74,000 ബഹ്റൈൻ ദിനാറിന്റെ തട്ടിപ്പ് കേസ്: അക്കൗണ്ടന്റിനെ കോടതി വെറുതെ വിട്ടു

പ്രദീപ് പുറവങ്കര

മനാമ: പ്രമുഖ റെസ്റ്റോറന്റ് ഗ്രൂപ്പിൽ നിന്നും 74,000 ബഹ്റൈൻ ദിനാർ (BHD) തിരിമറി നടത്തിയെന്ന കേസിൽ പ്രതിയായിരുന്ന അക്കൗണ്ടിംഗ് ഉദ്യോഗസ്ഥനെ ബഹ്റൈനിലെ തേർഡ് ലോവർ ക്രിമിനൽ കോടതി വെറുതെ വിട്ടു. പ്രതിക്കെതിരെ ഹാജരാക്കിയ തെളിവുകൾ കുറ്റം തെളിയിക്കാൻ പര്യാപ്തമല്ലെന്ന് കണ്ടെത്തിയതിനെ തുടർന്നാണ് കോടതി വിധി.

കേസ് ഫയൽ അനുസരിച്ച്, പ്രമുഖ റെസ്റ്റോറന്റ് ഗ്രൂപ്പിൽ അക്കൗണ്ടിംഗ് ഓഫീസറായി ജോലി ചെയ്തിരുന്ന പ്രതിക്കെതിരെ 2025-ൽ 74,000 ദിനാർ തട്ടിയെടുത്തു എന്നാരോപിച്ചാണ് പബ്ലിക് പ്രോസിക്യൂഷൻ കുറ്റപത്രം സമർപ്പിച്ചത്. കമ്പനിയുടെ വിവിധ ശാഖകളിൽ നിന്നുള്ള വരുമാനം സ്വീകരിച്ച് ബാങ്ക് അക്കൗണ്ടുകളിൽ നിക്ഷേപിക്കുന്നതിന് മുൻപ് അവ പരിശോധിച്ച് തിട്ടപ്പെടുത്തലായിരുന്നു ഇയാളുടെ പ്രധാന ചുമതല.

കമ്പനിയുടെ ദൈനംദിന വിൽപ്പനയും ബാങ്കിൽ നിക്ഷേപിച്ച തുകയും തമ്മിൽ വലിയ വ്യത്യാസങ്ങൾ മാനേജ്‌മെന്റിന്റെ ശ്രദ്ധയിൽപ്പെട്ടതോടെയാണ് സംഭവങ്ങളുടെ തുടക്കം. ഇതിനെക്കുറിച്ച് ചോദിച്ചപ്പോൾ അക്കൗണ്ടന്റ് ക്രമക്കേടുകൾ നിഷേധിച്ചു. തുടർന്ന് കമ്പനി നടത്തിയ പ്രത്യേക ഓഡിറ്റിലാണ് 74,000 ദിനാറിന്റെ കുറവ് കണ്ടെത്തിയത്. കൂടാതെ മറ്റൊരു കമ്പനിയുടെ 14,000 ദിനാറും കാണാതായതായി ഓഡിറ്റിൽ വ്യക്തമായിരുന്നു. ഇതോടൊപ്പം പ്രതി ജോലിക്ക് കൃത്യമായി ഹാജരായിരുന്നില്ലെന്നും കമ്പനി ആരോപിച്ചിരുന്നു.

എന്നാൽ വിചാരണ വേളയിൽ പ്രതി തനിക്കെതിരെയുള്ള എല്ലാ ആരോപണങ്ങളും പൂർണ്ണമായി നിഷേധിച്ചു. പ്രതിഭാഗം അഭിഭാഷകരായ ത്വയ്ബ ഫാദിൽ, കൗതർ മുഹമ്മദ് എന്നിവർ കോടതിയിൽ ശക്തമായ വാദങ്ങളാണ് ഉന്നയിച്ചത്. കേസ് ഫയലിൽ തങ്ങളുടെ കക്ഷിക്ക് സാമ്പത്തിക തിരിമറിയുമായി നേരിട്ട് ബന്ധമുണ്ടെന്ന് തെളിയിക്കുന്ന യാതൊരുവിധ നേരിട്ടുള്ള തെളിവുകളുമില്ലെന്ന് അവർ വാദിച്ചു.

