ന്യൂഡൽഹിയിൽ ബ്രിക്സ് ഉച്ചകോടി: തലസ്ഥാനത്ത് കർശന വ്യോമ-റെയിൽ നിയന്ത്രണങ്ങൾ

ശാരിക

ന്യൂഡൽഹി: ഇന്ത്യ അധ്യക്ഷത വഹിക്കുന്ന 18-ാമത് ബ്രിക്സ് ഉച്ചകോടിയുടെ ഭാഗമായി തലസ്ഥാന നഗരിയിലും സമീപപ്രദേശങ്ങളിലും കടുത്ത വ്യോമ, റെയിൽ ഗതാഗത നിയന്ത്രണങ്ങൾ ഏർപ്പെടുത്തി. സെപ്റ്റംബർ 12, 13 തീയതികളിൽ നടക്കുന്ന ഉച്ചകോടിയിൽ പന്ത്രണ്ടോളം രാഷ്ട്രത്തലവന്മാരും വിദേശ പ്രതിനിധികളും പങ്കെടുക്കുന്ന പശ്ചാത്തലത്തിലാണ് ഡൽഹി പോലീസിന്റെ നിർദ്ദേശപ്രകാരം സുരക്ഷ ശക്തമാക്കിയത്.

വ്യോമപാതയിലെ നിയന്ത്രണങ്ങൾ

സെപ്റ്റംബർ 13 വരെ ഡൽഹിയുടെ 300 കിലോമീറ്റർ ചുറ്റളവിൽ രാവിലെ 7 മുതൽ രാത്രി 11 വരെ ഷെഡ്യൂൾ ചെയ്യാത്ത വിമാന സർവീസുകൾക്ക് വിലക്കുണ്ട്. എന്നാൽ കൃത്യമായ സമയക്രമത്തിലുള്ള സാധാരണ വിമാനങ്ങൾ, വിദേശ പ്രതിനിധികളുടെ ആഭ്യന്തര മന്ത്രാലയ അനുമതിയുള്ള പ്രത്യേക വിമാനങ്ങൾ, ഗവർണർമാർക്കും മുഖ്യമന്ത്രിമാർക്കുമുള്ള സംസ്ഥാന സർക്കാർ വിമാനങ്ങൾ എന്നിവയ്ക്ക് സർവീസ് നടത്താൻ ഇളവുണ്ട്. അടിയന്തര വിഐപി ഡ്യൂട്ടികൾ ഒഴികെ സഫ്ദർജംഗ് വിമാനത്താവളം പൂർണ്ണമായും അടച്ചിടും.

റെയിൽവേ സർവീസുകളിലെ മാറ്റങ്ങൾ

പ്രീമിയം സർവീസുകൾ ഉൾപ്പെടെ 120-ഓളം ട്രെയിനുകളുടെ സമയക്രമത്തിലാണ് നോർത്തേൺ റെയിൽവേ മാറ്റങ്ങൾ വരുത്തിയിട്ടുള്ളത്. റാഞ്ചി, ദിബ്രുഗഢ്, സീൽദാ, ഹൗറ, ഭുവനേശ്വർ രാജ്ധാനി എക്സ്പ്രസുകൾ, സംപൂർണ ക്രാന്തി, ശ്രമജീവി എക്സ്പ്രസുകൾ എന്നിവ ഡൽഹി ജംഗ്ഷൻ, സാഹിബാബാദ്, ദില്ലി ഷാഹ്ദര എന്നീ ബദൽ പാതകൾ വഴി സർവീസ് നടത്തും.

കേരള എക്സ്പ്രസ്, വന്ദേ ഭാരത്, കർണാടക എക്സ്പ്രസ്, ജിടി എക്സ്പ്രസ്, തമിഴ്‌നാട് എക്സ്പ്രസ്, തേജസ് രാജ്ധാനി തുടങ്ങിയ ദീർഘദൂര സർവീസുകൾ വൈകാനോ വഴിയിൽ പിടിച്ചിടാനോ സാധ്യതയുണ്ട്. കൂടാതെ പാൽവൽ, ഗാസിയാബാദ്, ശകൂർ ബസ്തി മേഖലകളിലെ നിരവധി ഇ.എം.യു, മെമു പാസഞ്ചർ സർവീസുകൾ സെപ്റ്റംബർ 11, 12 തീയതികളിൽ പൂർണ്ണമായോ ഭാഗികമായോ റദ്ദാക്കിയിട്ടുണ്ട്.

യാത്രക്കാർ ശ്രദ്ധിക്കാൻ

യാത്ര തിരിക്കും മുൻപ് നാഷണൽ ട്രെയിൻ എൻക്വയറി സിസ്റ്റം (NTES) ആപ്പ്, വെബ്‌സൈറ്റ് അല്ലെങ്കിൽ 139 എന്ന ഹെൽപ്പ് ലൈൻ നമ്പർ വഴി ട്രെയിൻ സമയം ഉറപ്പുവരുത്തണമെന്ന് റെയിൽവേ അറിയിച്ചു.