വാദി അൽ-ബുഹൈർ പൊതുജനങ്ങൾക്കായി വിലക്കിയിട്ടില്ലെന്ന് നഗരസഭാ കൗൺസിൽ ചെയർമാൻ
പ്രദീപ് പുറവങ്കര
മനാമ: സമീപകാലത്ത് നിരവധി പേരെ ആകർഷിച്ച വാദി അൽ-ബുഹൈറിലേക്ക് പൊതുജനങ്ങൾക്കുള്ള പ്രവേശനം വിലക്കിയിട്ടില്ലെന്ന് തെക്കൻ നഗരസഭാ കൗൺസിൽ ചെയർമാൻ അബ്ദുള്ള അബ്ദുൽ ലത്തീഫ് വ്യക്തമാക്കി. താഴ്വരയിലേക്കുള്ള പ്രവേശനത്തെക്കുറിച്ച് ആശങ്കകൾ ഉയർന്ന പശ്ചാത്തലത്തിലാണ് അദ്ദേഹത്തിന്റെ പ്രതികരണം. പ്രദേശത്ത് ഫോട്ടോഗ്രാഫർമാർക്കും സന്ദർശകർക്കും തടസ്സമില്ലാതെ പ്രവേശിക്കാമെന്നും, കടുത്ത വേനൽച്ചൂട് കാരണമാണ് കഴിഞ്ഞ മാസങ്ങളിൽ ആളുകളുടെ വരവ് കുറഞ്ഞതെന്നും അദ്ദേഹം കൂട്ടിച്ചേർത്തു.
കിഴക്കൻ റിഫയ്ക്കും സനദിനും ഇടയിൽ സ്ഥിതി ചെയ്യുന്ന ഈ പ്രകൃതിദത്ത നീർത്തടത്തെ 2022-ലാണ് നഗരവികസനങ്ങളിൽ നിന്ന് സംരക്ഷിച്ച് സംരക്ഷിത പ്രദേശമായി പ്രഖ്യാപിച്ചത്. 4.5 കോടി വർഷത്തോളം പഴക്കമുള്ള ചുണ്ണാമ്പുകല്ല് രൂപീകരണങ്ങളും ഫോസിലുകളും കൊണ്ട് സമ്പന്നമാണ് ഈ പ്രദേശം. വിവിധയിനം അപൂർവ്വ പക്ഷികളുടെയും കൊക്കുകളുടെയും കടൽക്കാക്കകളുടെയും പ്രധാന താവളം കൂടിയാണിത്. കളിസ്ഥലങ്ങൾ, നടപ്പാതകൾ, പരമ്പരാഗത കഫേകൾ, ലൈറ്റിംഗ് സംവിധാനങ്ങൾ എന്നിവ ഒരുക്കി പ്രദേശവാസികൾക്ക് പ്രകൃതിയെ ആസ്വദിക്കാനുള്ള സൗകര്യങ്ങൾ വർദ്ധിപ്പിക്കാനാണ് കൗൺസിൽ ലക്ഷ്യമിടുന്നത്. ഇതിനായി പ്രമുഖ ബാങ്കുകളും വൻകിട കമ്പനികളും മരം നടീൽ പദ്ധതികളിൽ പങ്കാളികളാകണമെന്ന് അദ്ദേഹം ആഹ്വാനം ചെയ്തു.
പ്രദേശത്തെ ശുദ്ധജല സ്രോതസ്സുകളിൽ നിന്നുള്ള വെള്ളം കെട്ടിക്കിടന്ന് കൊതുകുകൾ പെരുകുന്നത് തടയാൻ എയറേറ്ററുകൾ ഉപയോഗിച്ച് ജലചലനം നിലനിർത്തുന്നുണ്ട്. ബഹ്റൈന്റെ 30 ലക്ഷം മരങ്ങൾ എന്ന ലക്ഷ്യത്തിന് പിന്തുണ നൽകി വാദി അൽ-ബുഹൈറിനെ പ്രദേശത്തിന്റെ "ഹരിത ശ്വാസകോശമായി" നിലനിർത്താനാണ് പദ്ധതി.
dfdfg
