ആർട്ടിഫിഷ്യൽ ഇന്റലിജൻസ് അധിഷ്ഠിത റേഡിയോളജി സംവിധാനം; അൽ ഹിലാലും ഫുജി ഫിലിമും കൈകോർക്കുന്നു
പ്രദീപ് പുറവങ്കര I ബഹ്റൈൻ
മനാമ: ബഹ്റൈനിലെ രോഗനിർണ്ണയ രംഗത്ത് പുതിയ ചരിത്രം കുറിക്കാൻ അൽ ഹിലാൽ ഹെൽത്ത്കെയർ ഗ്രൂപ്പും പ്രമുഖ ഇമേജിംഗ് കമ്പനിയായ ഫുജി ഫിലിം മിഡിൽ ഈസ്റ്റും (Fujifilm) തമ്മിൽ തന്ത്രപരമായ പങ്കാളിത്തത്തിൽ ഒപ്പുവെച്ചു. ദുബായ് വേൾഡ് ഹെൽത്ത് എക്സ്പോ 2026-ൽ വെച്ചാണ് ഈ നിർണ്ണായക കരാർ ഔദ്യോഗികമായി പ്രഖ്യാപിച്ചത്. അൽ ഹിലാലിന്റെ പത്താമത്തെ ശാഖയായ 'അൽ ഹിലാൽ പ്രീമിയർ ഹോസ്പിറ്റലിൽ' അത്യാധുനിക ഇമേജിംഗ് സാങ്കേതികവിദ്യകൾ സജ്ജീകരിക്കുന്നതിന്റെ ഭാഗമായാണ് ഈ സഹകരണം.
ഈ കരാറിലെ ഏറ്റവും പ്രധാനപ്പെട്ട സവിശേഷത ജിസിസി മേഖലയിൽ തന്നെ ആദ്യമായി ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യയിൽ പ്രവർത്തിക്കുന്ന എം.ആർ.ഐ സംവിധാനം അൽ ഹിലാൽ പ്രീമിയർ ഹോസ്പിറ്റലിൽ സജ്ജീകരിക്കുന്നു എന്നതാണ്. ഇതിന് പുറമെ വിപുലമായ സി.ടി സ്കാനിംഗ് മെഷീനുകൾ, അത്യാധുനിക ഡിജിറ്റൽ എക്സ്-റേ സിസ്റ്റങ്ങൾ, മൊബൈൽ എക്സ്-റേ യൂണിറ്റുകൾ എന്നിവയും ആശുപത്രിയിൽ ലഭ്യമാകും. രോഗനിർണ്ണയത്തിലെ കൃത്യത വർദ്ധിപ്പിക്കുന്നതിനൊപ്പം ചികിത്സാ നടപടികൾ വേഗത്തിലാക്കാനും ഈ സാങ്കേതികവിദ്യകൾ സഹായിക്കും.
അൽ ഹിലാൽ ഹെൽത്ത്കെയർ ഗ്രൂപ്പ് മാനേജിംഗ് ഡയറക്ടർ അബ്ദുൽ ലത്തീഫ് ഉപ്പള, സി.ഇ.ഒ ഡോ. ശരത് ചന്ദ്രൻ, എക്സിക്യൂട്ടീവ് ഡയറക്ടർമാരായ മൊയ്ദീൻ ബിലാൽ, ഫിരാസത്ത് ഹസൻ, ഫിനാൻസ് മാനേജർ സഹൽ ജമാലുദ്ദീൻ എന്നിവരും ഫുജി ഫിലിം മിഡിൽ ഈസ്റ്റ് ജനറൽ മാനേജർ അറ്റ്സുഷി തറ്റൈഷി, മോഡാലിറ്റി സൊല്യൂഷൻസ് മാനേജർ മുഹമ്മദ് സൊക്രബ് എന്നിവരും ചടങ്ങിൽ സംബന്ധിച്ചു.
ബഹ്റൈനിലെ ജനങ്ങൾക്ക് ഏറ്റവും മികച്ചതും നൂതനവുമായ ചികിത്സാ സൗകര്യങ്ങൾ ലഭ്യമാക്കാനുള്ള തങ്ങളുടെ പരിശ്രമത്തിന്റെ ഭാഗമാണിതെന്ന് അബ്ദുൽ ലത്തീഫ് ഉപ്പള പറഞ്ഞു. രോഗനിർണ്ണയ രംഗത്ത് ആർട്ടിഫിഷ്യൽ ഇന്റലിജൻസ് ഉപയോഗപ്പെടുത്തുന്നത് ക്ലിനിക്കൽ ഫലങ്ങളിൽ വലിയ മാറ്റങ്ങൾ കൊണ്ടുവരുമെന്ന് ഡോ. ശരത് ചന്ദ്രൻ വ്യക്തമാക്കി. ഫുജി ഫിലിമിന്റെ ഏറ്റവും പുതിയ 'Echelon Synergy 1.5T MRI', 'Supria CT' എന്നീ സംവിധാനങ്ങൾ കുറഞ്ഞ വികിരണത്തിലൂടെ (low-dose imaging) രോഗികളുടെ സുരക്ഷ ഉറപ്പാക്കുന്നവയാണെന്ന് ഫുജി ഫിലിം അധികൃതർ ചൂണ്ടിക്കാട്ടി.
