വട്ടമേശ സമ്മേളനം ഫസ്റ്റ് ലുക്ക് പോസ്റ്റർ എത്തി!!
തിരുവനന്തപുരം: എട്ടു സംവിധായകർ ചേർന്ന് ഒരുക്കിയ വട്ടമേശ സമ്മേളനം എന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ അണിയറപ്രവർത്തകർ പുറത്തുവിട്ടു. ഇതിന്റെ പോസ്റ്ററിലെ വാചകങ്ങൾ ആണ് സോഷ്യൽ മീഡിയയുടെ ശ്രദ്ധ നേടിയെടുക്കുന്നത്. മലയാളത്തിലെ ഏറ്റവും മോശം സിനിമയുടെ മോശം പോസ്റ്റർ ഇതാ എന്നാണ് പോസ്റ്ററിന്റെ ക്യാപ്ഷൻ. മാത്രമല്ല, കാണേണ്ടവർ റിലീസിന്റെ അന്ന് തന്നെ കാണുക, കാരണം പിറ്റേന്ന് പടം ഉണ്ടാകുമെന്നു യാതൊരു ഉറപ്പുമില്ല എന്നും പോസ്റ്ററിൽ പറയുന്നു. എട്ടു കഥകൾ പറയുന്ന എട്ടു ചിത്രങ്ങൾ ചേർത്ത് ഒരുക്കിയ ഒറ്റ സിനിമയാണ് വട്ടമേശ സമ്മേളനം. വിപിൻ ആറ്റ്ലിയുടെ നേതൃത്വത്തിൽ എട്ടു സംവിധായകർ ഒരുക്കിയ ഈ ചിത്രങ്ങൾ നിർമ്മിച്ചിരിക്കുന്നത് അമരേന്ദ്രൻ ബൈജു ആണ്.സാഗർ വി.എ, വിപിൻ ആറ്റ്ലി, അജു കിഴുമല, അനിൽ ഗോപിനാഥ്, നൗഫസ് നൗഷാദ്, വിജീഷ് എ.സി, ആന്റോ ദേവസ്യാ, സൂരജ് തോമസ് എന്നിവരാണ് ഇതിലെ ചിത്രങ്ങൾ സംവിധാനം ചെയ്തിരിക്കുന്നത്.
ഹോംലി മീൽസ്, ബെൻ എന്നീ ചിത്രങ്ങളിലൂടെ ശ്രദ്ധേയനായ സംവിധായകനും നടനും ആണ് വിപിൻ ആറ്റ്ലി. വട്ടമേശ സമ്മേളനത്തിൽ വിപിൻ ആറ്റ്ലി അഭിനയിക്കുന്നതും, രചിച്ചതും അഭിനയിച്ചതുമായ ചിത്രങ്ങൾ ഉണ്ട്. പാഷാണം ഷാജി, അഞ്ജലി, കെ പി എസ് പടന്നയിൽ, വിപിൻ ആറ്റ്ലി, മോസസ് തോമസ്. ജൂഡ് ആന്റണി ജോസഫ്, മെറീന മൈക്കൽ , ജിബു ജേക്കബ്, സോഹൻ സീനുലാൽ, നോബി, സുധി കോപ്പ എന്നിവരോക്കെ ഇതിൽ അഭിനയിച്ചിട്ടുണ്ട്.
