ആർ.എസ്‌.സി ബഹ്റൈൻ നാഷനൽ സാഹിത്യോത്സവ് : മുഹറഖ്‌ സെൻട്രൽ പ്രഥമ ചാന്പ്യന്മാർ
മനാമ : സർഗവസന്തത്തിന്റെ ഇശൽ പെയ്തിറങ്ങിയ ആർ.എസ്‌.സി ബഹ്റൈൻ നാഷനൽ സാഹിത്യോത്സവ് സമാപിച്ചു. ഇന്ത്യൻ സ്കൂൾ റിഫയിൽ നടന്ന സാഹിത്യോത്സവ് ഐ.സി.എഫ്‌ നാഷനൽ വൈസ്‌ പ്രസിഡണ്ട് മമ്മൂട്ടി മുസ്്ലിയാർ ഉദ്ഘാടനം ചെയ്തു. മൂന്ന് സെൻട്രലുകളിൽ നിന്നായി എഴുപത്തിയൊന്ന് ഇനങ്ങളിൽ 250ൽ പരം പ്രതിഭകൾ പങ്കെടുത്തു. മൂന്ന് വേദികളിലായാണ് മത്സരങ്ങൾ നടന്നത്. 575 പോയിന്റ് നേടി മുഹറഖ്‌ സെൻട്രൽ ചാന്പ്യന്മാരായി. 490 പോയിന്റ് നേടി റിഫ സെൻട്രൽ രണ്ടാം സ്ഥാനവും 365 പോയിന്റ് നേടി മനാമ സെൻട്രൽ മൂന്നാം സ്ഥാനവും നേടി.
വൈകീട്ട് നടന്ന സാംസ്കാരിക സമ്മേളനം ആർ.എസ്‌.സി ഗൾഫ്‌ കൗൺസിൽ എക്സിക്യുട്ടീവ്‌ അംഗം അൻവർ സലീംസഅദിയുടെ അധ്യക്ഷതയിൽ നാഷനൽ സാഹിത്യോത്സവ് വേദിയിലെ മുഖ്യാതിഥിയും പ്രശസ്ത എഴുത്തുകാരനും ചെറുകഥാകൃത്തുമായ പി.കെ പാറക്കടവ്‌ ഉദ്ഘാടനം ചെയ്തു. കെട്ട്‌കാഴ്ചകളുടെയും വർണ്ണകാഴ്ചകളുടെയും ലോകത്ത്‌ നിന്ന് നമ്മുടെ കുട്ടികളെ വായനയുടെയും ചിന്തയുടെയും ലോകത്തേക്ക്‌ തിരിച്ചുകൊണ്ട്‌ വരാൻ ഇത്തരം സാഹിത്യോത്സവിന് കഴിയട്ടെയെന്ന് പി.കെ പാറക്കടവ്‌ പറഞ്ഞു. മറ്റുള്ളവർ എറിഞ്ഞ് തരുന്ന മുദ്രാവാക്യങ്ങൾ വിഴുങ്ങി ഛായം തേച്ച തുണിക്കഷ്ണങ്ങൾക്ക്‌ പിറകേ പോകേണ്ടവരല്ല നമ്മുടെ കുട്ടികൾ. നന്മയുടെ വെളിച്ചം പ്രസരിപ്പിക്കുന്നവയാണ് നല്ല കലയും സാഹിത്യവും, ആർ.എസ്‌.സി ബഹ്റൈൻ നാഷനൽ സാഹിത്യോത്സവ് പുതിയ തലമുറയെ വെളിച്ചത്തിലെക്ക്‌ നയിക്കട്ടേ എന്നും അദ്ദേഹം പറഞ്ഞു.
ആർ.എസ്‌.സി നാഷനൽ ചെയർമാൻ റഹീം സഖാഫി വരവൂർ സന്ദേശ പ്രഭാഷണം നടത്തി. ഇന്ത്യൻ സ്കൂൾ ചെയർമാൻ പ്രിൻസ് നടരാജൻ, ഐ.സി.എഫ്‌ ഗൾഫ്‌ കൗൺസിൽ സെക്രട്ടറി അഡ്വ. എം.സി അബ്ദുൽ കരീം, ബിജു ഇരിങ്ങൽ, ജോർജ്ജ്‌ വർഗീസ്‌, ജയചന്ദ്രൻ കണ്ണൂർ, അബൂബക്കർ ലത്തീഫി, ജാഫർ മൈദാൻ എന്നിവർ സംസാരിച്ചു. പി.കെ പാറക്കടവ്‌, പ്രിൻസ് നടരാജൻ എന്നിവർ ജേതാക്കൾക്കുള്ള ട്രോഫി വിതരണം ചെയ്തു. സുലൈമാൻ ഹാജി, വി.പി.കെ അബൂബക്കർ ഹാജി, അഷറഫ്‌ ഇഞ്ചിക്കൽ, ഉസ്മാൻ സഖാഫി, മുസ്തഫ കണ്ണപുരം, ഹൈദർ മുസ്്ലിയാർ, അബ്ദുൽ സലാം മുസ്്ലിയാർ, അഹ്്മദ്‌ മൗലവി, അബ്ദുൽ ഹഖീം സഖാഫി, അബ്ദുസമദ്‌ കാക്കടവ്‌, സുബൈർ മാസ്റ്റർ, അബ്ദുൽ ജലീൽ എടക്കുളം, റഫീഖ്‌ ലത്തീഫി, ശംസുദ്ധീൻ സുഹരി, സി.എച്ച്‌ അഷറഫ്‌, നിസാർ സഖാഫി കൊല്ലം, ഫൈസൽ ചെറുവണ്ണൂർ, അഷ്ഫാഖ്‌ മണിയൂർ, നജ്മുദ്ധീൻ പഴമള്ളൂർ, സുനീർ നിലന്പൂർ, അബ്ദുൽ സലാം കോട്ടക്കൽ, നവാസ്‌ മുസ്്ലിയാർ, ഫൈസൽ അലനല്ലൂർ, തുടങ്ങി കലാ സാംസ്കാരിക രംഗത്തെ പ്രമുഖരും പ്രാസ്ഥാനിക നേതാക്കളും പങ്കെടുത്തു. സാംസ്കാരിക സമ്മേളനത്തിന് ആർ.എസ്‌.സി കൺവീനർ വി.പി.കെ മുഹമ്മദ്‌ സ്വാഗതവും അബ്ദുല്ല രണ്ടത്താണി നന്ദിയും പറഞ്ഞു.
