ദേശീയപാത വികസനം: സംസ്ഥാന സർക്കാരിന്റെ നിശ്ചയദാർഢ്യത്തെ പ്രശംസിച്ച് പി.കെ. കുഞ്ഞാലിക്കുട്ടി
ഷീബ വിജയൻ
ദേശീയപാത വികസനത്തിൽ സംസ്ഥാന സർക്കാരിന്റെ പ്രവർത്തനങ്ങളെ പ്രശംസിച്ചും സാമ്പത്തിക നയങ്ങളെ രൂക്ഷമായി വിമർശിച്ചും മുസ്ലിം ലീഗ് നേതാവ് പി.കെ. കുഞ്ഞാലിക്കുട്ടി. മാതൃഭൂമി ദിനപത്രത്തിന് നൽകിയ അഭിമുഖത്തിലാണ് അദ്ദേഹം തന്റെ നിലപാടുകൾ വ്യക്തമാക്കിയത്.
ദേശീയപാത വികസനത്തിനായി സ്ഥലം ഏറ്റെടുക്കുന്ന കാര്യത്തിൽ ഇടതു സർക്കാർ വലിയ അത്യുത്സാഹവും നിശ്ചയദാർഢ്യവുമാണ് കാണിച്ചതെന്ന് അദ്ദേഹം പറഞ്ഞു. നേരത്തെയും നിയമസഭയിൽ ഉൾപ്പെടെ സർക്കാരിന്റെ നല്ല പദ്ധതികളെ താൻ പ്രശംസിച്ചിട്ടുണ്ടെന്നും അദ്ദേഹം ഓർമ്മിപ്പിച്ചു. എന്നാൽ, വികസന കാര്യങ്ങളിൽ പ്രശംസിക്കുമ്പോഴും സംസ്ഥാനത്തിന്റെ സാമ്പത്തിക മാനേജ്മെന്റ് തീർത്തും പരാജയമാണെന്ന് അദ്ദേഹം കുറ്റപ്പെടുത്തി. കേരളം നേരിടുന്ന ഏറ്റവും വലിയ പ്രതിസന്ധി സാമ്പത്തിക രംഗത്തെ തകർച്ചയാണ്. ഖജനാവിനെ പാപ്പരാക്കുന്ന അവസ്ഥ ഉണ്ടാകരുത്, അതിന്റെ ഭാരം ഒടുവിൽ വരുന്നത് സാധാരണ ജനങ്ങളുടെ തലയിലാണെന്നും കുഞ്ഞാലിക്കുട്ടി പറഞ്ഞു.
ആവശ്യമില്ലാത്ത കാര്യങ്ങൾക്കായി സർക്കാർ പണം ധൂർത്തടിച്ചതാണ് നിലവിലെ സാമ്പത്തിക പ്രതിസന്ധിക്ക് കാരണം. ഇടതുപക്ഷത്തിന്റെ ട്രേഡ് യൂണിയൻ മിലിറ്റൻസിയാണ് കേരളത്തെക്കുറിച്ചുള്ള നല്ല കാഴ്ചപ്പാടുകൾ തകർത്തത്. പത്ത് വർഷത്തെ വികസന നേട്ടങ്ങൾ അവകാശപ്പെടുമ്പോഴും, സ്വന്തമായി ഒരു ടെക്നോപാർക്കോ ഇൻഫോപാർക്കോ സ്മാർട്ട് സിറ്റിയോ കൊണ്ടുവരാൻ ഈ സർക്കാരിന് കഴിഞ്ഞിട്ടില്ല. ഇത്തരത്തിലുള്ള വലിയ സ്ഥാപനങ്ങളെല്ലാം യുഡിഎഫ് സർക്കാരിന്റെ കാലത്തെ പ്രോജക്ടുകളാണെന്നും അദ്ദേഹം ചൂണ്ടിക്കാട്ടി. നിലവിലെ പ്രതിസന്ധിയിൽ നിന്ന് കേരളത്തെ കരകയറ്റുക എന്നത് ഏറെ ശ്രമകരമായ ദൗത്യമാണെന്നും അദ്ദേഹം കൂട്ടിച്ചേർത്തു.
asdadsadsads
