ആലിയിലെ വീട്ടിൽ തീപ്പിടുത്തം; അഞ്ച് കുട്ടികളെ രക്ഷപ്പെടുത്തി

പ്രദീപ് പുറവങ്കര l ബഹ്റൈൻ

ആലി: ആലി പ്രദേശത്തെ ഒരു പാർപ്പിട സമുച്ചയത്തിലുണ്ടായ തീപിടുത്തത്തിൽ നിന്നും അഞ്ച് കുട്ടികളെ സിവിൽ ഡിഫൻസ് സംഘം രക്ഷപ്പെടുത്തുകയും തീ പൂർണ്ണമായി അണയ്ക്കുകയും ചെയ്തു. ഇന്നലെയായിരുന്നു സംഭവം. അപകടത്തിൽ ആർക്കും പരിക്കേറ്റിട്ടില്ലെന്നും, തീ നിയന്ത്രണവിധേയമാക്കാനും താമസക്കാരുടെ സുരക്ഷിതത്വം ഉറപ്പാക്കാനും അടിയന്തര രക്ഷാപ്രവർത്തകർ അതിവേഗം പ്രതികരിച്ചതായും അധികൃതർ സ്ഥിരീകരിച്ചു. തീപിടുത്തത്തിന്റെ കാരണം കണ്ടെത്താനുള്ള അന്വേഷണം ഇപ്പോൾ നടന്നു വരികയാണ്. തലനാരിഴയ്ക്കാണ് വലിയൊരു ദുരന്തം ഒഴിവായത്. വീടുകളിൽ തീപിടുത്തമുണ്ടാകാൻ ഏറ്റവും കൂടുതൽ സാധ്യതയുള്ള വേനൽക്കാലത്തേക്ക് കടക്കുമ്പോൾ എല്ലാവർക്കും ഒരു മുന്നറിയിപ്പാണ് ഈ സംഭവം നൽകുന്നത്.

ബഹ്‌റൈനിൽ വേനൽക്കാലത്ത് താപനില പതിവായി 40 ഡിഗ്രി സെൽഷ്യസിനു മുകളിൽ ഉയരാറുണ്ട്. ഇത് കാരണം താമസക്കാർ എയർ കണ്ടീഷണറുകൾ മുഴുവൻ സമയവും പരമാവധി ശേഷിയിൽ പ്രവർത്തിപ്പിക്കാൻ നിർബന്ധിതരാകുന്നു. ബഹ്‌റൈന്റെ നാഷണൽ സിവില് പ്രൊട്ടക്ഷൻ പ്ലാറ്റ്‌ഫോമിന്റെ (NCPP) കണക്കനുസരിച്ച്, എസി യൂണിറ്റുകൾ പരമാവധി ശേഷിയിൽ തുടർച്ചയായി പ്രവർത്തിപ്പിക്കുന്നത് അവയ്ക്ക് കേടുപാടുകൾ സംഭവിക്കുന്നതിനും തകരാറുകൾക്കും ഷോർട്ട് സർക്യൂട്ടുകൾക്കും തീപിടുത്തങ്ങൾക്കും കാരണമാകുന്നു. അടുക്കളകളിൽ പൊടിയും കൊഴുപ്പും അടിഞ്ഞുകൂടിയ എക്സോസ്റ്റ് ഫാനുകൾ ദീർഘനേരം പ്രവർത്തിപ്പിക്കുന്നതാണ് വേനൽക്കാലത്ത് ബഹ്‌റൈനിലെ വീടുകളിൽ തീപിടുത്തമുണ്ടാക്കുന്ന, പലരും ശ്രദ്ധിക്കാതെ പോകുന്ന ഏറ്റവും അപകടകരമായ മറ്റൊരു കാര്യമെന്നും എൻസിപിപി മുന്നറിയിപ്പ് നൽകുന്നു. ഗൾഫ് മേഖലയിൽ ചൂട് കനക്കുന്ന മാസങ്ങളിൽ, അമിതമായി ചൂടാകുന്ന ഇലക്ട്രിക്കൽ സംവിധാനങ്ങൾ, ഓവർലോഡ് ആയ സോക്കറ്റുകൾ, കൃത്യമായി അറ്റകുറ്റപ്പണികൾ നടത്താത്ത ഗ്യാസ് ഉപകരണങ്ങൾ എന്നിവയെല്ലാം ഒത്തുചേരുമ്പോൾ വലിയ അപകടങ്ങൾ ഉണ്ടാകുന്നു.

മെയ് മാസത്തിൽ മാത്രം രാജ്യത്തിന്റെ വിവിധ ഭാഗങ്ങളിൽ നിരവധി തീപിടുത്തങ്ങളാണ് റിപ്പോർട്ട് ചെയ്തത്. തീപിടുത്തങ്ങൾ വലിയ ദുരന്തങ്ങൾക്ക് കാരണമാകുമെങ്കിലും പ്രതിരോധ നടപടികൾ പാലിച്ചാൽ അവയിൽ ഭൂരിഭാഗവും ഒഴിവാക്കാനാകുമെന്ന് ബഹ്‌റൈൻ എൻസിപിപി ഊന്നിപ്പറയുന്നു. അപകടസാധ്യതകൾ ഉണ്ടാകുന്നതിന് മുൻപ് തന്നെ അവ ഇല്ലാതാക്കുക എന്നതാണ് ഏറ്റവും മികച്ച മാർഗ്ഗം.