വൈദ്യുതി വിവാദത്തിൽ സമവായം; തർക്കങ്ങൾക്കൊടുവിൽ പുതിയ കരാർ സാധ്യതകൾ തേടാൻ ധാരണ

ഷീബ വിജയൻ

തിരുവനന്തപുരം: സംസ്ഥാന രാഷ്ട്രീയത്തിൽ വലിയ കോളിളക്കം സൃഷ്ടിച്ച വൈദ്യുതി പർച്ചേസ് വിവാദം ഒടുവിൽ സമവായത്തിലേക്ക്. മുഖ്യമന്ത്രിയുടെ അധ്യക്ഷതയിൽ ക്ലിഫ് ഹൗസിൽ ചേർന്ന ഉന്നതതല യോഗത്തിലാണ് വിഷയത്തിൽ അന്തിമ തീരുമാനമായത്. മന്ത്രിമാരായ സണ്ണി ജോസഫും രമേശ് ചെന്നിത്തലയും ചർച്ചയിൽ പങ്കെടുത്തു. കെഎസ്‌ഇബി എംഡിയുമായി മുഖ്യമന്ത്രി രഹസ്യ ചർച്ച നടത്തിയെന്ന പ്രചാരണങ്ങൾ അദ്ദേഹം തള്ളിക്കളഞ്ഞു. ഉദ്യോഗസ്ഥരുമായി നടത്തിയ ഔദ്യോഗിക യോഗത്തിന് ശേഷമാണ് കൂടിക്കാഴ്ച നടന്നതെന്നും അദ്ദേഹം വ്യക്തമാക്കി. നിലവിൽ സംസ്ഥാനത്ത് വൈദ്യുതി പ്രതിസന്ധിയില്ലെന്നും അടുത്ത രണ്ട് മാസത്തേക്ക് പുറത്തുനിന്ന് വൈദ്യുതി വാങ്ങേണ്ട അടിയന്തര സാഹചര്യമില്ലെന്നും ഉദ്യോഗസ്ഥർ യോഗത്തെ അറിയിച്ചിട്ടുണ്ട്. മന്ത്രി സണ്ണി ജോസഫ് ചർച്ചയിൽ യാതൊരുവിധ എതിർപ്പുകളും ഉന്നയിച്ചിട്ടില്ലെന്നും മുഖ്യമന്ത്രി അറിയിച്ചു.

അതേസമയം, വരാനിരിക്കുന്ന മാസങ്ങളിലെ വൈദ്യുതി ആവശ്യം മുൻകൂട്ടി കണ്ട് പുതിയ കരാറുകൾ ഒപ്പിടുന്നതിനുള്ള സാധ്യതാ പഠനങ്ങൾ നടത്താനും യോഗത്തിൽ ധാരണയായി. ബോർഡ്-കോർപറേഷൻ യോഗത്തിനിടയിലാണ് വൈദ്യുതി പർച്ചേസ് വിവാദം ആദ്യം ഉയർന്നുവന്നത്. ജിഎൻഎയുമായുള്ള വൈദ്യുതി കരാർ റദ്ദാക്കിയതും ഹിമാചലിൽ നിന്ന് വൈദ്യുതി വാങ്ങാൻ ശ്രമിച്ചതുമാണ് വലിയ രാഷ്ട്രീയ വിവാദങ്ങൾക്ക് തിരികൊളുത്തിയത്. കരാർ പിൻവലിച്ച വിവരം മാധ്യമങ്ങളിലൂടെയാണ് അറിഞ്ഞതെന്ന മന്ത്രി സണ്ണി ജോസഫിന്റെ പരസ്യ പ്രതികരണം മുന്നണിയിലും സർക്കാരിലും വലിയ ചർച്ചയായിരുന്നു. വൈദ്യുതി ബോർഡിന്റെ നിർണായക തീരുമാനങ്ങൾ തന്നെ അറിയിക്കാതെയാണ് ഉദ്യോഗസ്ഥർ മുന്നോട്ടുപോയതെന്ന മന്ത്രിയുടെ അതൃപ്തിയും ഇതിലൂടെ പരസ്യമായി. ബോർഡ് ചെയർമാനും ഊർജ സെക്രട്ടറിയും നേരിട്ട് മുഖ്യമന്ത്രിയുമായി ചർച്ച നടത്തിയാണ് തീരുമാനങ്ങൾ എടുത്തതെന്ന വാർത്തകളിൽ നിന്നാണ് താൻ കാര്യം മനസ്സിലാക്കിയതെന്നായിരുന്നു മന്ത്രിയുടെ വിശദീകരണം. എന്നാൽ ബോർഡ് അയച്ച ഫയൽ മന്ത്രി തന്നെയാണ് പരിശോധനയ്ക്കായി കൈമാറിയതെന്നും, തീരുമാനങ്ങൾ എടുത്ത ശേഷം തിരികെ ലഭിച്ച ഫയൽ മന്ത്രി വീണ്ടും ബോർഡിന് തന്നെ അയച്ചുകൊടുത്തിട്ടുണ്ടെന്നും മുഖ്യമന്ത്രി വ്യക്തമാക്കി.