കര്ണാടകയില് വിശ്വാസ വോട്ടെടുപ്പ് ഇന്ന്
ബെംഗലൂരു:കര്ണാടകയില് വിശ്വാസ വോട്ടെടുപ്പ് ഇന്ന്. ന്യൂനപക്ഷമായ കോണ്ഗ്രസ്- ജെ ഡി എസ് സഖ്യ സര്ക്കാര് അധികാരമൊഴിയേണ്ടിവരുമെന്ന അവസ്ഥയാണുള്ളത്. വിശ്വാസവോട്ടെടുപ്പില് പങ്കെടുക്കില്ലെന്ന നിലപാടിലുറച്ച് നില്ക്കുകയാണ് വിമത എം.എല്.എമാര്. നിലവില് സഖ്യ സര്ക്കാറിന് നൂറും ബിജെപിയ്ക്ക് 107 ഉം ആണ് സഭയിലെ അംഗബലം.
എംഎല്എമാരുടെ രാജി കാര്യത്തില് സ്പീക്കര്ക്ക് തീരുമാനമെടുക്കാമെന്ന് ഇന്നലെ സുപ്രീം കോടതി വ്യക്തമാക്കിയിരുന്നു. സ്പീക്കറുടെ വിവേചനാധികാരത്തെ ഉയര്ത്തി പിടിച്ച സുപ്രീംകോടതി, ചുരുങ്ങിയ വാക്കുകളിലായിരുന്നു വിധി പ്രഖ്യാപിച്ചത്. രാജി കാര്യത്തില് അനുയോജ്യമായ സമയത്ത് സ്പീക്കര്ക്ക് തീരുമാനമെടുക്കാമെന്ന് കോടതി വിധിച്ചു. എന്നാല് സഭാ നടപടികളില് പങ്കെടുക്കാന് എം.എല്.എമാരെ നിര്ബന്ധിക്കരുത്. വിശ്വാസ വോട്ടെടുപ്പില് പങ്കെടുക്കുന്ന കാര്യത്തില് വിമതര്ക്ക് തീരുമാനമെടുക്കാമെന്നും കോടതി അറിയിച്ചിരുന്നു.
