റദ്ദാക്കിയ ഫോർമുല വൺ ബഹ്റൈൻ ഗ്രാൻഡ് പ്രി ഒക്ടോബറിൽ തിരിച്ചെത്തിയേക്കും; സൂചന നൽകി സി.ഇ.ഒ സ്റ്റിഫാനോ ഡൊമെനിക്കാലി
പ്രദീപ് പുറവങ്കര
ലണ്ടൻ: അറേബ്യൻ ഗൾഫ് മേഖലയിലുണ്ടായ സംഘർഷങ്ങളെ തുടർന്ന് ഈ സീസണിൽ റദ്ദാക്കേണ്ടി വന്ന രണ്ട് പ്രധാന റേസുകളിൽ ഒന്നായ ബഹ്റൈൻ ഗ്രാൻഡ് പ്രി 2026-ലെ കലണ്ടറിലേക്ക് തിരികെ കൊണ്ടുവരാൻ മാനേജ്മെന്റ് ശ്രമിക്കുന്നതായി ഫോർമുല വൺ ചീഫ് എക്സിക്യൂട്ടീവ് സ്റ്റിഫാനോ ഡൊമെനിക്കാലി സ്ഥിരീകരിച്ചു. ഇറാൻ നടത്തിയ ആക്രമണങ്ങളെ തുടർന്നാണ് ഏപ്രിൽ മാസത്തിൽ നടക്കേണ്ടിയിരുന്ന ബഹ്റൈൻ ഗ്രാൻഡ് പ്രിയും സൗദി അറേബ്യൻ ഗ്രാൻഡ് പ്രിയും റദ്ദാക്കിയിരുന്നത്.
ബ്രിട്ടീഷ് ഗ്രാൻഡ് പ്രിയോടനുബന്ധിച്ച് സ്കൈ സ്പോർട്സിന് നൽകിയ പ്രത്യേക അഭിമുഖത്തിലാണ് ഡൊമെനിക്കാലി പ്രതീക്ഷ പങ്കുവെച്ചത്. സാഹചര്യങ്ങൾ അനുകൂലമാണെങ്കിൽ റദ്ദാക്കിയ മത്സരങ്ങൾ പുനഃക്രമീകരിക്കുമെന്നും അനുകൂലമായ അവസരങ്ങൾ പരമാവധി പ്രയോജനപ്പെടുത്തുമെന്നും അദ്ദേഹം വ്യക്തമാക്കി. സ്കൈ സ്പോർട്സ് റിപ്പോർട്ടുകൾ പ്രകാരം ഒക്ടോബർ 2 മുതൽ 4 വരെയുള്ള തീയതികളിലായിരിക്കും ബഹ്റൈൻ ഗ്രാൻഡ് പ്രി നടക്കുക. അസർബൈജാൻ ഗ്രാൻഡ് പ്രിക്കും സിംഗപ്പൂർ ഗ്രാൻഡ് പ്രിക്കും ഇടയിലായിരിക്കും ഇത് വരിക.
ജൂലൈ 26-ന് ഹംഗേറിയൻ ഗ്രാൻഡ് പ്രിക്ക് ശേഷം ആരംഭിക്കുന്ന വേനൽക്കാല അവധിക്കാലത്തിന് മുൻപായി ബഹ്റൈൻ റേസ് പുനഃസ്ഥാപിക്കുന്ന കാര്യത്തിൽ അന്തിമ തീരുമാനമുണ്ടാകുമെന്ന് ഡൊമെനിക്കാലി പറഞ്ഞു. സീസണിലെ അവസാന മത്സരങ്ങളായ ഖത്തർ ഗ്രാൻഡ് പ്രിയും അബുദാബി ഗ്രാൻഡ് പ്രിയും നിശ്ചയിച്ച ഷെഡ്യൂൾ പ്രകാരം തന്നെ നടക്കുമെന്ന പ്രത്യാശയും അദ്ദേഹം പ്രകടിപ്പിച്ചു. ഒക്ടോബറിൽ ബഹ്റൈൻ റേസ് പുനരാരംഭിക്കുന്നത് മേഖലയിലെ മറ്റ് മത്സരങ്ങൾ സുഗമമായി നടത്തുന്നതിനുള്ള നല്ലൊരു സൂചനയായിരിക്കുമെന്നും, കായികപരമായി മാത്രമല്ല രാഷ്ട്രീയപരമായും ഇത് പോസിറ്റീവായ സന്ദേശം നൽകുമെന്നും അദ്ദേഹം കൂട്ടിച്ചേർത്തു.
നിലവിൽ 22 റേസുകളാണ് 2026 ഫോർമുല വൺ ലോക ചാമ്പ്യൻഷിപ്പ് സീസണിലുള്ളത്. ബഹ്റൈൻ ഗ്രാൻഡ് പ്രി കൂടി തിരിച്ചെത്തുന്നതോടെ മത്സരങ്ങളുടെ എണ്ണം 23 ആയി ഉയരും. 24 റേസുകളായിരുന്നു ഈ സീസണിൽ യഥാർത്ഥത്തിൽ ആസൂത്രണം ചെയ്തിരുന്നത്.
നിലവിലെ ചാമ്പ്യൻഷിപ്പ് പോയിന്റ് പട്ടികയിൽ മെഴ്സിഡസിന്റെ യുവ ഇറ്റാലിയൻ ഡ്രൈവർ കിമി അന്റോണെല്ലിയാണ് മുന്നിലുള്ളത്. സിൽവർസ്റ്റോണിൽ നടന്ന ബ്രിട്ടീഷ് ഗ്രാൻഡ് പ്രിയിൽ സ്പ്രിന്റ് റേസ് വിജയവും പോൾ പൊസിഷനും സ്വന്തമാക്കിയ അന്റോണെല്ലി, തന്റെ സഹതാരം ബ്രിട്ടന്റെ ജോർജ്ജ് റസ്സലിനേക്കാൾ 43 പോയിന്റുകളുടെ ലീഡോടെയാണ് ലോക ഡ്രൈവേഴ്സ് ചാമ്പ്യൻഷിപ്പിൽ ഒന്നാമതായി തുടരുന്നത്.
േേിേ്ി
