സി.ജെ.പി വക്താവ് സൗരവ് ദാസിനെതിരെ അന്വേഷണം വേണം; മദ്രാസ് ഹൈക്കോടതി കേന്ദ്ര മന്ത്രാലയങ്ങൾക്ക് നോട്ടീസ് അയച്ചു
ശാരിക
ചെന്നൈ: കോക്ക്‌റോച്ച് ജനതാ പാർട്ടി (സി.ജെ.പി) വക്താവും പ്രമുഖ മാധ്യമപ്രവർത്തകനുമായ സൗരവ് ദാസിന്റെ മുൻകാല പശ്ചാത്തലത്തെക്കുറിച്ച് സമഗ്രമായ അന്വേഷണം നടത്തണമെന്ന് ആവശ്യപ്പെട്ട് മദ്രാസ് ഹൈക്കോടതിയിൽ പൊതുതാല്പര്യ ഹർജി. ജുഡീഷ്യറിക്കെതിരെ സോഷ്യൽ മീഡിയയിലൂടെ അപകീർത്തികരമായ പരാമർശങ്ങൾ നടത്തിയെന്നാരോപിച്ച് അദ്ദേഹത്തിന്റെ സോഷ്യൽ മീഡിയ അക്കൗണ്ടുകൾ പൂർണ്ണമായി ബ്ലോക്ക് ചെയ്യണമെന്നും ഹർജിയിൽ ആവശ്യപ്പെടുന്നുണ്ട്.
ചീഫ് ജസ്റ്റിസ് സുശ്രുത് അരവിന്ദ് ധർമ്മാധികാരി, ജസ്റ്റിസ് ജി. അരുൾ മുരുഗൻ എന്നിവരടങ്ങിയ ഫസ്റ്റ് ബെഞ്ച് ഹർജി ഫയലിൽ സ്വീകരിച്ചു. വിഷയത്തിൽ കേന്ദ്ര ആഭ്യന്തര മന്ത്രാലയം, വിദേശകാര്യ മന്ത്രാലയം, നിയമ-നീതി മന്ത്രാലയം, പ്രമുഖ സോഷ്യൽ മീഡിയ പ്ലാറ്റ്‌ഫോമുകളായ എക്സ് (X), ഇൻസ്റ്റാഗ്രാം എന്നിവയുടെ ഗ്രീവൻസ് ഓഫീസർമാർ എന്നിവരോട് ആറാഴ്ചയ്ക്കുള്ളിൽ വിശദമായ മറുപടി നൽകാൻ കോടതി നിർദ്ദേശം നൽകി.
ഗണേഷ് കുമാർ സമർപ്പിച്ച ഹർജിയിലാണ് സൗരവ് ദാസിന്റെ മുൻകാല പശ്ചാത്തലത്തെക്കുറിച്ച് വിശദവും നിഷ്പക്ഷവുമായ അന്വേഷണം നടത്താനും, അദ്ദേഹത്തിന്റെ പാസ്‌പോർട്ട്, തിരിച്ചറിയൽ രേഖകൾ എന്നിവ റദ്ദാക്കുന്നത് ഉൾപ്പെടെയുള്ള ശക്തമായ നടപടികൾ സ്വീകരിക്കാനും സർക്കാരിനോട് നിർദ്ദേശിക്കണമെന്ന് ആവശ്യപ്പെട്ടിട്ടുള്ളത്. ജുഡീഷ്യറിയുടെ പ്രതിച്ഛായയെ ബാധിക്കുന്ന തരത്തിൽ അപകീർത്തികരമായ പരാമർശങ്ങൾ നടത്തുന്നത് തടയുന്നതിനായി അദ്ദേഹത്തിന്റെ ഔദ്യോഗിക സോഷ്യൽ മീഡിയ അക്കൗണ്ടുകൾ തടയാൻ അധികാരികൾക്ക് നിർദ്ദേശം നൽകണമെന്നും ഹർജിയിൽ വ്യക്തമാക്കുന്നു.
സൗരവ് ദാസിനെതിരെ നിയമനടപടി ആവശ്യപ്പെട്ട് മുൻപ് നിവേദനം നൽകിയിട്ടും ബന്ധപ്പെട്ട അധികാരികൾ സമയബന്ധിതമായി നടപടിയെടുക്കുന്നതിൽ പരാജയപ്പെട്ടതിനെ തുടർന്നാണ് താൻ കോടതിയെ സമീപിക്കാൻ നിർബന്ധിതനായതെന്ന് ഹർജിക്കാരൻ ചൂണ്ടിക്കാട്ടി.
dsfdsf
