കുട്ടികളുടെ സോഷ്യൽ മീഡിയ ഉപയോഗം: പ്രായപരിധി അടിസ്ഥാനമാക്കിയുള്ള പരിശോധനകൾക്ക് സാധ്യത; ബില്ല് ബഹ്റൈൻ പാർലമെന്റിൽ

പ്രദീപ് പുറവങ്കര

മനാമ: കുട്ടികളുടെ ഓൺലൈൻ സുരക്ഷ ഉറപ്പാക്കുന്നതിന്റെ ഭാഗമായി, സോഷ്യൽ മീഡിയ അക്കൗണ്ടുകളിൽ പ്രായം അടിസ്ഥാനമാക്കിയുള്ള കർശന പരിശോധനകൾ കൊണ്ടുവരാനുള്ള നിയമഭേദഗതി ബിൽ പാർലമെന്റിന്റെ അടുത്ത സമ്മേളനം ചർച്ച ചെയ്യും.

കുട്ടികൾ എങ്ങനെ സോഷ്യൽ മീഡിയയിൽ അക്കൗണ്ട് തുറക്കണം, ഓൺലൈൻ സേവനങ്ങൾ ഉപയോഗിക്കണം, ഡിജിറ്റൽ പ്ലാറ്റ്‌ഫോമുകളിൽ ഇടപഴകണം എന്നിവ പ്രായത്തിന്റെയും മാതാപിതാക്കളുടെ മേൽനോട്ടത്തിന്റെയും അടിസ്ഥാനത്തിൽ തീരുമാനിക്കാൻ അധികാരികൾക്ക് പുതിയ നിയമം അധികാരം നൽകും. 2012 ലെ ശിശു നിയമത്തിലെ 39-ാം ആർട്ടിക്കിളിൽ വരുത്തേണ്ട ഈ ഭേദഗതിക്ക് പാർലമെന്റിന്റെ സർവീസസ് കമ്മിറ്റി ഏകകണ്ഠമായ പിന്തുണയാണ് നൽകിയിരിക്കുന്നത്.

ഇൻസ്റ്റാഗ്രാം, ടിക്ക്ടോക്ക്, ഫേസ്ബുക്ക് എന്നിവയ്ക്ക് പുറമെ വാട്സാപ്പ്, സ്നാപ്ചാറ്റ്, ഓൺലൈൻ ഗെയിമുകൾ എന്നിവയും ഈ നിയമപരിധിയിൽ ഉൾപ്പെട്ടേക്കാം. പുതിയ അക്കൗണ്ടുകൾ തുറക്കുന്നത് മാത്രമല്ല, കുട്ടികൾ ഓൺലൈനിൽ പോസ്റ്റുകൾ ഇടുന്നതും ചാറ്റ് ചെയ്യുന്നതും പരസ്പരം സംവദിക്കുന്നതുമെല്ലാം ഇതിന്റെ പരിധിയിൽ വരും.

എന്നാൽ, ബില്ലിൽ പ്രത്യേകമായി കുറഞ്ഞ പ്രായപരിധി വ്യക്തമാക്കുകയോ, കുട്ടികളെ സോഷ്യൽ മീഡിയയിൽ നിന്ന് പൂർണ്ണമായി വിലക്കുകയോ ചെയ്യുന്നില്ല. മാത്രമല്ല, നിയമങ്ങൾ ലംഘിച്ചാൽ ഉള്ള ശിക്ഷകളെക്കുറിച്ചോ പിഴകളെക്കുറിച്ചോ ബില്ലിൽ പരാമർശവുമില്ല. നിയമങ്ങൾ എങ്ങനെ നടപ്പിലാക്കണമെന്ന് തീരുമാനിക്കാനുള്ള പൂർണ്ണ അധികാരം അതോറിറ്റികൾക്ക് വിട്ടുകൊടുത്തിരിക്കുകയാണ്. പല പ്ലാറ്റ്‌ഫോമുകളിലും നിലവിൽ പ്രായപരിധി ഉണ്ടെങ്കിലും കുട്ടികൾ അത് എളുപ്പത്തിൽ മറികടക്കുന്നുണ്ടെന്ന് നിയമോപദേശകർ ചൂണ്ടിക്കാണിക്കുന്നുണ്ട്. വ്യക്തമായ ശിക്ഷാ നടപടികളില്ലാത്തത് നിയമം നടപ്പിലാക്കുന്നതിൽ വെല്ലുവിളിയാകുമെന്ന സംശയവും ഉയരുന്നുണ്ട്.

കുട്ടികളെ ഡിജിറ്റൽ ചൂഷണങ്ങളിൽ നിന്നും ദോഷകരമായ വസ്തുക്കളിൽ നിന്നും സംരക്ഷിക്കുക, ഓൺലൈനിൽ അവർ കാണുന്ന കാര്യങ്ങളിലും ചെയ്യുന്ന കാര്യങ്ങളിലും മാതാപിതാക്കൾക്ക് കൂടുതൽ നിയന്ത്രണം നൽകുക എന്നിവയാണ് ഈ പുതിയ നിയമനിർമ്മാണത്തിന്റെ പ്രധാന ലക്ഷ്യങ്ങൾ.

ചൈൽഡ്ഹുഡ് ഡെവലപ്‌മെൻ്റിനായുള്ള ബഹ്‌റൈനി സൊസൈറ്റി ഈ ഭേദഗതിയെ പൂർണ്ണമായി സ്വാഗതം ചെയ്തു. അക്കൗണ്ട് രജിസ്‌ട്രേഷനിൽ മാതാപിതാക്കളുടെ കൃത്യമായ മേൽനോട്ടം വേണമെന്നും, 13 വയസ്സിന് താഴെയുള്ള കുട്ടികളുടെ കാര്യത്തിൽ കൂടുതൽ കർശന പരിശോധനകൾ ഏർപ്പെടുത്തണമെന്നും സൊസൈറ്റി ആവശ്യപ്പെട്ടു. കൂടാതെ, കുട്ടികളുടെ സ്ക്രീൻ ടൈം പരിമിതപ്പെടുത്തണമെന്നും, ഓൺലൈൻ അപകടങ്ങളെ തിരിച്ചറിയാനും സ്വയം പ്രതിരോധിക്കാനും സ്കൂളുകൾ കുട്ടികളെ പഠിപ്പിക്കണമെന്നും അവർ നിർദ്ദേശിച്ചു. വിഷയത്തിൽ സാമൂഹിക വികസന മന്ത്രാലയം ഇതുവരെ ഔദ്യോഗിക നിലപാട് വ്യക്തമാക്കിയിട്ടില്ല.