ഡയാനയുടെ ഓർമ്മക്കുറിപ്പുകൾ ചർച്ചയാകുന്നു.; ഞെട്ടിക്കുന്ന വെളിപ്പെടുത്തലുമായി സഹോദരന്റെ പുസ്തകം 'സ്വാൻ സോങ്'

ശാരിക

ലണ്ടൻ: അന്തരിച്ച ഡയാന രാജകുമാരിയുമായുള്ള വ്യക്തിപരമായ ബന്ധവും രാജകുടുംബത്തിന്റെ അകത്തളങ്ങളിലെ രഹസ്യങ്ങളും തുറന്നെഴുതി സഹോദരൻ ചാൾസ് സ്പെൻസർ തയ്യാറാക്കിയ ‘സ്വാൻ സോങ്’ എന്ന ഓർമക്കുറിപ്പ് വായനക്കാർക്കിടയിൽ വലിയ തരംഗമാകുന്നു. ഡയാനയുടെ അനുഭവങ്ങൾക്കൊപ്പം തന്റെ ജീവിതത്തിലെ പഴയ അനുഭവങ്ങളും രാജകുടുംബത്തോടുള്ള അമർഷവും പങ്കുവെക്കാനാണ് 400-ലധികം പേജുകളുള്ള ഈ പുസ്തകത്തിലൂടെ അദ്ദേഹം ശ്രമിച്ചിരിക്കുന്നത്.

ഡയാനയുടെ മരണത്തിന് തൊട്ടുപിന്നാലെ അന്നത്തെ പ്രിൻസ് ചാൾസ് ഫോണിൽ വിളിച്ച് ഡയാനയെക്കുറിച്ച് മോശമായി സംസാരിച്ചുവെന്ന വെളിപ്പെടുത്തലാണ് പുസ്തകത്തിലെ പ്രധാന ആകർഷണം. "ആശ്വസിക്കൂ, ഞങ്ങൾ അവളെ ഉടൻ തന്നെ മറന്നുകളയും" എന്ന് ചാൾസ് പരുഷമായി പറഞ്ഞതായി പുസ്തകത്തിൽ ആരോപിക്കുന്നു. ഡയാനയുടെ മരണത്തിന്റെ മുപ്പതാം വാർഷികം അടുത്തിരിക്കെ, മറ്റുള്ളവരുടെ നിയന്ത്രണത്തിലാകാതെ സഹോദരിയുടെ കഥ സ്വന്തം വാക്കുകളിൽ ലോകത്തോട് പറയാനാണ് ഈ പുസ്തകമെഴുതിയതെന്ന് സ്പെൻസർ വ്യക്തമാക്കുന്നു.

വിവാഹത്തിന്റെ തുടക്കം മുതൽ ചാൾസ് രാജാവ് ഡയാനയോട് തണുത്ത ഈഗോയോടെയാണ് പെരുമാറിയതെന്നും, ബന്ധത്തിൽ നിന്ന് പിന്മാറാൻ ഡയാന ആഗ്രഹിച്ചിരുന്നെങ്കിലും കുടുംബ സമ്മർദ്ദം മൂലമാണ് അത് നടക്കാതിരുന്നതെന്നും പുസ്തകം വെളിപ്പെടുത്തുന്നു. മുൻ ഭാര്യമാർ, കുടുംബ സുഹൃത്തുക്കൾ, രണ്ടാനമ്മ റെയിൻ എന്നിവരെക്കുറിച്ചും രാജകുടുംബത്തിലെ ഉന്നതർക്കെതിരെയും രൂക്ഷമായ വിമർശനം ഉയർത്തുമ്പോഴും, ഡയാനക്കൊപ്പമുള്ള ബാല്യകാല ഓർമ്മകളും അമ്മ ഫ്രാൻസിസിനെക്കുറിച്ചുള്ള കാര്യങ്ങളും ഹൃദ്യമായി തന്നെ സ്പെൻസർ വിവരിക്കുന്നുണ്ട്.

ഡയാനയുടെ സംസ്കാര ചടങ്ങിൽ താൻ നടത്തിയ ചരിത്രപ്രസിദ്ധമായ പ്രസംഗത്തെക്കുറിച്ചും, വില്യം, ഹാരി രാജകുമാരന്മാരെ ചേർത്തുനിർത്താൻ രാജകുടുംബം കാണിച്ച നിസ്സംഗതയെക്കുറിച്ചും പുസ്തകത്തിൽ പ്രതിപാദിക്കുന്നുണ്ട്. ചാൾസ് സ്പെൻസറിന്റെ വ്യക്തിപരമായ പരാതികൾ പുസ്തകത്തിലുടനീളം കാണാമെങ്കിലും, ലോകം എന്നും നെഞ്ചിലേറ്റിയ ഡയാന രാജകുമാരിയുടെ ജീവിതത്തിന്റെ മറ്റൊരു വശം അടുത്തറിയാൻ ഈ പുസ്തകം സഹായിക്കുമെന്നാണ് വിലയിരുത്തൽ.