എണ്ണ വില വർദ്ധന : മിച്ച ബജറ്റ് പ്രതീക്ഷയിൽ കുവൈത്ത്
കുവൈത്ത് സിറ്റി : എണ്ണയ്ക്ക് ലഭിക്കുന്ന മികച്ച വില നടപ്പ് സാന്പത്തിക വർഷത്തിൽ കുവൈത്തിന് മിച്ച ബജറ്റ് സമ്മാനിക്കും. ബാരലിന് 50 ഡോളർ കണക്കാക്കിയുള്ള ബജറ്റ് പ്രകാരം വർഷാവസാനം 790 ബില്യൺ ദിനാർ കമ്മിയാണ് പ്രതീക്ഷ. എന്നാൽ എണ്ണയ്ക്ക് പ്രതീക്ഷിച്ചതിലും മികച്ച വില ലഭിക്കുന്നതിനാൽ വർഷാവസാനം ഖജനാവിൽ എത്തുക 20.88 ബില്യൺ ദിനാർ ആയിരിക്കുമെന്നാണ് ധനമന്ത്രാലയം നൽകുന്ന പുതിയ കണക്ക്.
ബജറ്റിലെ പ്രതീക്ഷിത ചെലവ് 20 ബില്യൺ ദിനാർ ആണ്. അതിനിടെ ബഹ്റ എണ്ണപ്പാടത്ത് വൻതോതിൽ എണ്ണശേഖരമുണ്ടെന്ന് സാങ്കേതിക പഠന റിപ്പോർട്ട് പുറത്തുവന്നു. തോത് വെളിപ്പെടുത്തിയിട്ടില്ലെങ്കിലും വരുംകാലത്ത് രാജ്യത്തിന്റെ എണ്ണ ഖനനത്തിൽ വലിയ തോതിൽ സ്ഥാനം ലഭിക്കുന്നതാകും ബഹ്റയിലെ എണ്ണ സാന്നിധ്യം എന്ന് വിദഗ്ദ്ധർ വിലയിരുത്തുന്നു.
ഈ എണ്ണപ്പാടത്തുനിന്നുമുള്ള ഖനനം മെച്ചപ്പെടുത്തുന്നതിന്റെ ഭാഗമായി സബാഹ് അൽ അഹമ്മദ് റിസർവ് വികസിപ്പിക്കുന്നതിനുള്ള കരാറിൽ കുവൈത്ത് ഓയിൽ കന്പനി ഉടനെ ഒപ്പുവയ്ക്കുമെന്നാണ് വിവരം. റിസർവ് പരിധിക്ക് അകത്താണ് എണ്ണശേഖരം കണ്ടെത്തിയിട്ടുള്ളത്.
