വൈഫൈ, ബ്ലൂടൂത്ത് ഉപകരണങ്ങൾക്ക് ബഹ്‌റൈനിൽ ലൈസൻസ് വേണ്ട; നിയന്ത്രണങ്ങൾ ലംഘിച്ചാൽ കർശന നടപടി

പ്രദീപ് പുറവങ്കര

മനാമ: ബഹ്‌റൈനിൽ പൊതുജനങ്ങൾക്കും ഘടകസ്ഥാപനങ്ങൾക്കും വൈഫൈ, ബ്ലൂടൂത്ത് തുടങ്ങിയ കുറഞ്ഞ ശേഷിയുള്ള വയർലെസ് ഉപകരണങ്ങൾ വ്യക്തിഗത സ്പെക്ട്രം ലൈസൻസോ ഫീസോ ഇല്ലാതെ തുടർന്നും ഉപയോഗിക്കാമെന്ന് ടെലികമ്യൂണിക്കേഷൻസ് റെഗുലേറ്ററി അതോറിറ്റി (TRA) വ്യക്തമാക്കി. എന്നാൽ, അനുവദനീയമായ പരിധിയിൽ കൂടുതൽ ശേഷിയിൽ പ്രവർത്തിക്കുകയോ മറ്റ് ലൈസൻസ്ഡ് സേവനങ്ങൾക്കു തടസ്സം സൃഷ്ടിക്കുകയോ ചെയ്യുന്ന ഉപകരണങ്ങൾക്കെതിരെ കടുത്ത നിയമനടപടികളും പിഴയും നേരിടേണ്ടിവരും.

ലൈസൻസ് ഇളവുകളുള്ള റേഡിയോ സ്പെക്ട്രം സംബന്ധിച്ച് നിലപാട് വ്യക്തമാക്കിക്കൊണ്ട് ടി.ആർ.എ പുറപ്പെടുവിച്ച പുതിയ നിയമാവലിയിലാണ് കാര്യങ്ങൾ വിശദീകരിക്കുന്നത്. വൈഫൈ, ബ്ലൂടൂത്ത് കൂടാതെ സ്മാർട്ട് സിറ്റി സംവിധാനങ്ങളിലും മറ്റ് ഇലക്ട്രോണിക് ഉപകരണങ്ങളിലും ഉപയോഗിക്കുന്ന സിഗ്ബി (Zigbee), ലോ-പവർ വൈഡ് ഏരിയ നെറ്റ്‌വർക്കുകൾ (LPWAN) എന്നിവയ്ക്കും പുതിയ മാനദണ്ഡങ്ങൾ ബാധകമാണ്.

ടെലികമ്യൂണിക്കേഷൻസ് നിയമത്തിലെ ആർട്ടിക്കിൾ 43 അനുസരിച്ചാണ് സാങ്കേതിക മാനദണ്ഡങ്ങൾ പാലിക്കുന്ന ഉപകരണങ്ങൾക്ക് സ്പെക്ട്രം ലൈസൻസ് ഒഴിവാക്കി നൽകുന്നത്. നിർദ്ദിഷ്ട ഫ്രീക്വൻസിയിലും ട്രാൻസ്മിഷൻ പവർ പരിധിയിലും പ്രവർത്തിക്കുന്ന അംഗീകൃത ഉപകരണങ്ങൾക്ക് ഉപയോക്താക്കൾ പ്രത്യേക ഫീസോ ലൈസൻസോ നൽകേണ്ടതില്ല.

അതേസമയം, ലൈസൻസ് ഇളവുണ്ടെങ്കിലും ഈ ഉപകരണങ്ങൾ നിരീക്ഷണത്തിലായിരിക്കും. മറ്റ് അംഗീകൃത നെറ്റ്‌വർക്കുകൾക്ക് തടസ്സമുണ്ടാക്കുന്നതായി കണ്ടെത്തിയാൽ ഉപകരണം പ്രവർത്തിപ്പിക്കുന്നത് ഉടൻ നിർത്താൻ ടി.ആർ.എ ആവശ്യപ്പെടും. സാങ്കേതിക മാനദണ്ഡങ്ങൾ ലംഘിക്കുന്ന ഉപകരണങ്ങൾ കണ്ടുകെട്ടാനും മുന്നറിയിപ്പുകളില്ലാതെ ഉയർന്ന പിഴ ചുമത്താനും അതോറിറ്റിക്ക് അധികാരമുണ്ട്.

ജി.പി.എസ് (GPS), സാറ്റലൈറ്റ് ടെലിവിഷൻ റിസീവറുകൾ, ഇൻഡസ്ട്രിയൽ, സയന്റിഫിക്, മെഡിക്കൽ ആവശ്യങ്ങൾക്കുള്ള ചില കുറഞ്ഞ ശേഷിയുള്ള ഉപകരണങ്ങൾ എന്നിവയും ഈ ലൈസൻസ് രഹിത വിഭാഗത്തിൽ പെടുന്നു. രാജ്യത്ത് ഇറക്കുമതി ചെയ്യുന്നതും വിൽക്കുന്നതുമായ ഇത്തരം റേഡിയോ ഉപകരണങ്ങൾക്ക് ടി.ആർ.എയുടെ മുൻകൂർ ടൈപ്പ് അപ്രൂവൽ നിർബന്ധമാണ്. എന്നാൽ വ്യക്തിഗത ആവശ്യങ്ങൾക്കായി വിദേശത്തുനിന്ന് കൊണ്ടുവരുന്ന ഉപകരണങ്ങൾക്ക് ഇതിൽ ഇളവ് അനുവദിച്ചിട്ടുണ്ട്. സാങ്കേതികവിദ്യയുടെയും വിപണിയുടെയും വളർച്ചയ്ക്ക് അനുസരിച്ച് ഈ ചട്ടങ്ങളിൽ മാറ്റങ്ങൾ വരുത്തുമെന്നും ടി.ആർ.എ അറിയിച്ചു.