ബഹ്റൈൻ അന്താരാഷ്ട്ര വിമാനത്താവളത്തിൽ എഫ് 18 വിമാനം അടിയന്തര ലാൻഡിംഗ് നടത്തി
മനാമ : എഞ്ചിൻ തകരാറിനെത്തുടർന്ന് യുഎസ് എഫ് 18 വിമാനം ബഹ്റൈൻ അന്താരാഷ്ട്ര വിമാനത്താവളത്തിൽ അടിയന്തര ലാൻഡിംഗ് നടത്തി. റൺവേയിൽ തകർന്നുവീണ വിമാനത്തിൽനിന്നും പൈലറ്റ് പരിക്കേൽക്കാതെ രക്ഷപ്പെട്ടു. അപകടത്തെത്തുടർന്ന് ഏതാനും മണിക്കൂറുകൾ എയർപോർട്ട് അടച്ചിട്ടു. ഈ സമയം വിമാനങ്ങൾ ദമാം ഇന്റർനാഷണൽ എയർപോർട്ടിലേയ്ക്ക് തിരിച്ചുവിട്ടു.
യുഎസ്എസ് നിമിറ്റ്സിന് വേണ്ടി നിർമ്മിച്ച സ്ട്രൈക്കി ഫൈറ്റർ സ്ക്വാഡ്രൺ 146ലെ എഫ് / എ −18 ഇ വിമാനമാണ് ബഹ്റൈൻ അന്താരാഷ്ട്ര വിമാനത്താവളത്തിൽ അടിയന്തരമായി ഇടിച്ചിറക്കിയത്. വിമാനം പറന്നുയർന്നതിന് ശേഷം ഒരു എഞ്ചിൻ തകരാറിലാവുകയും പൈലറ്റ് വിമാനം വഴിതിരിച്ചുവിടുകയും ചെയ്യുകയായിരുന്നു എന്ന് യുഎസ് നേവി അധികൃതർ പുറത്തുവിട്ട പ്രസ്താവനയിൽ വ്യക്തമാക്കി. “പിടിച്ചുനിർത്താനാവാത്ത ലാൻഡിംഗ്” എന്നാണ് യുഎസ് നാവികസേന സംഭവത്തെ വിശേഷിപ്പിച്ചത്.
