ഇന്ത്യൻ സ്‌കൂൾ ജൂനിയർ കാമ്പസിൽ വൃക്ഷത്തൈ നടീൽ വാരം ആഘോഷിച്ചു

പ്രദീപ് പുറവങ്കര

മനാമ: കുട്ടികളിൽ പരിസ്ഥിതി അവബോധവും പ്രകൃതി സ്നേഹവും വളർത്തുന്നതിനായി ഇന്ത്യൻ സ്കൂൾ ബഹ്റൈൻ (ISB) ജൂനിയർ കാമ്പസിൽ ദേശീയ വൃക്ഷത്തൈ നടീൽ വാരം വിപുലമായ പരിപാടികളോടെ ആഘോഷിച്ചു.

2035-ഓടെ 3.6 ദശലക്ഷം മരങ്ങൾ നട്ടുപിടിപ്പിക്കാൻ ലക്ഷ്യമിടുന്ന ദേശീയ വനവൽക്കരണ പദ്ധതിയിലൂടെ പരിസ്ഥിതി സുസ്ഥിരതയ്ക്കുള്ള ബഹ്റൈന്റെ പ്രതിബദ്ധതയും, 2060-ഓടെ നെറ്റ്-സീറോ കാർബൺ ന്യൂട്രാലിറ്റി കൈവരിക്കുക എന്ന രാജ്യത്തിന്റെ ദർശനവും അടിവരയിടുന്നതായിരുന്നു സ്കൂളിലെ ആഘോഷങ്ങൾ. ഹരിത ഇടങ്ങൾ സംരക്ഷിക്കുന്നതിന്റെയും പ്രകൃതിവിഭവങ്ങൾ സംരക്ഷിക്കുന്നതിന്റെയും ആവശ്യകത പരിപാടി എടുത്തുകാട്ടി.

സ്കൂൾ വൈസ് ചെയർമാനും എച്ച്.എസ്.എസ്.സി അംഗവുമായ ഡോ. മുഹമ്മദ് ഫൈസൽ, സെക്രട്ടറി വി. രാജപാണ്ഡ്യൻ എന്നിവർ ചടങ്ങുകൾക്ക് നേതൃത്വം നൽകി. അസിസ്റ്റന്റ് സെക്രട്ടറിയും അക്കാദമിക് അംഗവുമായ രഞ്ജിനി മോഹൻ, പ്രോജക്ട്സ് ആൻഡ് മെയിന്റനൻസ് അംഗം മിഥുൻ മോഹൻ, പ്രിൻസിപ്പൽ ശാന്ത കുമാർ ദസരി, ജൂനിയർ വിംഗ് പ്രിൻസിപ്പൽ പമേല സേവ്യർ, വൈസ് പ്രിൻസിപ്പൽ പ്രിയ ലാജി എന്നിവരും സന്നിഹിതരായിരുന്നു.

കാമ്പസിന്റെ വിവിധ ഭാഗങ്ങളിൽ നടന്ന വൃക്ഷത്തൈ നടീൽ ഡ്രൈവിൽ പ്രധാന അധ്യാപകർ, കോർഡിനേറ്റർമാർ, സ്റ്റാഫ് അംഗങ്ങൾ, പ്രിഫെക്റ്റ് കൗൺസിൽ അംഗങ്ങൾ, വിദ്യാർത്ഥികൾ എന്നിവർ പങ്കാളികളായി.

വിദ്യാർത്ഥികളെ പരിസ്ഥിതി സംരക്ഷണത്തിന്റെ പ്രാധാന്യം ബോധ്യപ്പെടുത്താൻ പ്രത്യേക അസംബ്ലിയും മരങ്ങളുടെ പാരിസ്ഥിതിക നേട്ടങ്ങൾ വിവരിക്കുന്ന വീഡിയോ പ്രദർശനവും ഒരുക്കിയിരുന്നു. ഹെഡ് ഗേൾ യാന ഫെബിഷ് ദേശീയ വൃക്ഷ വാരത്തിന്റെ പ്രാധാന്യം വ്യക്തമാക്കുന്ന പ്രസംഗം നടത്തി.

ജൂനിയർ വിംഗ് നേച്ചർ ക്ലബ് സ്കൂളിലേക്ക് നിരവധി ചെടികൾ സംഭാവന നൽകി. പോസ്റ്ററുകൾ, പ്രസംഗങ്ങൾ, സംഗീത അവതരണം എന്നിവയോടെ ആഘോഷങ്ങൾ ശ്രദ്ധേയമായി. ഇത്തരമൊരു സംരംഭത്തിലൂടെ പരിസ്ഥിതി ഉത്തരവാദിത്തമുള്ള പൗരന്മാരെ വളർത്തിയെടുക്കാനും സുസ്ഥിരമായ ഭാവിയിലേക്ക് സംഭാവന നൽകാൻ യുവതലമുറയെ പ്രചോദിപ്പിക്കാനും സാധിക്കുമെന്ന് സ്കൂൾ ചെയർമാൻ അഡ്വ. ബിനു മണ്ണിൽ വർഗീസ് അഭിപ്രായപ്പെട്ടു.