താനോ ഭര്ത്താവോ യുഎഇയില് ഒളിവില് പോയിട്ടില്ലെന്ന് സീരിയല് നടി പ്രസില്ല ജെറിൻ
അജ്മാന്: തങ്ങള്ക്കെതിരെ വ്യാജ വാര്ത്ത പ്രചരിപ്പിക്കുകയാണ്. താനോ ഭര്ത്താവോ യുഎഇയില് ഒളിവില് പോയിട്ടില്ലെന്ന് സീരിയല് നടി പ്രസില്ല ജെറിന്. യുഎഇയില് ഒളിവിലാണെന്നും യാത്രാവിലക്കുണ്ടെന്നുമുള്ള തരത്തില് അടിസ്ഥാന രഹിതമായ വാര്ത്തയാണ് തനിക്കെതിരെ ഒരു ഓൺലൈന് മാധ്യമത്തില് പ്രചരിക്കുന്നതെന്നും എന്ത് അടിസ്ഥാനത്തിലാണെന്ന് ഇത്തരനൊരു വാര്ത്ത നല്കുന്നതെന്ന് അറിയില്ലെന്നും പ്രെസില്ല പറഞ്ഞു. പ്രെസില്ലയുടെ ഭര്ത്താവ് ബിസിനസ് പങ്കാളിക്ക് പണം നല്കാതെ കബളിപ്പിച്ചതിനാൽ യു.എ.ഇയിൽ ഇരുവര്ക്കും യാത്രാ വിലക്കും അറസ്റ്റ് വാറണ്ടുമുണ്ടെന്ന തരത്തിലായിരുന്നു ഒരു ഓൺലൈന് മാധ്യമത്തിൽ വാർത്ത പ്രചരിച്ചത്. പൊതുരംഗത്ത് പ്രത്യക്ഷപ്പെട്ടാൽ നടിയെ അറസ്റ്റ് ചെയ്യുമെന്നും വാർത്തയിലുണ്ടായിരുന്നു. ഇത് നിഷേധിച്ച പ്രെസില്ല ജെറിന്, താനും ഭർത്താവും യു.എ.ഇയുടെ നിയമത്തിൽ നിന്നുകൊണ്ട് ബിസ്സിനസ് നടത്തുന്നവരാണെന്നും വ്യക്തമാക്കി. തങ്ങള് രണ്ടുപേരും ഒളിവിൽ പോയിട്ടില്ല ഇപ്പോഴും യു.എ.ഇയിലെ അജ്മാനിൽ താമസിക്കുന്നുണ്ട്. ആർക്കു വേണമെങ്കിലും തങ്ങളെ എപ്പോൾ വേണമെങ്കിലും കാണാനുമാവും. തനിക്കെതിരെ വ്യാജ വാര്ത്ത നൽകിയ ഓണ്ലൈന് മാധ്യമത്തിനെതിരെ യുഎഇ പോലീസിലും ഇന്ത്യൻ കോൺസുലേറ്റിലും അടുത്തദിവസം പരാതികൊടുക്കുമെന്നും പ്രെസില്ല വ്യക്തമാക്കി.
