കെ.സി.എയിൽ സ്വാതന്ത്ര്യദിനാഘോഷങ്ങൾക്ക് പതാക ഉയർത്തലോടെ തുടക്കം; സാംസ്കാരിക സമ്മേളനം ഓഗസ്റ്റ് 21-ന്
പ്രദീപ് പുറവങ്കര
മനാമ: കേരള കാത്തലിക് അസോസിയേഷന്റെ (കെ.സി.എ) ആഭിമുഖ്യത്തിൽ ഭാരതത്തിന്റെ സ്വാതന്ത്ര്യദിനാഘോഷങ്ങൾക്ക് തുടക്കമായി. കെ.സി.എ ആസ്ഥാനത്ത് സംഘടിപ്പിച്ച വർണ്ണാഭമായ ചടങ്ങിൽ പ്രസിഡന്റ് ജോൺ ദേശീയപതാക ഉയർത്തി. എക്സിക്യൂട്ടീവ് കമ്മിറ്റി അംഗങ്ങൾ, സാമൂഹിക-സാംസ്കാരിക രംഗങ്ങളിലെ പ്രമുഖർ, അസോസിയേഷൻ അംഗങ്ങൾ എന്നിവർ പങ്കെടുത്ത ചടങ്ങിൽ സ്വാതന്ത്ര്യസമര സേനാനികളുടെ താഗസ്മരണകൾ പുതുക്കി.
ആഘോഷ പരിപാടികളുടെ ഭാഗമായുള്ള പ്രധാന പൊതുസമ്മേളനവും സാംസ്കാരിക സന്ധ്യയും 2026 ഓഗസ്റ്റ് 21 വെള്ളിയാഴ്ച കെ.സി.എ ഹാളിൽ നടക്കും. ഇന്ത്യയുടെ വൈവിധ്യപൂർണ്ണമായ സാംസ്കാരിക പൈതൃകം വിളിച്ചോതുന്ന വർണ്ണാഭമായ ഘോഷയാത്രയോടെയായിരിക്കും വൈകുന്നേരത്തെ പരിപാടികൾക്ക് തുടക്കമാകുക.
തുടർന്ന് നടക്കുന്ന ഔദ്യോഗിക സ്വാതന്ത്ര്യദിന സാംസ്കാരിക സമ്മേളനത്തിൽ പ്രമുഖ വ്യക്തിത്വങ്ങൾ പങ്കെടുക്കും. അതോടൊപ്പം കെ.സി.എ സമ്മർ ക്യാമ്പിന്റെ ഗ്രാൻഡ് ഫിനാലെയും വരാനിരിക്കുന്ന ഓണാഘോഷങ്ങളുടെ ഔദ്യോഗിക ഉദ്ഘാടനവും ചടങ്ങിൽ വെച്ച് നിർവ്വഹിക്കും.
വെള്ളിയാഴ്ച നടക്കുന്ന ആഘോഷ പരിപാടികളിലേക്ക് എല്ലാ അംഗങ്ങളെയും അഭ്യുദയകാംക്ഷികളെയും സ്വാഗതം ചെയ്യുന്നതായി കെ.സി.എ ഭാരവാഹികൾ അറിയിച്ചു.
qdqwqwq
