ബഹ്റൈൻ കിരീടാവകാശിയും ഒമാൻ സുൽത്താനും കൂടിക്കാഴ്ച നടത്തി; ഉഭയകക്ഷി ബന്ധം ശക്തിപ്പെടുത്താൻ തീരുമാനം
പ്രദീപ് പുറവങ്കര I ബഹ്റൈൻ
മസ്കറ്റ്: ഔദ്യോഗിക സന്ദർശനത്തിനായി ഒമാനിലെത്തിയ ബഹ്റൈൻ കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫ, ഒമാൻ സുൽത്താൻ ഹിസ് മജസ്റ്റി ഹൈതം ബിൻ താരിഖ് അൽ സെയ്ദുമായി കൂടിക്കാഴ്ച നടത്തി. ഇരുരാജ്യങ്ങളും തമ്മിലുള്ള തന്ത്രപ്രധാനമായ പങ്കാളിത്തം കൂടുതൽ മേഖലകളിലേക്ക് വ്യാപിപ്പിക്കുന്നതിനെക്കുറിച്ച് നേതാക്കൾ ചർച്ച ചെയ്തു.
ബഹ്റൈൻ രാജാവ് ഹിസ് മജസ്റ്റി ഹമദ് ബിൻ ഈസ അൽ ഖലീഫയുടെയും സുൽത്താൻ ഹൈതം ബിൻ താരിഖിന്റെയും ദീർഘവീക്ഷണത്തിനനുസൃതമായി, ഇരുരാജ്യങ്ങളുടെയും സംയുക്ത താൽപ്പര്യങ്ങൾ സംരക്ഷിക്കാനും സഹകരണം വർദ്ധിപ്പിക്കാനും ബഹ്റൈൻ പ്രതിജ്ഞാബദ്ധമാണെന്ന് പ്രിൻസ് സൽമാൻ ബിൻ ഹമദ് പറഞ്ഞു. കൂടിക്കാഴ്ചയിൽ ഹമദ് രാജാവിന്റെ ആശംസകൾ സുൽത്താൻ ഹൈതം ബിൻ താരിഖിനെ കിരീടാവകാശി അറിയിച്ചു. ഒമാന്റെ ഐശ്വര്യത്തിനും പുരോഗതിക്കും വേണ്ടിയുള്ള ആശംസകൾ സുൽത്താൻ തിരികെ ബഹ്റൈൻ രാജാവിനെയും അറിയിച്ചു.
വിവിധ മേഖലകളിൽ ബഹ്റൈനും ഒമാനും കൈവരിച്ച പുരോഗതിയിൽ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അഭിമാനം പ്രകടിപ്പിച്ചു. പ്രാദേശികവും അന്തർദേശീയവുമായ പൊതുവായ വിഷയങ്ങളും സഹകരണത്തിനുള്ള പുതിയ വഴികളും കൂടിക്കാഴ്ചയിൽ ചർച്ചയായി.
സന്ദർശനത്തിന്റെ ഭാഗമായി ഒമാൻ സുൽത്താൻ, ബഹ്റൈൻ കിരീടാവകാശിക്കും ഒപ്പമുണ്ടായിരുന്ന പ്രതിനിധി സംഘത്തിനുമായി ഉച്ചഭക്ഷണം ഒരുക്കിയിരുന്നു. ഇരുരാജ്യങ്ങളും തമ്മിലുള്ള ആഴത്തിലുള്ള ചരിത്രപരമായ ബന്ധം ഊട്ടിയുറപ്പിക്കുന്നതായിരുന്നു സന്ദർശനമെന്ന് ഔദ്യോഗിക വൃത്തങ്ങൾ വ്യക്തമാക്കി.
fddf
