്തിറക്കി കേന്ദ്രം

ശാരിക I ദേശീയം

ന്യൂഡൽഹി: ദേശീയ ഗീതമായ വന്ദേമാതരം ആലപിക്കുന്നതിന് പുതിയ ഔദ്യോഗിക മാനദണ്ഡങ്ങൾ കേന്ദ്ര ആഭ്യന്തര മന്ത്രാലയം പുറത്തിറക്കി. പുതിയ ഉത്തരവ് പ്രകാരം വന്ദേമാതരത്തിന്റെ ആറ് ഖണ്ഡികകളും ഇനി മുതൽ നിർബന്ധമായും ആലപിക്കണം. ഇതുവരെ ഒരു മിനിറ്റും ഒൻപത് സെക്കൻഡും എടുത്ത് രണ്ട് ചരണങ്ങൾ മാത്രം ആലപിക്കുന്നതായിരുന്നു പതിവ്. എന്നാൽ പുതിയ പരിഷ്കാരത്തോടെ ആകെ ദൈർഘ്യം മൂന്ന് മിനിറ്റും പത്ത് സെക്കൻഡുമായി വർദ്ധിക്കും. വന്ദേമാതരത്തിന്റെ 150-ാം വാർഷികത്തോടനുബന്ധിച്ച് പാർലമെന്റിൽ നടന്ന ചർച്ചകൾക്ക് പിന്നാലെയാണ് ദേശീയ ഗാനത്തിന് തുല്യമായ പ്രാധാന്യം ദേശീയ ഗീതത്തിനും നൽകാൻ കേന്ദ്ര സർക്കാർ തീരുമാനിച്ചത്.

കേന്ദ്ര-സംസ്ഥാന സർക്കാരുകളുടെ എല്ലാ ഔദ്യോഗിക പരിപാടികളിലും ഇനി മുതൽ വന്ദേമാതരത്തിന്റെ ആറ് ചരണങ്ങളും പാടണം. രാഷ്ട്രപതി, സംസ്ഥാന ഗവർണർമാർ, ലഫ്റ്റനന്റ് ഗവർണർമാർ എന്നിവർ ഔദ്യോഗിക ചടങ്ങുകളിൽ എത്തുമ്പോഴും ചടങ്ങ് കഴിഞ്ഞ് മടങ്ങുമ്പോഴും ഗീതം ആലപിക്കേണ്ടതാണ്. കൂടാതെ, രാഷ്ട്രപതി റേഡിയോയിലൂടെയോ ടെലിവിഷനിലൂടെയോ രാജ്യത്തെ അഭിസംബോധന ചെയ്യുന്നതിന് മുൻപും ശേഷവും വന്ദേമാതരം ആലപിക്കണം. പരേഡുകളിൽ ദേശീയ പതാക എത്തിക്കുന്ന സമയത്തും സർക്കാർ ആവശ്യപ്പെടുന്ന മറ്റ് സന്ദർഭങ്ങളിലും ഗീതം ആലപിക്കണമെന്ന് നിർദ്ദേശമുണ്ട്.

വിദ്യാഭ്യാസ സ്ഥാപനങ്ങളിലും പുതിയ ക്രമീകരണം ബാധകമാകും. സ്കൂളുകളിൽ പ്രവൃത്തിദിവസം ആരംഭിക്കുന്നതിന് മുൻപ് ദേശീയ ഗീതം ആലപിക്കാവുന്നതാണ്. പരേഡുകളിൽ ഒഴികെയുള്ള സന്ദർഭങ്ങളിൽ ദേശീയ പതാക ഉയർത്തുമ്പോഴും വന്ദേമാതരം ആലപിക്കണം. സാധാരണയായി റിപ്പബ്ലിക് ദിന ആഘോഷങ്ങളിലാണ് ഇത്തരം പതാക ഉയർത്തൽ ചടങ്ങുകൾ ഉണ്ടാകാറുള്ളത്. മന്ത്രിമാരും മറ്റും പങ്കെടുക്കുന്ന അവസരങ്ങളിൽ ഗീതം ആലപിക്കുന്നത് നിർബന്ധമല്ലെങ്കിലും അനുമതിയുണ്ട്. മാതൃരാജ്യത്തോടുള്ള ആദരവ് പ്രകടിപ്പിക്കാൻ സാധിക്കുന്ന ഏത് അവസരത്തിലും ദേശീയ ഗീതം ആലപിക്കാവുന്നതാണെന്നും ആഭ്യന്തര മന്ത്രാലയം വ്യക്തമാക്കുന്നു.

ദേശീയ ഗീതം ആലപിക്കുമ്പോൾ പാലിക്കേണ്ട മര്യാദകളെക്കുറിച്ചും ഉത്തരവിൽ വ്യക്തമായ നിർദ്ദേശമുണ്ട്. ഇനി മുതൽ വന്ദേമാതരത്തിന്റെ ഔദ്യോഗിക പതിപ്പ് ആലപിക്കുമ്പോഴോ റെക്കോർഡ് ചെയ്ത ഭാഗം കേൾക്കുമ്പോഴോ ദേശീയ ഗാനത്തിന് നൽകുന്ന അതേ ആദരവ് നൽകണം. എല്ലാവരും എഴുന്നേറ്റ് നിന്ന് അറ്റൻഷനായി നിൽക്കണമെന്ന് മന്ത്രാലയം കർശന നിർദ്ദേശം നൽകി. എന്നാൽ സിനിമകളിലോ മറ്റ് വിനോദ പരിപാടികളിലോ ദേശീയ ഗീതം പശ്ചാത്തലമായി വരുമ്പോൾ എഴുന്നേറ്റ് നിൽക്കേണ്ട ആവശ്യമില്ലെന്നും മന്ത്രാലയം കൂട്ടിച്ചേർത്തു.