ഇന്ത്യൻ സ്കൂൾ ബഹ്റൈൻ ഭരണസമിതിക്കെതിരെ പ്രതിപക്ഷ കൂട്ടായ്മ

പ്രദീപ് പുറവങ്കര

മനാമ: ഇന്ത്യൻ സ്കൂൾ ബഹ്റൈനിലെ (ISB) നിലവിലെ ഭരണസമിതിയുടെ കടുത്ത അനാസ്ഥയ്ക്കും ഭരണപരാജയങ്ങൾക്കുമെതിരെ ശക്തമായ പ്രതിരോധവുമായി പ്രതിപക്ഷ പാനലുകൾ ഒന്നിച്ച് അണിനിരക്കുന്നു. സ്കൂളിലെ ഭരണപരവും സാമ്പത്തികവുമായ തകർച്ചകൾക്ക് പരിഹാരം കാണുക എന്ന ലക്ഷ്യത്തോടെ 'ഇന്ത്യൻ സ്കൂൾ പേരെന്റ്സ് ഫോറം' (ISPF), 'ഇൻഡക്സ്' (Index) എന്നീ പാനലുകൾ ലയിച്ച് 'യുണൈറ്റഡ് പേരെന്റ്സ് പാനലിൽ' ലയിച്ച് പുതിയ സംയുക്ത മുന്നണിയായി പ്രവർത്തിക്കുമെന്ന് നേതാക്കൾ വാർത്താസമ്മേളനത്തിൽ അറിയിച്ചു. വരാനിരിക്കുന്ന ഒക്ടോബർ-ഡിസംബർ മാസങ്ങളിൽ നടക്കാനിരിക്കുന്ന സ്കൂൾ മാനേജ്‌മെന്റ് കമ്മിറ്റി തെരഞ്ഞെടുപ്പിന് മുന്നോടിയായാണ് ഈ പുതിയ നീക്കം.

ട്യൂഷൻ ഫീസ് കുടിശ്ശികയെക്കുറിച്ച് ചർച്ച ചെയ്യാൻ അടുത്തിടെ വിളിച്ചുകൂട്ടിയ പ്രത്യേക ജനറൽ ബോഡി യോഗം നിലവിലെ ഭരണസമിതി കൈകാര്യം ചെയ്ത രീതിയെ യുപിപി ശക്തമായി വിമർശിച്ചു. ഫീസ് കുടിശ്ശികയുള്ള രക്ഷിതാക്കളെ യോഗത്തിൽ പങ്കെടുക്കുന്നതിൽ നിന്നും വോട്ട് രേഖപ്പെടുത്തുന്നതിൽ നിന്നും വിലക്കിയതായി പ്രതിപക്ഷം ചൂണ്ടിക്കാട്ടി. ഫീസ് പൂർണ്ണമായി അടച്ചുതീർത്തവർക്ക് മാത്രമാണ് യോഗത്തിൽ പ്രവേശനം നൽകിയത്.

സാമ്പത്തിക പ്രതിസന്ധിയിലായ കുടുംബങ്ങളെ കടബാധ്യതയിൽ തന്നെ നിർത്തിക്കൊണ്ട്, വരാനിരിക്കുന്ന തെരഞ്ഞെടുപ്പിൽ അവരെ ഒരു 'വോട്ട് ബാങ്ക്' ആയി ചൂഷണം ചെയ്യാനാണോ ഭരണസമിതി ശ്രമിക്കുന്നതെന്ന് യുപിപി ചോദ്യം ചെയ്തു. സ്കൂളിന്റെ സാമ്പത്തിക പ്രശ്നങ്ങൾ പരിഹരിക്കേണ്ടത് രക്ഷിതാക്കളെ മാറ്റിനിർത്തിയല്ല, മറിച്ച് തുറന്ന ചർച്ചകളിലൂടെയാണെന്ന് മുന്നണി ഊന്നിപ്പറഞ്ഞു.

ഭരണസമിതിയുടെ സാമ്പത്തിക അനാസ്ഥ സ്കൂളിലെ അധ്യാപകരുൾപ്പെടെയുള്ള ജീവനക്കാരുടെ ആനുകൂല്യങ്ങളെയും ദോഷകരമായി ബാധിച്ചതായി പ്രതിപക്ഷം ആരോപിച്ചു. മുൻ കമ്മിറ്റികൾ കൃത്യസമയത്ത് ശമ്പളവും ഒപ്പം വേനൽക്കാല അവധിക്കാലത്തെ അലവൻസുകളും നൽകിയിരുന്ന സ്ഥാനത്ത്, നിലവിലെ ഭരണസമിതി പ്രതിമാസ ശമ്പളം ഗഡുക്കളായാണ് നൽകുന്നത്. എന്നാൽ, രക്ഷിതാക്കളുടെ ശക്തമായ പ്രതിഷേധത്തെ തുടർന്ന് ജൂൺ മാസത്തെ ശമ്പളം കഴിഞ്ഞ ദിവസം വിതരണം ചെയ്തിട്ടുണ്ട്.

രക്ഷിതാക്കൾ കൃത്യമായി സ്കൂൾ ഫീസ് അടയ്ക്കേണ്ടതുണ്ടെന്ന് വ്യക്തമാക്കിയ യുപിപി, എന്നാൽ സ്കൂളിൽ ഇത്രയധികം ഫീസ് കുടിശ്ശിക കുന്നുകൂടാൻ കാരണം ഭരണസമിതിയുടെ വ്യവസ്ഥാപിതമായ പരാജയമാണെന്ന് കുറ്റപ്പെടുത്തി.

പത്ര സമ്മേളനത്തില്‍ ഡോക്ടര്‍ സുരേഷ് സുബ്രമണ്യം, എഫ്.എം.ഫൈസല്‍, അനീഷ് വര്‍ഗീസ്, ചന്ദ്രബോസ്, അബ്ബാസ് സേഠ്, മന്‍ഷീര്‍, ചന്ദ്രന്‍ വളയം, ഷിബിന്‍ ,ജൂഡി വര്‍ഗീസ് എന്നവർ പങ്കെടുത്തു.