സ്കൂൾ അസംബ്ലികൾ ഇൻഡോർ ഹാളുകളിലേക്ക് മാറ്റണം; ബഹ്റൈനിൽ പാർലമെന്റ് അംഗങ്ങളുടെ നിർദ്ദേശം
പ്രദീപ് പുറവങ്കര I ബഹ്റൈൻ
മനാമ: ബഹ്റൈനിലെ സ്കൂളുകളിൽ രാവിലെ നടക്കുന്ന അസംബ്ലികൾ വരാനിരിക്കുന്ന റമദാൻ മാസം മുതൽ താൽക്കാലികമായി ഇൻഡോർ ഹാളുകളിലേക്ക് മാറ്റണമെന്ന് പാർലമെന്റ് അംഗങ്ങൾ ആവശ്യപ്പെട്ടു. കഠിനമായ ചൂടിൽ നിന്നും തണുപ്പിൽ നിന്നും വിദ്യാർത്ഥികളെ സംരക്ഷിക്കുന്നതിനും അവരുടെ ശാരീരിക ബുദ്ധിമുട്ടുകൾ കുറയ്ക്കുന്നതിനുമാണ് ഈ നിർദ്ദേശം മുന്നോട്ടുവെച്ചിരിക്കുന്നത്. ഫിനാൻഷ്യൽ ആൻഡ് ഇക്കണോമിക് അഫയേഴ്സ് കമ്മിറ്റി ചെയർമാൻ അഹമ്മദ് അൽ സല്ലൂം നേതൃത്വം നൽകുന്ന സ്ട്രാറ്റജിക് തിങ്കിംഗ് ബ്ലോക്കിലെ അഞ്ച് എംപിമാരാണ് ഈ സുപ്രധാന നീക്കത്തിന് പിന്നിൽ പ്രവർത്തിക്കുന്നത്. നിലവിൽ പുറത്തെ മൈതാനങ്ങളിൽ നടന്നു വരുന്ന അസംബ്ലികൾക്ക് പകരം എയർകണ്ടീഷൻ ചെയ്ത ഹാളുകളോ ഓഡിറ്റോറിയങ്ങളോ ഉപയോഗിക്കണമെന്നാണ് ഇവരുടെ പ്രധാന ആവശ്യം.
ഇതിനു പുറമെ, സർക്കാർ-സ്വകാര്യ സ്കൂളുകളിൽ ഔട്ട്ഡോർ അസംബ്ലികൾ സ്ഥിരമായി നിർത്തലാക്കുന്നതിനെക്കുറിച്ച് വിദ്യാഭ്യാസ മന്ത്രാലയം വിശദമായ പഠനം നടത്തണമെന്നും സമിതി ആവശ്യപ്പെട്ടിട്ടുണ്ട്. മതിയായ ഹാൾ സൗകര്യങ്ങളില്ലാത്ത സ്കൂളുകളിൽ ക്ലാസ് മുറികൾ കേന്ദ്രീകരിച്ച് ഹ്രസ്വമായ അസംബ്ലി പ്രവർത്തനങ്ങൾ നടത്താവുന്നതാണെന്നും എംപിമാർ നിർദ്ദേശിക്കുന്നു. അസംബ്ലി നൽകുന്ന സന്ദേശങ്ങൾക്കും മൂല്യങ്ങൾക്കുമാണ് പ്രാധാന്യമെന്നും അത് എവിടെ വെച്ച് നടക്കുന്നു എന്നതിനേക്കാൾ കുട്ടികളുടെ ആരോഗ്യത്തിനാണ് മുൻഗണന നൽകേണ്ടതെന്നും അഹമ്മദ് അൽ സല്ലൂം വ്യക്തമാക്കി. രാവിലെ 15 മിനിറ്റോളം നീളുന്ന അസംബ്ലിയിൽ കഠിനമായ കാലാവസ്ഥയിൽ നിൽക്കുന്നത് കുട്ടികളുടെ പഠനത്തിലുള്ള ശ്രദ്ധയെയും ശാരീരികക്ഷമതയെയും ബാധിക്കുന്നുണ്ടെന്ന് രക്ഷിതാക്കളും അധ്യാപകരും നേരത്തെ തന്നെ പരാതിപ്പെട്ടിരുന്നു.
പ്രത്യേകിച്ച് റമദാൻ മാസത്തിൽ നോമ്പ് അനുഷ്ഠിക്കുന്ന വിദ്യാർത്ഥികൾക്ക് കഠിനമായ വെയിലത്ത് നിൽക്കുന്നത് വലിയ ശാരീരിക വെല്ലുവിളിയാകുമെന്ന് ബ്ലോക്ക് വക്താവ് ഖാലിദ് ബു ഓങ്ക് ചൂണ്ടിക്കാട്ടി. അമിതമായ ചൂട് മൂലം കുട്ടികൾക്ക് നിർജ്ജലീകരണവും തളർച്ചയും ഉണ്ടാകാൻ സാധ്യതയുണ്ടെന്ന് ബ്ലോക്ക് അംഗം ഡോ. മറിയം അൽ ദായീൻ കൂട്ടിച്ചേർത്തു.
sdfsf
