ഇറാൻ കീഴടങ്ങണം, ആക്രമണം തുടരും: ഡോണാൾഡ് ട്രംപ്; ആറുമാസം പോരാടാൻ തയ്യാറെന്ന് ഇറാൻ

പ്രദീപ് പുറവങ്കര I ബഹ്റൈൻ

വാഷിംഗ്ടൺ/ടെഹ്‌റാൻ: ഇറാനും അമേരിക്ക-ഇസ്രായേൽ സഖ്യവും തമ്മിലുള്ള യുദ്ധം ഒമ്പതാം ദിവസത്തിലേക്ക് കടക്കുമ്പോൾ, ഇറാൻ നിരുപാധികം കീഴടങ്ങണമെന്ന് അമേരിക്കൻ പ്രസിഡന്റ് ഡോണാൾഡ് ട്രംപ് ആവർത്തിച്ചു. ഇറാന്റെ മിസൈൽ-ഡ്രോൺ ശേഖരവും നാവികസേനയും പൂർണ്ണമായും തകർത്തുവെന്നും ഇനി ഒന്നും ബാക്കിയില്ലെന്നും സി.ബി.എസ്സിന് നൽകിയ അഭിമുഖത്തിൽ ട്രംപ് അവകാശപ്പെട്ടു.

മധ്യേഷ്യയിൽ ആധിപത്യം സ്ഥാപിക്കാൻ ശ്രമിച്ച ഇറാന്റെ ദേശീയ സുരക്ഷാ കൗൺസിൽ സെക്രട്ടറി അലി ലാറിജാനിക്ക് ഒടുവിൽ എല്ലാ രാജ്യങ്ങൾക്കും മുന്നിൽ വഴങ്ങേണ്ടി വന്നുവെന്നും ട്രംപ് പരിഹസിച്ചു. ഇറാനുമായി ചർച്ചകൾക്ക് താൽപ്പര്യമില്ലെന്നും സൈനിക ശേഷിയും ഭരണനേതൃത്വവും ഇല്ലാതാകുന്നത് വരെ ആക്രമണം തുടരുമെന്നും അദ്ദേഹം വ്യക്തമാക്കി. "കീഴടങ്ങാൻ പോലും ആരും ബാക്കിയുണ്ടാവാത്ത സാഹചര്യം വരും" എന്നാണ് എയർഫോഴ്സ് വണ്ണിൽ മാധ്യമപ്രവർത്തകരോട് സംസാരിക്കവെ ട്രംപ് പറഞ്ഞത്.

അതേസമയം, രാജ്യം കീഴടങ്ങില്ലെന്ന് ഇറാൻ പ്രസിഡന്റ് മസൂദ് പെസെഷ്കിയൻ പ്രഖ്യാപിച്ചു. അയൽരാജ്യങ്ങളായ ഗൾഫ് രാഷ്ട്രങ്ങളുമായി സഹോദരബന്ധമാണ് ആഗ്രഹിക്കുന്നതെന്നും എന്നാൽ ആക്രമണങ്ങളെ പ്രതിരോധിക്കാൻ രാജ്യം ബാധ്യസ്ഥമാണെന്നും അദ്ദേഹം പറഞ്ഞു. ഗൾഫ് രാജ്യങ്ങൾക്കെതിരായ ആക്രമണം നിർത്തുമെന്ന തരത്തിൽ കഴിഞ്ഞ ദിവസം താൻ നടത്തിയ പ്രസ്താവന ശത്രുക്കൾ വളച്ചൊടിച്ചതാണെന്നും അദ്ദേഹം ആരോപിച്ചു.

അമേരിക്കയ്ക്കും ഇസ്രായേലിനുമെതിരെ കുറഞ്ഞത് ആറുമാസമെങ്കിലും ശക്തമായ യുദ്ധം തുടരാൻ തങ്ങൾക്ക് ശേഷിയുണ്ടെന്ന് ഇറാന്റെ റെവല്യൂഷണറി ഗാർഡ് അവകാശപ്പെട്ടു. നിലവിൽ 200-ഓളം അമേരിക്കൻ-ഇസ്രായേൽ ലക്ഷ്യങ്ങൾ തങ്ങൾ തകർത്തുവെന്നും വക്താവ് അലി മുഹമ്മദ് നൈനി പറഞ്ഞു.

ഫെബ്രുവരി 28-ന് അപ്രതീക്ഷിതമായി പൊട്ടിപ്പുറപ്പെട്ട യുദ്ധത്തിൽ ഇതുവരെ ഇസ്രായേലിൽ പത്തുപേരും ആറ് അമേരിക്കൻ സൈനികരും കൊല്ലപ്പെട്ടു. ഇറാന്റെ കണക്കനുസരിച്ച് അവരുടെ ഭാഗത്ത് ആയിരത്തിലധികം പേർക്ക് ജീവൻ നഷ്ടമായിട്ടുണ്ട്. ഇതിൽ പ്രമുഖ രാഷ്ട്രീയ-സൈനിക നേതാക്കളും ഉൾപ്പെടുന്നു.

യുദ്ധം ആഗോള വിപണിയെയും ഗുരുതരമായി ബാധിച്ചിരിക്കുകയാണ്. ഹോർമുസ് കടലിടുക്ക് അടച്ചതോടെ എണ്ണവില വർഷങ്ങൾക്കിടയിലെ ഏറ്റവും ഉയർന്ന നിരക്കിലെത്തി. ഇറാഖിലേക്കും ലെബനനിലേക്കും സംഘർഷം വ്യാപിക്കുന്നത് ലോകവ്യാപാര ശൃംഖലയെയും ചരക്ക് നീക്കത്തെയും വലിയ പ്രതിസന്ധിയിലാക്കിയിട്ടുണ്ട്.