യുപിയിലെ വോട്ടർപട്ടികയിൽ നിന്ന് 1.27 കോടി ഹിന്ദുക്കളുടെ പേരുകൾ ഒഴിവാക്കപ്പെട്ടെന്ന് ആരോപണവുമായി യോഗി ആദിത്യനാഥ്

ശാരിക

ലഖ്‌നൗ: ഉത്തർപ്രദേശിലെ വോട്ടർപട്ടികയിൽ നിന്ന് കോടിക്കണക്കിന് ഹിന്ദു വോട്ടർമാരുടെ പേരുകൾ ഒഴിവാക്കപ്പെട്ടെന്ന ഗുരുതര ആരോപണവുമായി മുഖ്യമന്ത്രി യോഗി ആദിത്യനാഥ്. ലഖ്‌നൗവിൽ നടന്ന ബിജെപി സംസ്ഥാന എക്‌സിക്യൂട്ടീവ് യോഗത്തിൽ സംസാരിക്കവെയാണ് വോട്ടർപട്ടിക പുതുക്കൽ പ്രക്രിയയിൽ പാർട്ടി പ്രവർത്തകർ അതീവ ജാഗ്രത പാലിക്കണമെന്ന് അദ്ദേഹം ആവശ്യപ്പെട്ടത്. സംസ്ഥാനത്തെ വോട്ടർപട്ടികയിൽ നിന്ന് 1.27 കോടി ഹിന്ദുക്കളുടെ പേരുകൾ കാണാതായിട്ടുണ്ടെന്ന് യോഗി ആദിത്യനാഥ് അവകാശപ്പെട്ടു. വോട്ടർമാരെ ഇത്തരത്തിൽ ഒഴിവാക്കിയത് നഗര തദ്ദേശ സ്വയംഭരണ സ്ഥാപനങ്ങളിലെ 28 മണ്ഡലങ്ങളിൽ ബിജെപിയുടെ വിജയസാധ്യതയെ കടുത്ത രീതിയിൽ ദോഷകരമായി ബാധിച്ചിട്ടുണ്ടെന്നും അദ്ദേഹം പറഞ്ഞു.

നിലവിലെ ജനസംഖ്യാ കണക്കുകൾ പരിശോധിച്ചാൽ ഉത്തർപ്രദേശിൽ 16 കോടിയിലധികം വോട്ടർമാർ ഉണ്ടാകേണ്ടതാണെന്നും എന്നാൽ നിലവിൽ ഏകദേശം 13 കോടി വോട്ടർമാർ മാത്രമാണ് പട്ടികയിലുള്ളതെന്നും മുഖ്യമന്ത്രി ചൂണ്ടിക്കാട്ടി. പഞ്ചായത്ത് തെരഞ്ഞെടുപ്പ് വോട്ടർപട്ടികയിലുള്ള 66 ലക്ഷം പേരുടെ വിവരങ്ങൾ നിയമസഭാ മണ്ഡലങ്ങളിലെ പട്ടികയിലില്ലെന്ന് യോഗി പറഞ്ഞു. കൂടാതെ, സർക്കാർ ക്ഷേമപദ്ധതികളുടെ ഗുണഭോക്താക്കളായ 55 ലക്ഷം പേരും 18-19 പ്രായപരിധിയിലുള്ള ഏകദേശം 4.5 ലക്ഷത്തോളം യുവാക്കളും വോട്ടർപട്ടികയിൽ ഉൾപ്പെട്ടിട്ടില്ലെന്നും അദ്ദേഹം ആരോപിച്ചു. കഴിഞ്ഞ എസ്.ഐ.ആർ (SIR) പുനഃപരിശോധനാ പ്രക്രിയയിലൂടെ കേവലം നാലുലക്ഷം വോട്ടർമാരെ മാത്രമാണ് സംസ്ഥാനത്ത് കൂട്ടിച്ചേർക്കാൻ കഴിഞ്ഞതെന്ന കാര്യത്തിലും അദ്ദേഹം ശക്തമായ അതൃപ്തി പ്രകടിപ്പിച്ചു.

യോഗ്യരായ എല്ലാ വോട്ടർമാരുടെയും പേര് പട്ടികയിൽ ഉൾപ്പെടുന്നുണ്ടെന്ന് ഉറപ്പുവരുത്താൻ ബൂത്ത് ലെവൽ ഓഫീസർമാരുമായി (BLO) ചേർന്ന് സജീവമായി പ്രവർത്തിക്കാൻ ബിജെപി പ്രവർത്തകർക്ക് യോഗി നിർദേശം നൽകി. ഹിന്ദു വോട്ടർമാരെ പട്ടികയിൽ ഉൾപ്പെടുത്തുന്നതിനുള്ള പ്രവർത്തനങ്ങൾക്ക് എംപിമാരും എംഎൽഎമാരും പാർട്ടി ഭാരവാഹികളും നേരിട്ട് നേതൃത്വം നൽകണമെന്നും അദ്ദേഹം ആവശ്യപ്പെട്ടു.

അതേസമയം, തെരഞ്ഞെടുപ്പ് കമ്മീഷന്റെ കണക്കുകൾ പ്രകാരം വോട്ടർപട്ടിക പുതുക്കൽ നടപടികൾക്ക് ശേഷം 2.04 കോടിയിലധികം വോട്ടർമാരെയാണ് യുപിയിലെ പട്ടികയിൽ നിന്ന് ഒഴിവാക്കിയിട്ടുള്ളത്. നഗരപ്രദേശങ്ങളിലാണ് പേരുകൾ കൂടുതലായി നീക്കം ചെയ്യപ്പെട്ടിട്ടുള്ളത്, ഇതിൽ ഭൂരിഭാഗവും സ്ത്രീകളാണ്. എന്നാൽ, പുതുതായി 84 ലക്ഷത്തിലധികം വോട്ടർമാരെ പട്ടികയിൽ ചേർത്തതോടെ സംസ്ഥാനത്തെ ആകെ വോട്ടർമാരുടെ എണ്ണം 13,39,84,792 ആയി ഉയർന്നതായി തെരഞ്ഞെടുപ്പ് കമ്മീഷൻ വ്യക്തമാക്കുന്നു.