മനാമയ്ക്ക് പുതുജീവൻ നൽകാൻ കാൽനട ഇടനാഴികൾ; പദ്ധതിക്ക് ക്യാപിറ്റൽ ട്രസ്റ്റീസ് ബോർഡ് അംഗീകാരം

പ്രദീപ് പുറവങ്കര

മനാമ: മനാമയിലെ ചരിത്രപ്രസിദ്ധമായ വ്യാപാര വീഥികളെ കാൽനടയാത്രക്കാർക്ക് മാത്രമുള്ള ഇടനാഴികളാക്കി മാറ്റി പ്രദേശത്തിന് പുതുജീവൻ നൽകാനുള്ള നിർദ്ദേശത്തിന് ക്യാപിറ്റൽ ട്രസ്റ്റീസ് ബോർഡ് ഏകകണ്ഠമായി അംഗീകാരം നൽകി. എന്നാൽ പാർക്കിംഗ് സൗകര്യങ്ങളുടെ അപര്യാപ്തത, വീടുകളിലേക്കും കടകളിലേക്കുമുള്ള പ്രവേശനം തടസ്സപ്പെടൽ എന്നിവയെക്കുറിച്ചുള്ള ആശങ്കകളും, പ്രദേശത്തിന്റെ വിശാലമായ വികസന പദ്ധതികളിൽ നിന്ന് ബോർഡിനെ മാറ്റിനിർത്തുന്നുവെന്ന വിമർശനവും യോഗത്തിൽ ഉയർന്നു.

ബോർഡ് അംഗം മുഹമ്മദ് അൽ അബ്ബാസ് മുന്നോട്ടുവെച്ച നിർദ്ദേശമനുസരിച്ച്, തിരക്കേറിയ ഉച്ചയ്ക്ക് ശേഷവും വൈകുന്നേരങ്ങളിലും തിരഞ്ഞെടുത്ത റോഡുകളിൽ സാധാരണ വാഹന ഗതാഗതം നിരോധിക്കും. അതേസമയം, രാവിലെ സമയങ്ങളിൽ ചരക്ക് നീക്കത്തിനും അടിയന്തര ആവശ്യങ്ങൾക്കുള്ള വാഹനങ്ങൾക്കും പ്രവേശനം അനുവദിക്കും.

ബാബ് അൽ ബഹ്‌റൈൻ അവന്യൂ, ശൈഖ് അബ്ദുള്ള അവന്യൂ, തിജ്ജാർ അവന്യൂ, അൽ മുത്തനബി അവന്യൂ എന്നിവയ്ക്ക് പുറമെ റോഡ് 473, 475, 479 എന്നിവയാണ് കാൽനട ഇടനാഴികളാക്കാൻ നിർദ്ദേശിച്ചിട്ടുള്ളത്. പഴയ സൂഖിൽ നിന്ന് ഗോൾഡ് മാർക്കറ്റിലേക്കും മറ്റ് പരമ്പരാഗത വിപണികളിലേക്കും പോകുന്ന ഇടവഴികളും പദ്ധതിയുടെ പരിധിയിൽ വരും. കാൽനടയാത്രക്കാരുടെ തിരക്ക്, വ്യാപാര പ്രവർത്തനങ്ങൾ, റോഡുകളുടെ അനുയോജ്യത എന്നിവ വിലയിരുത്തിയ ശേഷമായിരിക്കും അന്തിമ തീരുമാനമെടുക്കുക.

എന്നാൽ, വ്യാപാരികൾക്കും താമസക്കാർക്കും ഉപഭോക്താക്കൾക്കും വാഹനങ്ങൾ പാർക്ക് ചെയ്യാൻ മതിയായ സൗകര്യമൊരുക്കാതെ റോഡുകൾ അടയ്ക്കുന്നതിന്റെ പ്രായോഗികതയെ ബോർഡ് വൈസ് ചെയർപേഴ്സൺ ഡോ. ഖുലൂദ് അൽ ഖത്താൻ ചോദ്യം ചെയ്തു. പഴയ സൂഖിൽ നിലവിൽ തന്നെ പാർക്കിംഗ് സൗകര്യം കുറവാണെന്നും, ഉള്ളവയ്ക്ക് ഉയർന്ന നിരക്കാണെന്നും അവർ ചൂണ്ടിക്കാട്ടി.

മനാമയുടെ വിശാലമായ നവീകരണ പ്രവർത്തനങ്ങളിൽ നിന്ന് ക്യാപിറ്റൽ ട്രസ്റ്റീസ് ബോർഡിനെ ഒഴിവാക്കിയതിനെയും ഡോ. അൽ ഖത്താൻ രൂക്ഷമായി വിമർശിച്ചു. വിവിധ സർക്കാർ-സ്വകാര്യ ഏജൻസികൾ പദ്ധതിയുടെ ഭാഗമാണെങ്കിലും, ഇതുവരെ എന്തൊക്കെ പ്രവർത്തനങ്ങൾ നടന്നു എന്നതിനെക്കുറിച്ച് ബോർഡ് അംഗങ്ങൾക്ക് യാതൊരു അറിവുമില്ലെന്ന് അവർ പറഞ്ഞു.

കുവൈറ്റിലെ 'സൂഖ് അൽ മുബാറക്കിയ' പോലെ പഴയ വിപണികളെ കാൽനടയാത്രക്കാർക്കായി തുറന്നുകൊടുത്ത് വിജയിപ്പിക്കാൻ സാധിക്കുമെങ്കിലും, മനാമയിൽ റോഡുകൾ അടയ്ക്കുന്നതിന് മുൻപ് കൃത്യമായ പാർക്കിംഗ് സൗകര്യം ഉറപ്പാക്കണമെന്ന് അവർ ആവശ്യപ്പെട്ടു.

#BahrainNews #OldManama #ManamaSouq #BahrainDevelopment