പ്രതിയുടെ ഒപ്പുകളടങ്ങിയ രേഖകളുടെ ആധികാരികതയെ ചോദ്യം ചെയ്ത അഭിഭാഷകർ, പരാതിക്കാരുടെ മൊഴിയും പ്രോസിക്യൂഷൻ സാക്ഷിയുടെ മൊഴിയും തമ്മിൽ വലിയ വൈരുദ്ധ്യങ്ങളുണ്ടെന്നും ചൂണ്ടിക്കാണിച്ചു. കമ്പനി സമർപ്പിച്ച ഓഡിറ്റ് റിപ്പോർട്ട് തള്ളിക്കളയണമെന്നും അല്ലെങ്കിൽ ഒരു സ്വതന്ത്ര അക്കൗണ്ടിംഗ് വിദഗ്ദ്ധനെക്കൊണ്ട് പുനഃപരിശോധന നടത്തണമെന്നും പ്രതിഭാഗം ആവശ്യപ്പെട്ടു.

കേസ് വിശദമായി പരിശോധിച്ച കോടതി, കമ്പനി സമർപ്പിച്ച അക്കൗണ്ടിംഗ് റിപ്പോർട്ടിൽ നിരവധി പോരായ്മകളും വൈരുദ്ധ്യങ്ങളും കണ്ടെത്തിയതിനാൽ അത് വിശ്വസനീയമല്ലെന്ന് വിലയിരുത്തി. പണം ബാങ്കിൽ നിക്ഷേപിക്കുന്നതിന് മുൻപ് പ്രതിക്ക് ലഭിച്ചിട്ടുണ്ടെന്നോ അദ്ദേഹം അത് പരിശോധിച്ചിട്ടുണ്ടെന്നോ തെളിയിക്കുന്ന കൃത്യമായ രേഖകൾ ഓഡിറ്റ് റിപ്പോർട്ടിൽ ഇല്ലായിരുന്നു. കേവലം അനുമാനങ്ങളുടെയും കമ്പനിയിലെ ഡ്രൈവർമാരുടെ മൊഴികളുടെയും അടിസ്ഥാനത്തിലാണ് ഈ റിപ്പോർട്ട് തയ്യാറാക്കിയതെന്നും കോടതി നിരീക്ഷിച്ചു.
പ്രതിയുടെ കുറ്റം തെളിയിക്കാൻ തക്കതായ മറ്റ് അധിക തെളിവുകളൊന്നും കേസ് ഫയലിൽ ഇല്ലെന്ന് കോടതി വ്യക്തമാക്കി. പ്രോസിക്യൂഷൻ ഹാജരാക്കിയ തെളിവുകൾ ശിക്ഷ വിധിക്കാൻ തക്കവണ്ണം ശക്തമല്ലെന്നും, ഏതൊരു ക്രിമിനൽ കുറ്റത്തിലും ശിക്ഷാവിധി എന്നത് സംശയങ്ങൾക്ക് ഇടയില്ലാത്തവിധം കൃത്യമായ തെളിവുകളുടെ അടിസ്ഥാനത്തിലായിരിക്കണമെന്നും കോടതി ഓർമ്മിപ്പിച്ചു. ഈ മാനദണ്ഡങ്ങൾ പാലിക്കപ്പെടാത്ത സാഹചര്യത്തിൽ പ്രതിയെ സാമ്പത്തിക തട്ടിപ്പ് കേസിൽ നിന്നും പൂർണ്ണമായി വെറുതെ വിട്ടുകൊണ്ട് കോടതി ഉത്തരവായി.