ഇറാൻ അക്രമണങ്ങളിൽ നഷ്ടപരിഹാരം ആവശ്യപ്പെട്ട് ബഹ്റൈൻ; യുഎന്നിന് ഔദ്യോഗിക കത്ത് നൽകി
പ്രദീപ് പുറവങ്കര I ബഹ്റൈൻ
ന്യൂയോർക്ക്: ഇറാന്റെ ഭാഗത്തുനിന്നുണ്ടാകുന്ന തുടർച്ചയായ അക്രമണങ്ങളിൽ ഉണ്ടായ നാശനഷ്ടങ്ങൾക്ക് പൂർണ്ണമായ നഷ്ടപരിഹാരം നൽകണമെന്ന് ബഹ്റൈൻ വീണ്ടും ആവശ്യപ്പെട്ടു. ഐക്യരാഷ്ട്രസഭയ്ക്ക് നൽകിയ പതിനൊന്നാമത് ദേശീയ ആശയവിനിമയ റിപ്പോർട്ടിലാണ് ബഹ്റൈൻ ഈ നിലപാട് ആവർത്തിച്ചത്. യുഎൻ സെക്രട്ടറി ജനറലിനും സെക്യൂരിറ്റി കൗൺസിൽ പ്രസിഡന്റിനും ബഹ്റൈൻ മിഷൻ ഇത് സംബന്ധിച്ച് ഔദ്യോഗിക കത്ത് കൈമാറി.
രാജ്യത്തിന്റെ പരമാധികാരത്തിന് മേലുള്ള നിയമവിരുദ്ധവും നഗ്നവുമായ കടന്നുകയറ്റങ്ങളെക്കുറിച്ച് സെക്യൂരിറ്റി കൗൺസിലിനെ ബഹ്റൈൻ കൃത്യമായി അറിയിക്കുന്നുണ്ട്. 2026 മാർച്ച് 24-നുണ്ടായ മിസൈൽ ആക്രമണത്തിൽ യുഎഇ സായുധ സേനയുമായി ചേർന്ന് പ്രവർത്തിച്ചിരുന്ന ഒരു മൊറോക്കൻ കരാർ തൊഴിലാളി കൊല്ലപ്പെട്ട സംഭവം റിപ്പോർട്ടിൽ എടുത്തുപറയുന്നു. ഈ ആക്രമണത്തിൽ ബഹ്റൈൻ പ്രതിരോധ സേനയിലെയും യുഎഇ സായുധ സേനയിലെയും ഉദ്യോഗസ്ഥർക്ക് പരിക്കേൽക്കുകയും ചെയ്തിരുന്നു.
ഭൗതികമായ ആക്രമണങ്ങൾക്ക് പുറമെ ബഹ്റൈന്റെ സാങ്കേതിക അടിസ്ഥാന സൗകര്യങ്ങൾക്ക് നേരെയും വലിയ തോതിലുള്ള സൈബർ ആക്രമണങ്ങൾ നടക്കുന്നതായി അധികൃതർ മുന്നറിയിപ്പ് നൽകി. ഇസ്താംബൂളിൽ നടന്ന ഇന്റർ പാർലമെന്ററി യൂണിയന്റെ സമ്മേളനത്തിൽ കൗൺസിൽ ഓഫ് റെപ്രസന്റേറ്റീവ്സ് സെക്രട്ടറി ജനറൽ മുഹമ്മദ് ഇബ്രാഹിം അൽ സിസി അൽ ബുവൈനൈൻ ഈ വിഷയം ഉന്നയിച്ചു.
ഇറാന്റെ ശത്രുതാപരമായ നീക്കങ്ങൾ ബഹ്റൈന്റെ ഡിജിറ്റൽ സംവിധാനങ്ങളെയും ഇലക്ട്രോണിക് സേവനങ്ങളെയും ലക്ഷ്യമിടുന്നു. ഇത്തരം നീക്കങ്ങൾ വെറും സാങ്കേതിക തകരാറുകളല്ല, മറിച്ച് രാജ്യത്തിന്റെ പരമാധികാരത്തിന് മേലുള്ള കടന്നുകയറ്റമാണ്. നിർണ്ണായകമായ സിവിൽ ഇൻഫ്രാസ്ട്രക്ചറുകളെ സംരക്ഷിക്കുന്ന അന്താരാഷ്ട്ര തത്വങ്ങളുടെ ലംഘനമാണിതെന്നും അദ്ദേഹം വ്യക്തമാക്കി.
അതീവ സങ്കീർണ്ണമായ ഇത്തരം സൈബർ ഭീഷണികളെ നേരിടാൻ ശക്തമായ പ്രതിരോധ സംവിധാനങ്ങൾ ആവശ്യമാണെന്ന് ബഹ്റൈൻ ആവശ്യപ്പെട്ടു. ആർട്ടിഫിഷ്യൽ ഇന്റലിജൻസ് ഉൾപ്പെടെയുള്ള സ്മാർട്ട് സംവിധാനങ്ങളെ ദേശീയ സുരക്ഷയുടെ ഭാഗമായി കണ്ട് സംരക്ഷിക്കണമെന്നും ആഗോളതലത്തിൽ ഇതിനായി കർശനമായ ചട്ടക്കൂടുകൾ നിർമ്മിക്കണമെന്നും അൽ ബുവൈനൈൻ ആഹ്വാനം ചെയ്തു.
dswaeesdee
