ബഹ്റൈൻ കിരീടാവകാശി ഖത്തർ സന്ദർശിച്ചു; അമീർ ഷെയ്ഖ് തമീം ബിൻ ഹമദ് അൽതാനിയുമായി കൂടിക്കാഴ്ച നടത്തി
പ്രദീപ് പുറവങ്കര I ബഹ്റൈൻ
ദോഹ: ബഹ്റൈൻ കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫ ഔദ്യോഗിക സന്ദർശനത്തിനായി ഇന്ന് ഖത്തറിലെത്തി. ഖത്തർ അമീർ ഹിസ് ഹൈനസ് ഷെയ്ഖ് തമീം ബിൻ ഹമദ് അൽതാനിയുമായി അദ്ദേഹം കൂടിക്കാഴ്ച നടത്തി. ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം ശക്തിപ്പെടുത്തുന്നതിനും വിവിധ മേഖലകളിൽ സഹകരണം വർദ്ധിപ്പിക്കുന്നതിനുമുള്ള ചർച്ചകൾ സന്ദർശനത്തിന്റെ ഭാഗമായി നടന്നു.
ദോഹയിൽ എത്തിയ കിരീടാവകാശിയെ ഖത്തർ ഡെപ്യൂട്ടി അമീർ ഷെയ്ഖ് അബ്ദുള്ള ബിൻ ഹമദ് അൽതാനിയുടെ നേതൃത്വത്തിലുള്ള ഉന്നതതല സംഘം സ്വീകരിച്ചു. തുടർന്ന് നടന്ന കൂടിക്കാഴ്ചയിൽ ബഹ്റൈൻ രാജാവ് ഹിസ് മജസ്റ്റി ഹമദ് ബിൻ ഈസ അൽ ഖലീഫയുടെ ആശംസകൾ കിരീടാവകാശി ഖത്തർ അമീറിനെ അറിയിച്ചു. ഖത്തറിന്റെ ഐശ്വര്യത്തിനും പുരോഗതിക്കും വേണ്ടി രാജാവ് നേർന്ന ആശംസകൾക്ക് അമീർ നന്ദി രേഖപ്പെടുത്തുകയും ബഹ്റൈൻ രാജാവിനും ജനങ്ങൾക്കും തിരിച്ച് ആശംസകൾ നേരുകയും ചെയ്തു.
വരാനിരിക്കുന്ന പരിശുദ്ധ റമദാൻ മാസത്തിന്റെ പശ്ചാത്തലത്തിൽ ഇരു നേതാക്കളും പരസ്പരം ആശംസകൾ കൈമാറി. അറബ്-ഇസ്ലാമിക് രാഷ്ട്രങ്ങളിൽ സമാധാനവും ഐശ്വര്യവും നിലനിൽക്കട്ടെ എന്ന് അവർ പ്രാർത്ഥിച്ചു.
ബഹ്റൈനും ഖത്തറും തമ്മിലുള്ള ചരിത്രപരമായ ബന്ധത്തെ കിരീടാവകാശി പ്രകീർത്തിച്ചു. ഇരുരാജ്യങ്ങളിലെയും ജനങ്ങൾക്ക് ഗുണകരമാകുന്ന രീതിയിലുള്ള പുതിയ അവസരങ്ങൾ സൃഷ്ടിക്കുന്നതിനും പങ്കാളിത്തം ദൃഢമാക്കുന്നതിനും ബഹ്റൈൻ പ്രതിജ്ഞാബദ്ധമാണെന്ന് അദ്ദേഹം വ്യക്തമാക്കി. വിവിധ മേഖലകളിലെ പൊതുവായ താൽപ്പര്യമുള്ള വിഷയങ്ങളും പ്രാദേശിക പ്രശ്നങ്ങളും ചർച്ചകളിൽ ഇടംപിടിച്ചു.
സന്ദർശനത്തിന്റെ ഭാഗമായി ഖത്തർ അമീർ ഒരുക്കിയ വിരുന്നിലും കിരീടാവകാശിയും അനുഗമിച്ച സംഘവും പങ്കെടുത്തു. ഉഭയകക്ഷി ചർച്ചകൾ പൂർത്തിയാക്കി ഖത്തറിൽ നിന്ന് മടങ്ങിയ ഹിസ് റോയൽ ഹൈനസിനെ ഡെപ്യൂട്ടി അമീർ ഷെയ്ഖ് അബ്ദുള്ള ബിൻ ഹമദ് അൽതാനി വിമാനത്താവളത്തിൽ യാത്രയാക്കി.
cvxvxv
