കൊവിഡ് 19 അനുബന്ധ ലിങ്കുകളിൽ തുറക്കരുത്; മുന്നറിയിപ്പുമായി യുഎഇ പോലീസ്
ദുബൈ: കൊറോണ വൈറസുമായി ബന്ധപ്പെട്ട ലിങ്കുകള്‍ ഫോണിലോ ലാപ്ടോപിലോ തുറക്കരുതെന്ന് പൗരന്‍മാരോട് ആവശ്യപ്പെട്ട് യുഎഇ പോലീസ്. ബുധനാഴ്ച ജീവനക്കാർക്ക് ഇതുസംബന്ധിച്ച മുന്നറിയിപ്പ് പോലീസ് നൽകി. ഏതെങ്കിലും തരത്തില്‍ അനാവശ്യമാണെന്ന് തോന്നുന്ന ലിങ്കുകൾ തുറക്കരുതെന്നാണ് പോലീസ് നിര്‍ദേശം നല്‍കിയിരിക്കുന്നത്.
കൊവിഡ്- 19 മായി ബന്ധപ്പെട്ട് പൗരന്‍മാര്‍ക്ക് അറിയാനുള്ള താൽപ്പര്യം മുതലെടുത്ത് ഹാക്കർമാർ സജീവമായിട്ടുണ്ടെന്ന് അജ്മാൻ പോലീസ് പറഞ്ഞു. ഹാക്കിങുമായി ബന്ധപ്പെട്ട് നിരവധി പരാതികള്‍ ലഭിച്ചിട്ടുണ്ടെന്നും പോലീസ് വ്യക്തമാക്കി. പൗരന്‍മാരുടെ സ്വകാര്യ വിവരങ്ങള്‍ ചോര്‍ത്തി എടുക്കാന്‍ ഇത്തരത്തിലുള്ള ലിങ്കുകള്‍ ആണ് ഉപയോഗിക്കുന്നതെന്നും എല്ലാവരും ജാഗ്രത പാലിക്കണമെന്നും പോലീസ് പറഞ്ഞു.
കൊവിഡ് -19 മായി ബന്ധപ്പെട്ട ചികിത്സയുടെ വിവരങ്ങള്‍ നല്‍കിയാണ് ലിങ്കുകള്‍ ഹാക്കര്‍മാര്‍ പ്രചരിപ്പിക്കുന്നത്. ഈ ലിങ്കുകള്‍ തുറന്നാല്‍ കമ്പ്യൂട്ടറുകളും സ്മാർട്ട്‌ഫോണുകളും ഹാക്ക് ചെയ്ത് വിവരങ്ങള്‍ ചോര്‍ത്താന്‍ സാധിക്കും. കൊറോണ വൈറസ് പ്രതിസന്ധി മുതലെടുത്ത് ഇത്തരത്തിലുള്ള തട്ടിപ്പുകള്‍ നടക്കുന്നുണ്ടെന്നും പൗരന്‍മാര്‍ ശ്രദ്ധിക്കണമെന്നും പോലീസ് നല്‍കിയ മുന്നറിയിപ്പില്‍ പറയുന്നു.
