സ്വദേശിവൽക്കരണ പദ്ധതി 2022നകം പൂർത്തിയാക്കും
കുവൈത്ത് സിറ്റി : സ്വദേശിവൽക്കരണ പദ്ധതി 2022ന കം പൂർത്തിയാക്കും. 2019 മാർച്ചിൽ അവസാനിക്കുന്ന സാന്പത്തിക വർഷം പിരിച്ചുവിടേണ്ട 3108 വിദേശികളുടെ പട്ടിക തയ്യാറാക്കിയതായി പാർലമെന്റിലെ റിപ്ലേസ്മെന്റ് കമ്മിറ്റി അറിയിച്ചു. തൊഴിൽ ലഭിക്കുന്നതിനായി നോമിനേറ്റ് ചെയ്യപ്പെട്ട 75476 സ്വദേശികളുടെ പട്ടിക 2014ന്ശേഷം സിവിൽ സർവ്വീസ് കമ്മിഷൻ പാർലമെന്റ് സമിതിക്ക് അയച്ചിട്ടുണ്ട്.
അതേസമയം ഈ കാലയളവിൽ ആരോഗ്യം, വിദ്യാഭ്യാസം എന്നീ മന്ത്രാലയങ്ങളിൽ 16,468 വിദേശികളെ നിയമിച്ചിട്ടുമുണ്ട്. അർഹരായ സ്വദേശികൾ ഇല്ലാത്തതാണ് കാരണം. ഈ വർഷം ഏപ്രിലിൽ 8156 സ്വദേശികൾ തൊഴിലിൽ പ്രവേശിച്ചു. ചുരുങ്ങിയ ദിവസത്തിനുള്ളിൽ ഏറ്റവും കൂടുതൽ സ്വദേശി നിയമനമാണ് അത്. പൊതുമേഖലയിൽ 256048 സ്വദേശികളും 78439 വിദേശികളും ജോലി ചെയ്യുന്നുണ്ട്. വിദേശികൾ 31362 പേർ വിദ്യാഭ്യാസ മന്ത്രാലയത്തിലും 34789 പേർ ആരോഗ്യമന്ത്രാലയത്തിലും 2931 പേർ ഔഖാഫ് മന്ത്രാലയത്തിലുമാണ്. സ്വദേശികളെ നിയമിച്ചത് സംബന്ധിച്ച് എല്ലാ വകുപ്പുകളും ആറുമാസം കൂടുന്പോൾ പാർലമെന്റിന് റിപ്പോർട്ട് സമർപ്പിക്കണമെന്ന നിർദ്ദേശം സമിതി നിരാകരിച്ചു.
