ഡിജിറ്റൽ പണമിടപാട് ആപ്പുകൾ ദുരുപയോഗം ചെയ്യുന്നു: അടിയന്തര നടപടി വേണമെന്ന് ബഹ്‌റൈനിൽ എം.പിമാർ

പ്രദീപ് പുറവങ്കര

മനാമ: ബില്ലുകൾ എളുപ്പത്തിൽ അടയ്ക്കുന്നതിനായി തയ്യാറാക്കിയ ഡിജിറ്റൽ പണമിടപാട് ആപ്പുകൾ വ്യക്തിപരമായ ഉപദ്രവങ്ങൾക്കുള്ള മാർഗ്ഗമായി മാറുന്നതായി പരാതി. ബ്ലോക്ക് ചെയ്ത ആളുകൾക്ക് വീണ്ടും സന്ദേശങ്ങളും പണമിടപാട് അഭ്യർത്ഥനകളും അയക്കുന്നത് തടയാൻ അടിയന്തര നടപടി സ്വീകരിക്കണമെന്ന് ബഹ്‌റൈൻ പാർലമെന്റിലെ എം.പിമാർ ആവശ്യപ്പെട്ടു. ബഹ്‌റൈനിലെ പ്രമുഖ ഡിജിറ്റൽ പണമിടപാട് ആപ്പായ ബെനിഫിറ്റ് പേയിലെ (BenefitPay) ഫൗരി പ്ലസ് (Fawri+), സ്പ്ലിറ്റ് ബിൽ റിക്വസ്റ്റുകൾ എന്നിവയാണ് ഇതിനായി ദുരുപയോഗം ചെയ്യുന്നത്. യഥാർത്ഥത്തിൽ പണം കൈമാറാതെ തന്നെ പേയ്മെന്റ് റിക്വസ്റ്റുകൾ അയക്കാൻ ഈ ഫീച്ചറുകൾ വഴി സാധിക്കും.

ഫോണിലും സോഷ്യൽ മീഡിയ പ്ലാറ്റ്‌ഫോമുകളിലും ബ്ലോക്ക് ചെയ്യപ്പെട്ട വ്യക്തികൾ മറ്റുള്ളവരെ ബന്ധപ്പെടാനുള്ള 'പിൻവാതിൽ സന്ദേശ സേവനമായി' ഈ ആപ്പിനെ ദുരുപയോഗം ചെയ്യുകയാണെന്ന് ജനപ്രതിനിധികൾ ചൂണ്ടിക്കാട്ടി. ഒരാൾ ബ്ലോക്ക് ചെയ്താൽ ആ വ്യക്തിയിലേക്ക് ഇത്തരം റിക്വസ്റ്റുകൾ പോകുന്നത് പൂർണ്ണമായും തടയണമെന്നും, ലഭിക്കുന്ന അനാവശ്യ റിക്വസ്റ്റുകൾ വെറുതെ 'റിജക്റ്റ്' ചെയ്യുന്നതിന് പകരം പൂർണ്ണമായി ഡിലീറ്റ് ചെയ്യാനുള്ള ഓപ്ഷൻ ഉപഭോക്താക്കൾക്ക് നൽകണമെന്നും എം.പിമാർ ആവശ്യപ്പെടുന്നു.

പാർലമെന്റിന്റെ സാമ്പത്തിക കാര്യ സമിതി ചെയർമാൻ അഹമ്മദ് അൽ സല്ലൂം ഇത് കേവലം ഒരു നിസ്സാര പ്രശ്നമല്ലെന്ന് വ്യക്തമാക്കി. ടെലികമ്മ്യൂണിക്കേഷൻസ് റെഗുലേറ്ററി അതോറിറ്റി, ബെനിഫിറ്റ് കമ്പനി, ആഭ്യന്തര മന്ത്രാലയം എന്നിവർക്ക് ഇതുസംബന്ധിച്ച് നിരവധി പരാതികൾ ലഭിച്ചിട്ടുണ്ട്. തുടർച്ചയായി അപകീർത്തികരമായ സന്ദേശങ്ങളോടെ നൂറിലധികം റിക്വസ്റ്റുകൾ ലഭിച്ച സംഭവങ്ങളും, മുൻ പങ്കാളി കുടുംബത്തിൽ പ്രശ്നങ്ങൾ ഉണ്ടാക്കാൻ വേണ്ടി ആപ്പ് വഴി നിരന്തരം ശല്യം ചെയ്ത സംഭവങ്ങളും അദ്ദേഹം ചൂണ്ടിക്കാട്ടി. ഒരു വ്യക്തിയെ ബ്ലോക്ക് ചെയ്യുന്നത് വീണ്ടും ബന്ധപ്പെടാതിരിക്കാനാണെന്നും പണമിടപാടിന്റെ പേരിൽ മറ്റൊരു വഴി തുറന്നുകിടക്കുന്നത് അംഗീകരിക്കാനാവില്ലെന്നും അദ്ദേഹം കൂട്ടിച്ചേർത്തു.

എം.പിമാരുടെ ഈ ആശങ്കകളെ സമിതി വൈസ് ചെയർപേഴ്സൺ സൈനബ് അബ്ദുൽ അമീറും പിന്തുണച്ചു. ഡിജിറ്റൽ സേവനങ്ങൾ സുരക്ഷിതമായിരിക്കണമെന്നും വ്യക്തികളെ ഉപദ്രവിക്കാനും ഭയപ്പെടുത്താനും സാങ്കേതികവിദ്യ ഉപയോഗിച്ചാൽ അതിനെതിരെ കടുത്ത സുരക്ഷാ മാനദണ്ഡങ്ങൾ വേണമെന്നും അവർ വ്യക്തമാക്കി. അഹമ്മദ് അൽ സല്ലൂം ഉൾപ്പെടെ അഞ്ച് എം.പിമാർ സമർപ്പിച്ച നിർദ്ദേശം നിലവിൽ പാർലമെന്റ് സമിതിയുടെ പരിഗണനയിലാണ്.

എന്നാൽ ഇടപാടുകളായി തരംതിരിച്ചിരിക്കുന്ന ഒരു കാര്യവും നിലവിൽ സിസ്റ്റത്തിൽ നിന്ന് നീക്കം ചെയ്യാൻ കഴിയില്ലെന്നാണ് ബെനിഫിറ്റ് കമ്പനി വ്യക്തമാക്കിയത്. എങ്കിലും എം.പിമാർ ഉന്നയിച്ച പ്രശ്നങ്ങൾക്ക് പരിഹാരം കാണാൻ ശ്രമിക്കുമെന്ന് കമ്പനി ഉറപ്പുനൽകിയിട്ടുണ്ട്. സേവനത്തിന്റെ സൗകര്യങ്ങൾ നഷ്ടപ്പെടാതെ തന്നെ ഈ ദുരുപയോഗ loophole അടയ്ക്കുകയാണ് ലക്ഷ്യം. വരാനിരിക്കുന്ന പാർലമെന്റ് സമ്മേളനത്തിൽ വിഷയം ചർച്ച ചെയ്യും. ഈ വർഷം ജനുവരി മുതൽ ജൂൺ വരെയുള്ള കാലയളവിൽ 540 കോടി ബഹ്‌റൈനി ദിനാർ മൂല്യമുള്ള 24.6 കോടി ഇടപാടുകളാണ് ബെനിഫിറ്റ് പേ വഴി നടന്നത്.