ഐഎഎസ് അഴിച്ചുപണി സ്വാഭാവികം; ആരോഗ്യവകുപ്പിലെ പ്രവർത്തനങ്ങളെ ബാധിക്കില്ലെന്ന് മന്ത്രി കെ മുരളീധരൻ
ശാരിക
തിരുവനന്തപുരം: ഐഎഎസ് തലപ്പത്തുണ്ടായ അഴിച്ചുപണിയിൽ അത്ഭുതമൊന്നുമില്ലെന്ന് ആരോഗ്യ മന്ത്രി കെ. മുരളീധരൻ വ്യക്തമാക്കി. ആരോഗ്യവകുപ്പ് സെക്രട്ടറിയെ മാത്രമല്ല, മറ്റ് പല വകുപ്പുകളിലെയും സെക്രട്ടറിമാരെ മാറ്റിയിട്ടുണ്ടെന്നും ഭരണത്തിൽ ഇതൊക്കെ സ്വാഭാവികമായി നടക്കാറുള്ള കാര്യങ്ങളാണെന്നും അദ്ദേഹം പറഞ്ഞു.
ഷർമിള മേരി ജോസഫിന് പകരം എ.പി.എം. മുഹമ്മദ് ഹനീഷ് ആരോഗ്യവകുപ്പ് പ്രിൻസിപ്പൽ സെക്രട്ടറിയായി വരുന്നത് വകുപ്പിലെ പ്രവർത്തനങ്ങളെ ബാധിക്കില്ല. നിലവിലെ ആരോഗ്യ സെക്രട്ടറിക്ക് പകരം ചുമതലയേറ്റതും ഐഎഎസ് ഉദ്യോഗസ്ഥൻ തന്നെയാണ്. സ്ഥലം മാറ്റങ്ങളുമായി ബന്ധപ്പെട്ട് ഒരു കാലത്തും ഐഎഎസ് അസോസിയേഷനുമായി കൂടിയാലോചിക്കാറില്ലെന്നും ഭരണപരമായ ജനറൽ ട്രാൻസ്ഫറുകളുടെ ഭാഗമായി തന്നെയാണ് ഇതും നടന്നതെന്നും അദ്ദേഹം കൂട്ടിച്ചേർത്തു.
ആരോഗ്യവകുപ്പിൽ നിലവിൽ പ്രഖ്യാപിച്ചിട്ടുള്ള അന്വേഷണങ്ങൾ അതിന്റെ വഴിക്ക് തന്നെ നടക്കും. എൻഎച്ച്എം (National Health Mission) കരാർ ജീവനക്കാരുടെ വിഷയത്തിൽ, ജീവനക്കാരെ പിരിച്ചുവിട്ടതല്ലെന്നും അവരുടെ കരാർ കാലാവധി അവസാനിച്ചതാണെന്നും മന്ത്രി വിശദീകരിച്ചു. അതിൽ ന്യായമായ ആവശ്യങ്ങളുള്ള ജീവനക്കാരുടെ കാര്യങ്ങൾ സർക്കാർ പരിഗണിക്കും. പകർച്ചവ്യാധി പ്രതിരോധ പ്രവർത്തനങ്ങളെയോ മറ്റ് പൊതുജനാരോഗ്യ സംവിധാനങ്ങളെയോ ഈ മാറ്റങ്ങൾ ബാധിക്കില്ലെന്നും കെ. മുരളീധരൻ തിരുവനന്തപുരത്ത് വാർത്താ സമ്മേളനത്തിൽ പറഞ്ഞു.
sddf
