വിചാരണക്കോടതി മാറ്റണമെന്ന ആവശ്യവുമായി ആക്രമിക്കപ്പെട്ട നടി ഹൈക്കോടതിയിൽ
കൊച്ചി: വിചാരണക്കോടതി പക്ഷപരമായി പെരുമാറുന്നുവെന്നും, പ്രസ്‌തുത കോടതിയിൽ നിന്ന് കേസ് മാറ്റണമെന്നും ആവശ്യപ്പെട്ട് ആക്രമിക്കപ്പെട്ട നടി ഹൈക്കോടതിയെ സമീപിച്ചു. കോടതിയുടെ നടപടി പലപ്പോഴും പക്ഷപാതപരമാണെന്നും പ്രോസിക്യൂഷന് അവസരം നൽകുന്നില്ലെന്നുമാണ് നടി ഹൈക്കോടതിയിൽ സമർപ്പിച്ച ഹർജിയിൽ പറയുന്നത്. കോടതിയുടെ നടപടിയിൽ സംശയം പ്രകടിപ്പിച്ച് കേസിലെ ഇര തന്നെ രംഗത്തെത്തുന്നത് അപൂർവമാണ്.
വിചാരണയുടെ പേരിൽ പ്രതികൾ തനിക്കെതിരെ നടത്തിയിട്ടുള്ള ചോദ്യം ചെയ്യൽ പീഡനമായി മാറി. ആ ഘട്ടത്തിൽ കാഴ്‌ചക്കാരെ പോലെ നോക്കിയിരിക്കുന്ന സാഹചര്യമാണ് കോടതിയുടെ ഭാഗത്തു നിന്നും ഉണ്ടായത് തുടങ്ങി വിചാരണക്കോടതിയുടെ മേൽ പല സംശയങ്ങൾ പ്രകടിപ്പിച്ചുകൊണ്ടുള്ള ഹർജിയാണ് നടി ഹൈക്കോടതിയിൽ സമർപ്പിച്ചിരിക്കുന്നത്. ഹർജി പിന്നീട് പരിഗണിക്കുമെന്നാണ് അറിയുന്നത്.
നിലവിൽ വിചാരണക്കോടതിയിലെ നടപടികൾ ഏതാണ്ട് നിലച്ച മട്ടിലാണ്. നടി ഹർജിയിൽ ഉന്നയിച്ച അതേകാര്യങ്ങളിൽ പ്രോസിക്യൂഷനും ആശങ്ക അറിയിച്ചിരുന്നു. ഇപ്പോൾ നടി തന്നെ ഇത്തരത്തിൽ ഒരു ഹർജി സമർപ്പിച്ച സ്ഥിതിയ്‌ക്ക് ഹൈക്കോടതിയുടെ ഇടപെടൽ അടിയന്തിരമായി ഉണ്ടാകുമെന്നാണ് സൂചന. മാത്രമല്ല, വരുന്ന ജനുവരിയിൽ നടി ആക്രമിക്കപ്പെട്ട കേസിന്റെ വിചാരണ പൂർത്തിയാക്കി വിധി പറയണമെന്ന കർശന നിർദേശം സുപ്രീം കോടതി പുറപ്പെടുവിച്ചിരുന്നു. രണ്ട് തവണ സമയം നീട്ടി നൽകുകയും ചെയ്ത സാഹചര്യം കൂടി നിലനിൽക്കുമ്പോൾ ഹൈക്കോടതി നടപടികൾക്ക് കൂടുതൽ വേഗം കൈവരും.
