പ്രവാസികൾ അവധിക്ക് പോകുംമുൻപ് വീട് സുരക്ഷിതമാക്കണമെന്ന് ഷാർജ പോലീസ്
ഷാർജ : ജി.സി.സി രാജ്യങ്ങളിൽ സ്കൂൾ അവധിയായെന്നിരിക്കെ മിക്ക പ്രവാസികളും അവധിക്ക് സ്വദേശത്തേയ്ക്ക് കുടുംബത്തോടെ പോകുന്ന സമയമാണിത്. ദീർഘ നാളത്തേയ്ക്ക് ഫ്ളാറ്റ് പൂട്ടി പോകുന്ന ഈ സാഹചര്യത്തിൽ ഓരോരുത്തരും പാലിക്കേണ്ട മുൻകരുതലുകൾ ഉൾപ്പെടെയുള്ള കാര്യങ്ങളെ കുറിച്ച് ബോധവത്കരണ പ്രചാരണവുമായി പോലീസ്. അവധിക്ക് യാത്ര ചെയ്യുന്നവർക്ക് ആഭ്യന്തര മന്ത്രാലയത്തിന്റെ മസ്കാനി ആപ്പ് വഴി വിവരങ്ങൾ സഹിതം രജിസ്റ്റർ ചെയ്യാമെന്നും പോലീസ് പ്രവാസിളെ അറിയിച്ചു. അത് കൂടാതെ, ദിനപത്രങ്ങൾ വീട്ടിൽ വരുത്തുന്നവർ അവധി ദിവസങ്ങളിൽ താത്കാലികമായി നിർത്തണമെന്നും നിർദ്ദേശിച്ചു. വീട്ടുവാതിൽക്കൽ കൂടികിടക്കുന്ന തുറക്കാത്ത പത്രങ്ങൾ വീട്ടുകാർ സ്ഥലത്തില്ലെന്നതിന് വ്യക്തമായ സൂചനയാണ് നൽകുന്നത്. യാത്രയുടെ വിവരം അധികം പരസ്യപ്പെടുത്താതിരിക്കുക. ജോലി സ്ഥലത്തും അടുത്ത സുഹൃത്തുക്കളോടും മാത്രം അത്യാവശ്യം വിവരങ്ങൾ നൽകുക. ഫെയ്സ്ബുക്ക് പോലുള്ള സമൂഹികമാധ്യമങ്ങളിൽ യാത്രാവിവരം പോസ്റ്റ് ചെയ്യാതിരിക്കുക.
വിലപിടിപ്പുള്ള സാധനങ്ങളും രേഖകളും യാത്രയിൽ കൂടെ കൊണ്ട് പോകുന്നില്ലെങ്കിൽ പൂട്ടുള്ള ഒരു അലമാരയിൽ ഭദ്രമായി സൂക്ഷിക്കുക. ആവശ്യമില്ലാത്ത വൈദ്യുതോപകരണങ്ങൾ ഓഫ് ചെയ്ത് പ്ലഗ്ഗിൽനിന്ന് ഊരിയിടുക. ടൈമർവെച്ച് പ്രവർത്തിപ്പിക്കാൻ സാധിക്കുന്നവയാണെങ്കിൽ ഒന്നോ രണ്ടോ ലൈറ്റുകൾ മാത്രം പ്രവർത്തിപ്പിക്കുക.
