വാഹനത്തിന്റെ രഹസ്യ അറകളിൽ കഞ്ചാവ് സൂക്ഷിച്ചു: 24-കാരനായ സുരക്ഷാ ജീവനക്കാരൻ ബഹ്റൈനിൽ വിചാരണയിൽ

പ്രദീപ് പുറവങ്കര

മനാമ: കാറിന്റെ രഹസ്യ അറകളിലും സീറ്റുകൾക്കടിയിലും ഉൾപ്പെടെ രണ്ടു കിലോയിലധികം വരുന്ന കഞ്ചാവ് (ഹാഷിഷ്) ഒളിപ്പിച്ചുവെച്ച് വിൽപ്പന നടത്താൻ ശ്രമിച്ച കേസിലെ പ്രതിയായ 24-കാരനായ ബഹ്റൈനി സുരക്ഷാ ജീവനക്കാരൻ ഹൈ ക്രിമിനൽ കോടതിയിൽ വിചാരണ നേരിടുന്നു. വിൽപ്പന ആവശ്യത്തിനായി ലഹരിമരുന്ന് കൈവശം വെച്ചതിനാണ് ഇയാൾക്കെതിരെ കേസ് എടുത്തിരിക്കുന്നത്. ഇയാളിൽ നിന്ന് ലഹരിമരുന്ന് വാങ്ങിയ 37-കാരനായ മറ്റൊരു സുരക്ഷാ ജീവനക്കാരനും 26-കാരനായ സെയിൽസ്മാനും ലഹരിമരുന്ന് ഉപയോഗിച്ച കുറ്റത്തിന് വിചാരണ നേരിടുന്നുണ്ട്.

പോലീസ് നടപ്പിലാക്കിയ കൃത്യമായ അന്വേഷണത്തിലും, ഒന്നാം പ്രതിയിൽ നിന്നാണ് തങ്ങൾ ലഹരിമരുന്ന് വാങ്ങിയിരുന്നതെന്ന മറ്റ് പ്രതികളുടെ മൊഴിയുടെ അടിസ്ഥാനത്തിലുമാണ് ഇയാൾ വലയിലായത്. പബ്ലിക് പ്രൊസിക്യൂഷനിൽ നിന്ന് അറസ്റ്റ് വാറന്റ് വാങ്ങിയ ശേഷം മാർച്ച് മാസത്തിലാണ് പോലീസ് സംഘം ഇയാളെ കസ്റ്റഡിയിലെടുത്തത്.

പ്രതിയെ പരിശോധിച്ചപ്പോൾ ഇയാളുടെ ശരീരത്തിൽ നിന്ന് 32.7 ഗ്രാം ഭാരമുള്ള കഞ്ചാവ് കഷണവും, കനാബിഡിയോൾ (CBD) അടങ്ങിയ ചെറിയ പ്ലാസ്റ്റിക് കണ്ടെയ്നറും, ഡിജിറ്റൽ അളവുതൂക്ക മെഷീനും, 50 ബഹ്റൈനി ദിനാറും, 200 സൗദി റിയാലും കണ്ടെടുത്തു. തുടർന്ന് ഇയാളുടെ വാഹനം വിശദമായി പരിശോധിച്ചപ്പോഴാണ് കാറിന്റെ ചേസിസിലും, ബൂട്ടിലും, മുൻഭാഗത്തും, സീറ്റുകൾക്ക് സമീപത്തും, ഫുട്‌റെസ്റ്റുകൾക്ക് അടിയിലുമായി അതിവിദഗ്ദ്ധമായി ഒളിപ്പിച്ച നിലയിൽ ലഹരിമരുന്ന് കണ്ടെത്തിയത്.

സാധാരണ കണ്ണുകൾക്ക് എളുപ്പത്തിൽ കാണാൻ സാധിക്കാത്ത രീതിയിൽ സൂക്ഷിച്ചിരുന്ന 1.9 കിലോഗ്രാം ഭാരമുള്ള രണ്ട് വലിയ കഞ്ചാവ് കഷണങ്ങളും, 333.6 ഗ്രാം ഭാരമുള്ള മറ്റൊരു കഷണവും, ലഹരിമരുന്നിന്റെ അവശിഷ്ടങ്ങൾ അടങ്ങിയ തൂക്ക മെഷീനുമാണ് കാറിനുള്ളിൽ നിന്ന് കണ്ടെടുത്തത്. ലഹരിമരുന്നുകൾ സുരക്ഷിതമായി സൂക്ഷിക്കാൻ ഇയാൾ പതിവായി സ്വന്തം കാറാണ് ഉപയോഗിച്ചിരുന്നതെന്ന് കോടതി രേഖകൾ വ്യക്തമാക്കുന്നു.

ചോദ്യം ചെയ്യലിൽ പ്രതികൾ എല്ലാവരും ലഹരിമരുന്ന് ഉപയോഗിച്ചതായി സമ്മതിച്ചു. തുടർന്ന് നടത്തിയ മൂത്ര പരിശോധനയിൽ എല്ലാവരുടെയും ശരീരത്തിൽ കഞ്ചാവിന്റെ അംശം കണ്ടെത്തുകയും ചെയ്തു. ഇതിൽ രണ്ടാമത്തെ പ്രതിയുടെ ശരീരത്തിൽ സാനാക്സ് (Xanax), ലിറിക്ക (Lyrica) എന്നീ മരുന്നുകളുടെ അംശവും കണ്ടെത്തിയിട്ടുണ്ട്.

ഒന്നാം പ്രതിയുടെ മൊബൈൽ ഫോൺ പരിശോധിച്ചതിൽ നിന്ന് തിരിച്ചറിയാത്ത വ്യക്തിയുമായി ഇയാൾ നടത്തിയ സംഭാഷണങ്ങളും, ലഹരിവസ്തുക്കളുടെ ചിത്രങ്ങളും, അവ തൂക്ക മെഷീനിൽ വെച്ചിരിക്കുന്ന ചിത്രങ്ങളും പോലീസ് കണ്ടെടുത്തു. കൂടാതെ, പണമിടപാട് രസീതുകളും ലഹരിമരുന്ന് രഹസ്യമായി വെക്കുന്ന സ്ഥലങ്ങൾ ('ഡെഡ് ഡ്രോപ്പ്' ലൊക്കേഷനുകൾ) അടയാളപ്പെടുത്തിയ ചിത്രങ്ങളും ഇയാളുടെ ഫോണിൽ നിന്ന് ലഭിച്ചതായി അന്വേഷണ സംഘം അറിയിച്ചു.