എസ്.പി ബാലസുബ്രഹ്മണ്യത്തിന് ഭാരതരത്നം നൽകണമെന്ന് ആന്ധ്രാ മുഖ്യമന്ത്രി
അമരാവതി: അന്തരിച്ച ഗായകൻ എസ്.പി. ബാലസുബ്രഹ്മണ്യത്തിന് ഭാരതരത്നം നൽകണമെന്ന് ആന്ധ്രാപ്രദേശ് മുഖ്യമന്ത്രി ജഗൻ മോഹൻ റെഡ്ഡി. ഇക്കാര്യം ആവശ്യപ്പെട്ട് ജഗൻ മോഹൻ പ്രധാനമന്ത്രി നരേന്ദ്ര മോദിക്ക് കത്തയച്ചു. സംഗീത രംഗത്ത് പകരം വയ്ക്കാനാകാത്ത ബാലസുബ്രഹ്മണ്യത്തിന്‍റെ വിയോഗം ഇന്ത്യയിലെ ആരാധകർക്കു മാത്രമല്ല ലോകത്തിലെ തന്നെ സംഗീത കൂട്ടായ്മയ്ക്ക് വലിയ നഷ്ടമാണെന്നും ജഗൻമോഹൻ പ്രധാനമന്ത്രിക്ക് എഴുതിയ കത്തിൽ പറയുന്നു.
അന്പതുവർഷത്തോളം നീണ്ട ബാലസുബ്രഹ്മണ്യത്തിന്‍റെ സംഗീത ജീവിതം സംഗീത ലോകത്ത് ചെലുത്തിയ സ്വാധീനം ഏറെ വലുതാണ്. തെലുങ്ക് ,തമിഴ്, കന്നഡ, മലയാളം, ഹിന്ദി തുടങ്ങി നിരവധി ഭാഷകളിലായി നാൽപ്പതിനായിരത്തിലധികം ഗാനങ്ങൾ എസ്പിബി ആലപിച്ചിട്ടുണ്ട്. ആറുതവണ മികച്ച ഗായകനുളള ദേശീയ പുരസ്ക്കാരം നേടിയിട്ടുണ്ട്. 2001ൽ പത്മശ്രീയും 2011ൽ പത്മഭൂഷനും നൽകി രാജ്യം എസ്പിബിയെ ആദരിച്ചിട്ടുണ്ട്.
