വീട്ടമ്മയുടെയും മകളുടെയും മരണം: പ്രതി പിടിയിൽ
പാലക്കാട്: കേണംപുള്ളിയിൽ വീട്ടമ്മയെയും മകളെയും കിണറ്റിൽ മരിച്ച നിലയിൽ കണ്ടെത്തിയ സംഭവത്തിൽ മുൻ പഞ്ചായത്തംഗം പിടിയിൽ. നല്ലേപ്പിള്ളി പഞ്ചായത്തിലെ 11-ാം വാർഡ് മുൻ അംഗവും സി.പി.എം മുൻ ലോക്കൽ കമ്മിറ്റി അംഗവുമായ കേണംപുള്ളി എൻ.ദിനേശ് ആണ് അറസ്റ്റിലായത്. ദിനേശനെ സി.പി.എം പുറത്താക്കിയതാണ്. നവംബർ എട്ടിനാണ് കേണംപുള്ളി ലാലു നിവാസിൽ ജയന്തി (38), ഓട്ടിസം ബാധിച്ച മകൾ അക്ഷര (17) എന്നിവരെ വീട്ടുവളപ്പിലെ കിണറ്റിൽ മരിച്ച നിലയിൽ കണ്ടെത്തിയത്. ജയന്തിയുടെ അയൽവാസിയായ ദിനേശ് നിരന്തരമായി ശല്യം ചെയ്തിരുന്നതായി ജയന്തിയുടെ ആത്മഹത്യക്കുറിപ്പിലുണ്ടായിരുന്നു. അറസ്റ്റ് വൈകുന്നതിനെതിരെ ജനങ്ങളും വിവിധ രാഷ്ട്രീയ പാർട്ടികളും രംഗത്തെത്തിയിരുന്നു. തുടർന്ന് എ.എസ്.പി ഇടപെട്ടതോടെയാണ് പ്രതിയെ അറസ്റ്റ് ചെയ്്തത്. പ്രതിയെ ചിറ്റൂർ കോടതി റിമാൻഡ് ചെയ്തു.
