ഡിജിറ്റൽ യുഗത്തിലേക്ക് ചുവടുവെച്ച് ഇന്ത്യൻ സ്കൂൾ ബഹ്റൈൻ; 'സ്മാർട്ട് ക്ലാസ്റൂം' പദ്ധതി ഉദ്ഘാടനം ചെയ്തു

പ്രദീപ് പുറവങ്കര

മനാമ: ഡിജിറ്റൽ പരിവർത്തനത്തിന്റെ ഭാഗമായി ഇന്ത്യൻ സ്കൂൾ ബഹ്റൈൻ നടപ്പിലാക്കുന്ന 'സ്മാർട്ട് ക്ലാസ്റൂം പ്രോജക്ട്' ഔദ്യോഗികമായി ഉദ്ഘാടനം ചെയ്തു. സ്കൂളിന്റെ ഇസ ടൗൺ കാമ്പസിലെ ജഷൻമാൽ ഓഡിറ്റോറിയത്തിൽ നടന്ന പ്രൗഢഗംഭീരമായ ചടങ്ങിൽ പ്രമുഖ വിദ്യാഭ്യാസ വകുപ്പ് ഉദ്യോഗസ്ഥരും ടെലികോം പങ്കാളികളും കമ്മ്യൂണിറ്റി നേതാക്കളും പങ്കെടുത്തു.

ഏകദേശം 4,00,000 ബഹ്റൈനി ദിനാർ (BD 400,000) ചിലവഴിച്ചാണ് ഈ വൻകിട പദ്ധതി സ്കൂൾ മാനേജ്‌മെന്റ് യാഥാർത്ഥ്യമാക്കിയിരിക്കുന്നത്. സ്കൂളിന്റെ ഇസ ടൗൺ, റിഫ കാമ്പസുകളിലെ പരമ്പരാഗത പഠനമുറികളെ അത്യാധുനിക രീതിയിലേക്ക് മാറ്റുന്ന ഈ പദ്ധതിയുടെ ഗുണഫലം പതിനൊന്നായിരത്തി അഞ്ഞൂറോളം (11,500) വിദ്യാർത്ഥികൾക്ക് നേരിട്ട് ലഭിക്കും.

സാങ്കേതികവിദ്യയിൽ ഊന്നിയുള്ള ഈ പദ്ധതിയിലൂടെ ക്ലാസ് മുറികളുടെ അടിസ്ഥാന സൗകര്യങ്ങൾ പൂർണ്ണമായും പരിഷ്കരിച്ചു. ഇതിന്റെ ഭാഗമായി ക്ലാസ് മുറികൾ, ലൈബ്രറികൾ, ലബോറട്ടറികൾ എന്നിവടങ്ങളിൽ അത്യാധുനിക 'ഇന്ററാക്ടീവ് ഡിജിറ്റൽ സ്മാർട്ട്ബോർഡുകൾ' സ്ഥാപിച്ചു. ഇത് കുട്ടികളുടെ പഠന നിലവാരവും താല്പര്യവും വർദ്ധിപ്പിക്കാൻ സഹായിക്കും. കൂടാതെ, വിദ്യാർത്ഥികളുടെ സുരക്ഷ ശക്തമാക്കുന്നതിനായി കാമ്പസിലുടനീളം അത്യാധുനിക സിസിടിവി (CCTV) ശൃംഖലയും പദ്ധതിയുടെ ഭാഗമായി സജ്ജീകരിച്ചിട്ടുണ്ട്.

ബഹ്റൈൻ വിദ്യാഭ്യാസ മന്ത്രാലയത്തിലെ പ്ലാനിംഗ് ആന്റ് എഡ്യൂക്കേഷണൽ ലൈസൻസിങ് അസിസ്റ്റന്റ് അണ്ടർസെക്രട്ടറി ഡോ. സന സയീദ് അബ്ദുള്ള അൽ ഹദ്ദാദ് ചടങ്ങിൽ മുഖ്യാതിഥിയായി പങ്കെടുത്ത് പദ്ധതിയുടെ ഔദ്യോഗിക ഉദ്ഘാടനം നിർവ്വഹിച്ചു. ഉദ്ഘാടനത്തിന് ശേഷം, പുതിയ ഡിജിറ്റൽ സ്ക്രീൻ സാങ്കേതികവിദ്യ ഉപയോഗിച്ചുള്ള സ്മാർട്ട് ക്ലാസ്റൂം സെഷന്റെ തത്സമയ പ്രദർശനവും അതിഥികൾക്കായി ഒരുക്കിയിരുന്നു.

ആധുനിക സാങ്കേതികവിദ്യകളെ പഠനപ്രക്രിയയുമായി സംയോജിപ്പിക്കുന്നതിൽ ഇന്ത്യൻ സ്കൂൾ മാതൃകാപരമായ പ്രവർത്തനമാണ് കാഴ്ചവെച്ചതെന്ന് ഡോ. അൽ ഹദ്ദാദ് പ്രശംസിച്ചു. ബഹ്റൈന്റെ സുസ്ഥിര വികസന ലക്ഷ്യങ്ങൾക്ക് അനുസൃതമായി പ്രവർത്തിക്കുന്ന സ്വകാര്യ സ്കൂളുകളുടെ ഇത്തരം സംരംഭങ്ങൾക്ക് മന്ത്രാലയത്തിന്റെ പൂർണ്ണ പിന്തുണ അവർ ഉറപ്പുനൽകി.