അനധികൃത വർക്ക്ഷോപ്പുകൾക്കും വെയർഹൗസുകൾക്കുമെതിരെ നടപടി വേണമെന്ന് ആവശ്യപ്പെട്ട് ഹമദ് ടൗൺ പ്രദേശവാസികൾ
പ്രദീപ് പുറവങ്കര
മനാമ: ഹമദ് ടൗണിലെ ബ്ലോക്ക് 1209-ൽ നിർമ്മാണം പൂർത്തിയാകാത്ത റസിഡൻഷ്യൽ പ്ലോട്ടുകൾ അനധികൃത വർക്ക്ഷോപ്പുകളായും വെയർഹൗസുകളായും ഉപയോഗിക്കുന്നതിനെതിരെ പ്രദേശവാസികൾ രംഗത്ത്. ഇത് സംബന്ധിച്ചുണ്ടാകുന്ന ബഹളം, വലിയ ട്രക്കുകളുടെയും യന്ത്രങ്ങളുടെയും സാന്നിധ്യം, പരിസ്ഥിതി-സുരക്ഷാ ഭീഷണികൾ എന്നിവ ചൂണ്ടിക്കാട്ടി നിരവധി പരാതികൾ ലഭിച്ചതായി നോർത്തേൺ ഗവേണറേറ്റ് മുൻസിപ്പൽ കൗൺസിൽ അംഗം അബ്ദുള്ള മുബാറക് അൽ ഖുബൈസി വ്യക്തമാക്കി.
പാർപ്പിട മേഖലകളിൽ ചരക്കുകൾ കയറ്റാനും ഇറക്കാനുമായി വലിയ ട്രക്കുകൾ പ്രവേശിക്കുന്നത് കാൽനടയാത്രക്കാർക്കും കുട്ടികൾക്കും കടുത്ത സുരക്ഷാ ഭീഷണിയാണ് ഉയർത്തുന്നത്. കൂടാതെ, ഭാരമേറിയ വാഹനങ്ങൾ സഞ്ചരിക്കുന്നത് ഈ പ്രദേശങ്ങളിലെ ആന്തരിക റോഡുകൾക്കും അടിസ്ഥാന സൗകര്യങ്ങൾക്കും കേടുപാടുകൾ വരുത്തുന്നുണ്ടെന്നും അൽ ഖുബൈസി മുന്നറിയിപ്പ് നൽകി.
പ്രശ്നം പരിഹരിക്കുന്നതിനായി മുൻസിപ്പൽ, വാണിജ്യ, ഭവന, പരിസ്ഥിതി മേഖലകളിലെ അധികാരികളുമായി അൽ ഖുബൈസി ബന്ധപ്പെടുകയും ഈ സ്ഥലങ്ങളിൽ അടിയന്തര പരിശോധന നടത്താൻ ആവശ്യപ്പെടുകയും ചെയ്തു. അനധികൃത പ്രവർത്തനങ്ങൾ കണ്ടെത്തി ഉടൻ തന്നെ ഒഴിപ്പിക്കൽ നോട്ടീസ് നൽകണമെന്ന് ആവശ്യപ്പെട്ട അദ്ദേഹം, താമസക്കാരുടെ സുരക്ഷയും ജീവിതസൗകര്യങ്ങളും സംരക്ഷിക്കാൻ അടിയന്തര നടപടി വേണമെന്നും ആവശ്യപ്പെട്ടു.
zfdf
