വികസനത്തിനൊരുങ്ങി മനാമ സെൻട്രൽ മാർക്കറ്റ്; ഉന്നതതല സംഘം സന്ദർശനം നടത്തി
പ്രദീപ് പുറവങ്കര I ബഹ്റൈൻ
മനാമ: തലസ്ഥാനത്തെ പ്രധാന വാണിജ്യ കേന്ദ്രമായ മനാമ സെൻട്രൽ മാർക്കറ്റിലെ വികസന പ്രവർത്തനങ്ങൾ വിലയിരുത്തുന്നതിനും പ്രവർത്തനക്ഷമത വർദ്ധിപ്പിക്കുന്നതിനുമായി മുനിസിപ്പൽ കാര്യ മന്ത്രാലയത്തിലെ ഉന്നതതല സംഘം സന്ദർശനം നടത്തി. ക്യാപിറ്റൽ ട്രസ്റ്റി ബോർഡ് ചെയർമാൻ എൻജിനീയർ സ്വാലിഹ് താഹിർ തരാദ, ക്യാപിറ്റൽ മുനിസിപ്പാലിറ്റി ഡയറക്ടർ ജനറൽ എൻജിനീയർ ആലിയ യൂസഫ് യഹ്യ എന്നിവരുടെ നേതൃത്വത്തിലായിരുന്നു സന്ദർശനം.
സെൻട്രൽ മാർക്കറ്റുകളുടെ തുടർച്ചയായ നവീകരണം അനിവാര്യമാണെന്ന് എൻജിനീയർ സ്വാലിഹ് താഹിർ തരാദ വ്യക്തമാക്കി. അടിസ്ഥാന സൗകര്യങ്ങൾ ആധുനികവൽക്കരിക്കുന്നതിലൂടെ വ്യാപാരികൾക്കും ഉപഭോക്താക്കൾക്കും ഒരുപോലെ ഗുണനിലവാരമുള്ള സേവനങ്ങൾ ലഭ്യമാക്കുകയാണ് ലക്ഷ്യമെന്ന് അദ്ദേഹം കൂട്ടിച്ചേർത്തു. വിപണിയിലെ സേവന നിലവാരം മെച്ചപ്പെടുത്തുന്നതിനായി കൃത്യമായ മെയിന്റനൻസ് പ്രോഗ്രാമുകൾ നടപ്പിലാക്കാൻ മുനിസിപ്പാലിറ്റി പ്രതിജ്ഞാബദ്ധമാണെന്ന് എൻജിനീയർ ആലിയ യൂസഫ് യഹ്യ പറഞ്ഞു.
ഈ വർഷത്തെ വികസന പദ്ധതികളിൽ മാർക്കറ്റിന് ചുറ്റുമുള്ള റോഡുകളുടെ നവീകരണം, ആഭ്യന്തര റോഡുകളുടെയും നടപ്പാതകളുടെയും അറ്റകുറ്റപ്പണികൾ, വൈദ്യുത സുരക്ഷാ പരിശോധനകൾ എന്നിവ ഉൾപ്പെടുന്നു. കൂടാതെ, ചൂടുകാലം പരിഗണിച്ച് എയർ കണ്ടീഷനിംഗ് സംവിധാനങ്ങളുടെ പ്രിവന്റീവ് മെയിന്റനൻസ് ജോലികളും വേഗത്തിലാക്കാൻ നിർദ്ദേശം നൽകിയിട്ടുണ്ട്.
edfsdf
