ഡീപ്ഫേക്ക് സാങ്കേതികവിദ്യയുടെ ദുരുപയോഗം തടയാൻ പുതിയ നിയമനിർമ്മാണവുമായി ബഹ്റൈൻ ശൂറ കൗൺസിൽ

പ്രദീപ് പുറവങ്കര I ബഹ്റൈൻ

മനാമ: ആർട്ടിഫിഷ്യൽ ഇന്റലിജൻസ് (AI) ഉപയോഗിച്ചുള്ള 'ഡീപ്ഫേക്ക്' സാങ്കേതികവിദ്യയുടെ ദുരുപയോഗം തടയുന്നതിനായി ബഹ്‌റൈനിൽ പുതിയ നിയമനിർമ്മാണം നടത്താൻ ശൂറ കൗൺസിൽ തീരുമാനിച്ചു. ഇതുമായി ബന്ധപ്പെട്ട കരട് നിയമം കൂടുതൽ പഠനങ്ങൾക്കായി വിദേശകാര്യ, പ്രതിരോധ, ദേശീയ സുരക്ഷാ സമിതിക്ക് തിരിച്ചയക്കാൻ കൗൺസിൽ ധാരണയിലെത്തി. സഭയിലെ 32 അംഗങ്ങൾ ഈ തീരുമാനത്തെ അനുകൂലിച്ചു. നിലവിലുള്ള നിയമങ്ങൾ ഇത്തരം കുറ്റകൃത്യങ്ങൾ നേരിടാൻ പര്യാപ്തമാണെന്ന് ചൂണ്ടിക്കാട്ടി നേരത്തെ സമിതി ഈ ബില്ല് തള്ളാൻ ശുപാർശ ചെയ്തിരുന്നുവെങ്കിലും, ആധുനിക സാങ്കേതികവിദ്യ ഉയർത്തുന്ന ഭീഷണികൾ നേരിടാൻ പ്രത്യേക നിയമം തന്നെ വേണമെന്ന നിലപാടാണ് ഇന്നലെ നടന്ന ചർച്ചയിൽ ഭൂരിഭാഗം അംഗങ്ങളും സ്വീകരിച്ചത്.

ആർട്ടിഫിഷ്യൽ ഇന്റലിജൻസ് ഉപയോഗിച്ച് ഒരാളുടെ ശബ്ദമോ ചിത്രമോ വീഡിയോയോ അതീവ കൃത്യതയോടെ കൃത്രിമമായി നിർമ്മിക്കുന്ന രീതിയാണ് ഡീപ്ഫേക്ക്. ഒരാൾ പറയാത്ത കാര്യങ്ങൾ പറഞ്ഞതായും ചെയ്യാത്ത കാര്യങ്ങൾ ചെയ്തതായും തോന്നിപ്പിക്കുന്ന വിധത്തിൽ ദൃശ്യങ്ങൾ നിർമ്മിക്കാൻ ഇതിലൂടെ സാധിക്കും. ബഹ്‌റൈനിൽ ഇത്തരം കേസുകൾ ഇതുവരെ ഔദ്യോഗികമായി റിപ്പോർട്ട് ചെയ്തിട്ടില്ലെങ്കിലും, ഭാവിയിലുണ്ടാകാൻ സാധ്യതയുള്ള ഗുരുതരമായ പ്രത്യാഘാതങ്ങൾ കണക്കിലെടുത്ത് മുൻകൂർ നിയമനിർമ്മാണം അത്യാവശ്യമാണെന്ന് ഫസ്റ്റ് വൈസ് ചെയർമാൻ ജമാൽ ഫക്രോ വ്യക്തമാക്കി.

വ്യക്തികളെ അപമാനിക്കാനും കുടുംബങ്ങളുടെ സൽപ്പേരിന് കളങ്കമുണ്ടാക്കാനും ബ്ലാക്ക്‌മെയിലിംഗിനും ഡീപ്ഫേക്ക് ഉപയോഗിക്കപ്പെടുന്നത് വലിയ സാമൂഹിക പ്രത്യാഘാതമുണ്ടാക്കുമെന്ന് നിയമകാര്യ സമിതി അധ്യക്ഷ ദലാൽ അൽ സായിദ് ചൂണ്ടിക്കാട്ടി. വ്യാജ ദൃശ്യങ്ങൾ ബോധപൂർവ്വം പ്രചരിപ്പിക്കുന്നവർക്കും കർശന ശിക്ഷ ഉറപ്പാക്കണമെന്ന് അവർ ആവശ്യപ്പെട്ടു. സാധാരണ സൈബർ കുറ്റകൃത്യങ്ങൾ യഥാർത്ഥത്തിൽ നടന്ന കാര്യങ്ങളെ അടിസ്ഥാനമാക്കിയുള്ളതാണെങ്കിൽ ഡീപ്ഫേക്ക് പൂർണ്ണമായും കൃത്രിമമായ കാര്യങ്ങളാണ് സൃഷ്ടിക്കുന്നത് എന്നതിനാൽ ശിക്ഷാ നിയമത്തിൽ (Penal Code) ഇതിനായി പ്രത്യേക വകുപ്പുകൾ വേണമെന്ന് ഡോ. മുഹമ്മദ് അലി ഹസൻ അഭിപ്രായപ്പെട്ടു.

അതേസമയം, ആർട്ടിഫിഷ്യൽ ഇന്റലിജൻസ് വഴി സൃഷ്ടിക്കപ്പെട്ട കുറ്റകൃത്യങ്ങൾ കോടതിയിൽ തെളിയിക്കുന്നതിലെ പ്രായോഗിക ബുദ്ധിമുട്ടുകളെക്കുറിച്ച് സമിതി റിപ്പോർട്ടർ അലി അൽ അറാദി സംസാരിച്ചു. ലോകമെമ്പാടും പതിനായിരക്കണക്കിന് എഐ പ്രോഗ്രാമുകൾ നിലവിലുണ്ടെന്നും ഇവയെ ഫലപ്രദമായി പ്രതിരോധിക്കാൻ കൂടുതൽ സാങ്കേതിക വൈദഗ്ധ്യം ആവശ്യമാണെന്നും അദ്ദേഹം കൂട്ടിച്ചേർത്തു. അന്താരാഷ്ട്ര മാതൃകകളും സാങ്കേതിക വശങ്ങളും കൂടുതൽ പഠനവിധേയമാക്കിയ ശേഷം സമിതി പുതിയ റിപ്പോർട്ട് സഭയിൽ സമർപ്പിക്കും.