ഭീകരാക്രമണം : പരിക്കേറ്റ പോലീസുകാർ അപകടനില തരണം ചെയ്തു
മനാമ : ജിദാഫ്സിന് സമീപം പോലീസ് വാഹനത്തിന് നേരെയുണ്ടായ ഭീകരാക്രമണത്തിൽ ഗുരുതരമായി പരിക്കേറ്റ പോലീസുകാർ അപകടനില തരണം ചെയ്തു. തീവ്രവാദി ഗ്രൂപ്പായ വാദ് അല്ലാ ശനിയാഴ്ച നടത്തിയ ആക്രമണത്തിൽ ഒരു ബഹ്‌റൈനി പോലീസുകാരൻ കൊല്ലപ്പെടുകയും എട്ട് പേർക്ക് ഗുരുതരമായി പരിക്കേൽക്കുകയും ചെയ്തതായി ആഭ്യന്തര മന്ത്രാലയം വ്യക്തമാക്കി.
നാടൻ ബോംബ്, ആധുനിക രീതിയിലുള്ള തോക്ക് എന്നിവ ഉപയോഗിച്ച് അക്രമികൾ പോലീസ് വാഹനം ആക്രമിക്കുകയായിരുന്നു. പരിക്കേറ്റ എല്ലാവരും അപകടനില തരണം ചെയ്തതായും ഇവർ റിഫയിലെ സൈനിക ആശുപത്രിയിൽ ചികിത്സയിലാണെന്നും ആഭ്യന്തര മന്ത്രാലയം അറിയിച്ചു. ആക്രമണത്തിൽ കൊല്ലപ്പെട്ട പോലീസുകാരൻ സൽമാൻ അഞ്ജുമിന്റെ സംസ്കാരം തിങ്കളാഴ്ച റിഫയിൽ ഹുനൈനിയാ കബർസ്ഥാനിൽ നടക്കും.
