ബഹ്റൈൻ മാധ്യമദിനം: മാധ്യമപ്രവർത്തകർക്കായി പ്രത്യേക വിരുന്നൊരുക്കി ബഹ്റൈൻ ഇസ്ലാമിക് ബാങ്ക്
പ്രദീപ് പുറവങ്കര
മനാമ: സമൂഹത്തെ വാർത്തെടുക്കുന്നതിൽ മാധ്യമങ്ങൾ വഹിക്കുന്ന സുപ്രധാന പങ്ക് മുൻനിർത്തി, ബഹ്റൈൻ മാധ്യമദിനത്തോടനുബന്ധിച്ച് ബഹ്റൈൻ ഇസ്ലാമിക് ബാങ്ക് പ്രത്യേക ആഘോഷം സംഘടിപ്പിച്ചു. ഷെറാട്ടൺ ബഹ്റൈനിൽ നടന്ന ചടങ്ങിൽ പ്രമുഖ മാധ്യമ വ്യക്തിത്വങ്ങളും പത്രാധിപന്മാരും പങ്കെടുത്തു.
സാമ്പത്തിക രംഗവും മാധ്യമങ്ങളും തമ്മിലുള്ള ശക്തമായ പങ്കാളിത്തം ഊട്ടിയുറപ്പിക്കുന്നതിന്റെ ഭാഗമായാണ് ആഘോഷം സംഘടിപ്പിച്ചത്. ബാങ്കിംഗിലെ സങ്കീർണ്ണമായ കാര്യങ്ങൾ ലളിതമായി ജനങ്ങളിലേക്ക് എത്തിക്കുന്നതിൽ മാധ്യമങ്ങൾ വലിയ പങ്ക് വഹിക്കുന്നുണ്ടെന്ന് ബാങ്ക് അധികൃതർ ചൂണ്ടിക്കാട്ടി.
ചടങ്ങിൽ സംസാരിച്ച BisB ചീഫ് എക്സിക്യൂട്ടീവ് ഓഫീസർ ഫാത്തിമ അൽ-അലവി, മാധ്യമപ്രവർത്തനവും ഇസ്ലാമിക് ബാങ്കിംഗും തമ്മിലുള്ള സമാനതകൾ പങ്കുവെച്ചു. "സുതാര്യതയിലും സത്യസന്ധതയിലുമാണ് ഇസ്ലാമിക് ബാങ്കിംഗ് വിശ്വസിക്കുന്നത്. പത്രപ്രവർത്തനത്തിന്റെ അടിസ്ഥാന ശിലകളും ഇവ തന്നെയാണ്. ഞങ്ങൾ ജനങ്ങളുടെ സാമ്പത്തിക താൽപ്പര്യങ്ങൾ സംരക്ഷിക്കുമ്പോൾ, മാധ്യമങ്ങൾ അവരുടെ ബൗദ്ധികമായ താൽപ്പര്യങ്ങളെയാണ് നയിക്കുന്നത്," അവർ പറഞ്ഞു.
പ്രമുഖ ഇംഗ്ലീഷ് ദിനപത്രമായ 'ഡെയ്ലി ട്രിബ്യൂണിന്റെ' മികച്ച സേവനങ്ങൾ പരിഗണിച്ച്, ചെയർമാനും മാനേജിംഗ് എഡിറ്ററുമായ പി. ഉണ്ണിക്കൃഷ്ണൻ ബാങ്കിന്റെ പ്രത്യേക ഉപഹാരം ഏറ്റുവാങ്ങി. ബിസ്ബിയിലെ മുതിർന്ന ഉദ്യോഗസ്ഥരും രാജ്യത്തെ വിവിധ മാധ്യമ സ്ഥാപനങ്ങളിലെ എഡിറ്റർമാരും ചടങ്ങിൽ സംബന്ധിച്ചു.
fghfgh
