വാർത്താവിനിമയ മേഖലയുടെ സുരക്ഷ ഉറപ്പാക്കും; പ്രമുഖ ടെലികോം കമ്പനികളിൽ സന്ദർശനം നടത്തി ബഹ്റൈൻ മന്ത്രി
പ്രദീപ് പുറവങ്കര I ബഹ്റൈൻ
മനാമ: മേഖലയിലെ സവിശേഷ സാഹചര്യങ്ങൾ കണക്കിലെടുത്ത് ബഹ്റൈനിലെ വാർത്താവിനിമയ മേഖലയുടെ (Telecommunications) സന്നദ്ധതയും സുരക്ഷയും ഉറപ്പാക്കാൻ പ്രതിജ്ഞാബദ്ധമാണെന്ന് ഗതാഗത-വാർത്താവിനിമയ മന്ത്രി ഹിസ് എക്സലൻസി ഡോ. ഷെയ്ഖ് അബ്ദുള്ള ബിൻ അഹമ്മദ് അൽ ഖലീഫ വ്യക്തമാക്കി. ദേശീയ സുരക്ഷയുടെയും ഡിജിറ്റൽ ഇൻഫ്രാസ്ട്രക്ചറിന്റെയും പ്രധാന തൂണുകളിലൊന്നാണ് ഈ മേഖലയെന്ന് അദ്ദേഹം ഓർമ്മിപ്പിച്ചു.
രാജ്യത്തെ വാർത്താവിനിമയ സേവനങ്ങളുടെ തുടർച്ച ഉറപ്പാക്കുന്നതിനും അടിയന്തര സാഹചര്യങ്ങളെ നേരിടുന്നതിനുമുള്ള തയ്യാറെടുപ്പുകൾ നേരിട്ട് വിലയിരുത്തുന്നതിനായി അദ്ദേഹം വിവിധ ടെലികോം കമ്പനികളുടെ ആസ്ഥാനങ്ങളിലും ശാഖകളിലും സന്ദർശനം നടത്തി. ബിയോൺ (Beyon) ഗ്രൂപ്പിന് കീഴിലുള്ള ബാറ്റൽകോ (Batelco), എസ്ടിസി ബഹ്റൈൻ (STC Bahrain), സൈൻ ബഹ്റൈൻ (Zain Bahrain), ബിനെറ്റ് (BNET) എന്നീ സ്ഥാപനങ്ങളിലാണ് മന്ത്രി സന്ദർശനം നടത്തിയത്.
ബിയോൺ ചെയർമാൻ ഷെയ്ഖ് അബ്ദുള്ള ബിൻ ഖലീഫ അൽ ഖലീഫ, എസ്ടിസി സിഇഒ ഖാലിദ് അൽ ഒസൈമി, സൈൻ മാനേജിംഗ് ഡയറക്ടർ മുഹമ്മദ് അബ്ദുള്ള സൈൻ അൽ ആബിദിൻ, ബിനെറ്റ് സിഇഒ അഹമ്മദ് ജാബർ അൽ ദോസരി എന്നിവരുമായി അദ്ദേഹം ചർച്ചകൾ നടത്തി. നെറ്റ്വർക്കുകളുടെ കാര്യക്ഷമത വർദ്ധിപ്പിക്കുന്നതിനും സൈബർ സുരക്ഷ ഉറപ്പാക്കുന്നതിനുമായി കമ്പനികൾ സ്വീകരിച്ചിട്ടുള്ള സാങ്കേതികവും പ്രവർത്തനപരവുമായ മുൻകരുതൽ പദ്ധതികൾ മന്ത്രി വിശദമായി ചോദിച്ചറിഞ്ഞു.
ഏത് സാഹചര്യത്തിലും വാർത്താവിനിമയ സേവനങ്ങൾക്ക് തടസ്സം നേരിടില്ലെന്ന് ഉറപ്പുവരുത്താൻ കമ്പനികൾക്ക് സാധിക്കണമെന്ന് അദ്ദേഹം നിർദ്ദേശിച്ചു. ഡിജിറ്റൽ ഇൻഫ്രാസ്ട്രക്ചർ സംരക്ഷിക്കുന്നതിനും അടിയന്തര പ്രതികരണ സംവിധാനങ്ങൾ ശക്തിപ്പെടുത്തുന്നതിനും കമ്പനികൾ നടത്തുന്ന ശ്രമങ്ങളെ അദ്ദേഹം പ്രശംസിച്ചു. സർക്കാരിന്റെ അംഗീകൃത പ്ലാനുകൾ അനുസരിച്ച് ഉയർന്ന കാര്യക്ഷമതയോടെ സേവനം തുടരുമെന്ന് ടെലികോം കമ്പനി മേധാവികൾ ഉറപ്പുനൽകി.
sdfsf
