ബഹ്റൈൻ പ്രവാസിയുടെ പുസ്തകം ജൂലൈ11ന് പ്രകാശനം ചെയ്യും

പ്രദീപ് പുറവങ്കര

മനാമ: ബഹ്‌റൈൻ പ്രവാസി സുനിൽ തോമസ് റാന്നി എഴുതുന്ന ആദ്യ പുസ്തകം ട്രാവൽ ഫീൽസ് ആൻഡ് ഫീഡ്സിന്റെ പ്രകാശനം ജൂലൈ 11ന് നടക്കും.കെപിസിസിയുടെ പ്രസിദ്ധീകരണ വിഭാഗമായ പ്രിയദർശിനി പബ്ലിക്കേഷൻസ് സൊസൈറ്റി പ്രസിദ്ധീകരിക്കുന്ന പുസ്തകം പത്തനംതിട്ട റോയൽ ഓഡിറ്റോറിയത്തിൽ വെച്ച് പ്രിയദർശിനി പബ്ലിക്കേഷൻസ് ചെയർമാനും കെപിസിസി പ്രസിഡന്റുമായ സണ്ണി ജോസഫ് എം എൽ എ യാണ് പ്രകാശനം ചെയ്യുന്നത്. പ്രിയദർശിനി പബ്ലിക്കേഷൻസ് വൈസ് ചെയർമാൻ പഴകുളം മധുവിൻ്റെ അധ്യക്ഷതയിൽ നടക്കുന്ന ചടങ്ങിൽ യുഡിഎഫ് കൺവീനർ അടൂർ പ്രകാശ് എം പി പുസ്തകത്തിന്റെ ആദ്യപ്രതി സ്വീകരിക്കും.

ചടങ്ങിൽ ഡി സി സി പ്രസിഡൻറ് പ്രൊഫ. സതീഷ് കൊച്ചു പറമ്പിൽ, പ്രിയദർശിനി പബ്ലിക്കേഷൻ പത്തനംതിട്ട ജില്ലാ കോഡിനേറ്റർ ജി. രഘുനാഥ് തുടങ്ങിയവർ പങ്കെടുക്കും. യാത്രാ അനുഭവങ്ങളോടൊപ്പം യാത്ര നിർദേശങ്ങളും നൽക്കുന്ന സുനിൽ തോമസ് റാന്നി ഏറെ കാലമായി ബഹ്റൈൻ പ്രവാസിയാണ്. ടൂറിസം രംഗത്ത് തനതായ തനി ഗ്രാമീണ നാടൻ ടൂറിസം പ്രോത്സാഹനത്തിന്റെ ആവശ്യകത എടുത്തുപറഞ്ഞുകൊണ്ട് എഴുതിയിരിക്കുന്ന പുസ്തകം നാടൻ യാത്ര പ്രേമികൾക്ക് നല്ലൊരു റഫറൻസ് ഗ്രന്ഥമായിരിക്കുമെന്ന് രചയിതാവ് പറഞ്ഞു. കേരളത്തിലെ വിനോദസഞ്ചാര കേന്ദ്രങ്ങൾ വിശേഷിച്ച് പത്തനംതിട്ട ജില്ലയിൽ ഇനിയും ഏറെ വികസന പാതയിൽ എത്താവുന്ന രീതിയിൽ ഉള്ള നിർദ്ദേശങ്ങൾ കൂടി ഉൾപ്പെടുത്തിക്കൊണ്ടുള്ള പുസ്തകം ആണ് ഇറങ്ങുന്നത്.

ബഹ്‌റൈനിൽ റിക്രൂട്ട്മെൻറ് കൺസൾട്ടൻസി സർവീസ് സ്വന്തമായി സ്ഥാപനം നടത്തുകയാണ് സുനിൽ തോമസ് റാന്നി. ഒരു പതിറ്റാണ്ടിലേറെയായി ബഹ്‌റൈൻ പ്രവാസജീവിതം നയിക്കുന്ന സുനിൽ തോമസ് പത്തനംതിട്ട ജില്ലയിലെ റാന്നി കീക്കൊഴൂർ സ്വദേശിയാണ്. പത്ത് വർഷത്തോളം ബാംഗ്ലൂരിൽ മറുനാടൻ മലയാളിയായി തുടർന്നതിനുശേഷം ആണ് ബഹ്‌റൈനിലേക്ക് എത്തുന്നത്.ഭാര്യ ബിൻസി സ്വകാര്യ സ്ഥാപനത്തിൽ നഴ്സ് ആയി ബഹ്‌റൈനിൽ ജോലി ചെയ്യുന്നു.ഹർലീൻ ഗ്ലോറി സുനിൽ, ഹന്ന റിയ സുനിൽ എന്നിവർ മക്കളാണ്.

എഴുത്തും വായനയോടൊപ്പം കവിതകളും മനസ്സിൽ പതിയുന്ന ആനുകാലിക വിഷയങ്ങളിൽ പത്രങ്ങളുടെ എഡിറ്റോറിയൽ പേജിൽ കത്തുകൾ എഴുതുന്നതും പ്രസിദ്ധീകരിച്ചവ സ്വന്തം ബ്ലോഗ് പേജിൽ കൃത്യമായി തരം തിരിച്ച് ഉൾപ്പെടുത്തുന്നതും ഇഷ്ട വിഷയങ്ങളാണ്. പത്രങ്ങളിലെ കത്തുകൾ എന്ന കോളത്തിൽ പ്രസിദ്ധീകരിച്ച തെരഞ്ഞെടുത്ത നൂറു കത്തുകൾ അടുത്തതായി പ്രസിദ്ധീകരണത്തിനുള്ള പണിപ്പുരയിലാണ്.ഉടൻതന്നെ ഒരു കവിതാ സമാഹാരവും പുറത്തിറക്കാനുള്ള അണിയറ പ്രവർത്തനങ്ങൾ പുരോഗമിക്കുന്നു.ട്രാവൽ ഫീൽസ് ആൻഡ് ഫീഡ്സ് പുസ്തക പ്രകാശനത്തിനുശേഷം ആമസോൺ അടക്കം ഓൺലൈൻ സൈറ്റുകളിൽ ലഭ്യമാക്കുന്നതാണ്. പ്രിയദർശിനി പബ്ലിക്കേഷൻസ് ബഹ്‌റൈൻ ചാപ്റ്റർ രൂപീകരിച്ചശേഷം പുറത്തിറക്കുന്ന ആദ്യ പുസ്തകം ആണ് ട്രാവൽ ഫീൽസ് ആൻഡ് ഫീഡ്സ്.