എസ്.ഐ.ആർ സമയപരിധി നീട്ടി കേന്ദ്ര തെരഞ്ഞെടുപ്പ് കമീഷൻ ഉത്തരവ്

ഷീബ വിജയ൯

തിരുവനന്തപുരം: എസ്.ഐ.ആറിൻ്റെ (SIR) സമയപരിധി ഒരാഴ്ചത്തേക്ക് നീട്ടി കേന്ദ്ര തെരഞ്ഞെടുപ്പ് കമീഷൻ ഉത്തരവിട്ടു. ഇതോടെ, എന്യൂമറേഷൻ ഫോമുകൾ ഡിസംബർ 11-നുള്ളിൽ സമർപ്പിച്ചാൽ മതിയാകും. പുതുക്കിയ സമയക്രമമനുസരിച്ച്, കരട് വോട്ടർ പട്ടിക ഡിസംബർ 16-ന് പ്രസിദ്ധീകരിക്കും. അന്തിമ വോട്ടർപട്ടിക ഫെബ്രുവരി 14-ന് പുറത്തിറങ്ങും. കേരളം ഉൾപ്പെടെ 12 സ്ഥലങ്ങളിലാണ് എസ്.ഐ.ആറിൻ്റെ സമയപരിധി നീട്ടിയിട്ടുള്ളത്.

കേരളത്തിൽ ബി.ജെ.പി ഒഴികെയുള്ള രാഷ്ട്രീയ പാർട്ടികളെല്ലാം എസ്.ഐ.ആർ നീട്ടണമെന്ന് ആവശ്യപ്പെട്ടിരുന്നു. തദ്ദേശസ്വയംഭരണ തെരഞ്ഞെടുപ്പ് നടക്കുന്ന സാഹചര്യത്തിൽ എസ്.ഐ.ആർ വിവരശേഖരണം നടത്താനാവില്ലെന്നതായിരുന്നു പാർട്ടികളുടെ പ്രധാന നിലപാട്. കേരളത്തിൽ ഡിസംബർ 9, 11 തീയതികളിലായി രണ്ട് ഘട്ടങ്ങളിലാണ് തദ്ദേശസ്വയംഭരണ തെരഞ്ഞെടുപ്പ് നടക്കുന്നത്. തെരഞ്ഞെടുപ്പ് ഫലം ഡിസംബർ 13-ന് പുറത്തുവരും.

കേരളത്തിൽ എസ്.ഐ.ആറിൻ്റെ ഭാഗമായി വിതരണം ചെയ്ത ഫോമുകളിൽ 42 ലക്ഷം എണ്ണമാണ് ഇനി തിരികെ ലഭിക്കാനുള്ളതെന്ന് തെരഞ്ഞെടുപ്പ് കമീഷൻ കഴിഞ്ഞ ദിവസം അറിയിച്ചിരുന്നു. 2.78 കോടി ഫോമുകൾ വിതരണം ചെയ്തതിൽ 99.5 ശതമാനവും (2.76 കോടി) പൂർത്തിയാക്കിയെന്നാണ് കമീഷൻ്റെ കണക്ക്. ഇതിൽ 85 ശതമാനമായ 2.34 കോടി ഫോമുകളാണ് നിലവിൽ തിരികെ എത്തിയിട്ടുള്ളത്.

തിരികെ ലഭിച്ച 2.34 കോടി ഫോമുകളിൽ 75 ശതമാനവും ഡിജിറ്റൈസ് ചെയ്‌തെന്നാണ് കമീഷൻ്റെ വിലയിരുത്തൽ. അപ്‌ലോഡ് ചെയ്ത എന്യൂമറേഷൻ ഫോമുകളുടെ എണ്ണം 1.75 കോടി വരും. കിട്ടിയിട്ടും ഡിജിറ്റൈസ് ചെയ്യാൻ ബാക്കിയുള്ളത് 59 ലക്ഷം ഫോമുകളാണ്. ഡിജിറ്റൈസ് ചെയ്തതിൽ 91 ശതമാനത്തിലും മാപ്പിങ് പൂർത്തിയാക്കാനായി. 2002-ലെ പട്ടികയിൽ പേരുള്ളവരോ രക്ഷിതാക്കൾ പട്ടികയിൽ ഉൾപ്പെട്ടവരോ ആണ് ഈ 91 ശതമാനം പേർ, അതായത് 1.59 കോടി പേർ. ഇവർ തിരിച്ചറിയൽ രേഖകൾ സമർപ്പിക്കേണ്ടതില്ല. ശേഷിക്കുന്ന ഒമ്പത് ശതമാനമായ 16 ലക്ഷം പേർ രേഖകൾ സമർപ്പിക്കണം. ഡിജിറ്റൈസേഷൻ 71 ശതമാനം പിന്നിട്ടപ്പോൾ തന്നെ കണ്ടെത്താനാകാത്തവരുടെ എണ്ണം 7.61 ലക്ഷം കവിഞ്ഞു. ഇതിൽ 3.41 ലക്ഷം മരിച്ചവരാണ്. 88,945 പേരെ കണ്ടെത്താനായിട്ടില്ല. 2.79 ലക്ഷം പേർ സ്ഥിരമായി താമസം മാറിയവരുമാണ്.